Дагъистаннизиб мартла 25-личиб мугIяллимтала цаибси мажлис ибхьу. Ил бетурхар ­Мя­хIяч­­къа­лализибси «Россия — дила тарих» бикIуси та­рих­ла­шалси парк­лизиб, регионнизиб багьахъурси багьудила Дус­ла да­зур­базиб.

«Тарихлашалси паркла майдайчиб Дагъистаннизиб бегI ­гьалаб мугIяллимтала мажлис бетурхар. Илала бекIлибиубси тема – «Мультимедийный тяхIярла багьудила технологияби – ишхIелла мугIяллимла гIягIниахълуми». Илизир бутIакьяндеш диру респуб­ликала муниципалитетуназибадти мугIяллимтани, илкьяйдали «Россияла дусла мугIяллим» бикIуси санигIят­ла­шалси конкурслизиб чедибикибтани ва иличир гьаларти мерани дуцибтани», — багьахъур ТАСС-лизи паркла руководитель Тимур Велихановли. Илала гъай хIясибли, мажлисла дазурбазир декIар-декIарти устадешла дурсри, лекцияби ва бутIакьянчибас экскурсияби детурхар.
«Мажлис дурабуркIуси саби регионна гIилмула ва ­багьудила Министерстволичил, багьудила Юртличил барх. ­Илала ­бекI­ли­биубси мурад — гьаркьяти технологияби дузахънила ­устадеш гIерасни. Дурсрачир сегъунти мультимедийный тяхIярла технологияби пайдаладарили, тарихличи диги адилкьутил ­чебаахъесра имканбикIур. Нушаб дигулра мажлисла дазурбазиб цалабяхъ акIахъес, сунела кумекличилра жагьилти специалистунас чеимцIати багьудлуми касахъести, са­нигIятлизиб гьалабяхI ба­шахъести имканти гьаладирхьуси», — цIакьбарили буриб ­Т.Ве­ли­ха­новли.
Гьалабван Дагъистанна БекI С.Меликовли 2022 ибил дус рес­пуб­ликализиб багьудила Дусли балахънила хIекьлизибси ХIук­му къулбасбарибсири.