МяхIячкъалализиб Р.ХIям­­затовла ули­чил­си Фонд­лизиб дар­ган мез­личил ли­тературала ва далуй­тала хасси балбуц бетерхур. Ил дура­бер­кIиб­сири «Мезла кьис­мат — адамтала кьис­мат» бикIуси проектла дазурбазиб, сабира баягъи Фондла ку­мек­личил миллатла мезани руркъ­нила Центрли бузесаибси.

Фондла вице-президент ХIябибат ГIязизовани илдигъунти далдуцуни мезани руркънилис ва гьаладяхI дашахънилис дебали мягIничерти сари или буриб: «Миллатла мез нешла мезлизи халдирути сари. Неш биалли, гьарилла гIямрулизир бегIлара дурхъаси адам сари. Хьунул адамтала БархIиличилра мубаракбарес дигулра наб лебилра иша бакIибти хьунул адамти, рурсби».
Миллатла мезани руркънила Центр­ла руководитель Марина ХIясановани про­ектличила чебетаахъили буриб. Или­­ни багьахъурливан, проект акIа­хъуб­­тас бегI гьалабси яргализиб пикри бяхI­чиаэс дигули саби жагьилтачи.
Ил балбуцла дазурбазиб шагьуртала школабала бучIантани, чула руководительтала хIерудилиуб концертла программара гьалабихьиб.
МягIничебсили бетаур балбуцличиб карточкабачил дураберкIибси хIяз, сунечирра дурхIнала багьудлуми ахтардидарибси: бучIантани сецадла ункъли балулил даргала поэтуни-писательти, илдала произведениеби.
Лебталалра пикри битIакIиб илаб гьалабихьибси хай­дакьла някьишла чебкадси устадешла дарсли ва «Дюймовочка» бикIуси дарган мезли шурбатурси мультфильмли. ХIурматла гIяхIлили бетаур: ДР-ла культурала рурибси хIянчизар Хамис Шамилова, ДР-ла миллатла политикала ва динанала къуллукъунала шайчибси Министерствола жамигIятла гражданский институтуначил, ватIайзиб хIербирутачил ва гечликьянабачил хIянчи дурабуркIуси управлениела начальник ГъазимяхIяммад ХIяжиев. Илар бутIакьяндеш дариб ДГУ-ла преподовательтани, шагьарла школабала учительтани ва бучIантани.
Балбуц таманбиубли гIергъи, ДГУ-ла преподователь, филологияла гIил­мур­тала доктор ХIясанова Узлипат ГIус­ма­новначил нушала ихтилат бетаур. Илини буриб: «Ил тяхIярла далдуцуни нушаб чараагарли дурадуркIес гIягIнити са­ри. Миллатла мезаначи адамтази пикри бяхIчииахъес гьар кацIибси ганз дебали мягIничебсили бетарар. Иш­бар­хIила манзиллизир нушани дахъал кон­ференцияби дурадуркIулра, чучибра миллатунала мезани мяхI­кам­дирниличила аргъбаибти суалти ахъдурцули. Нушала чебла саби чеалкIуси наслулизи, халати адамтази, школала бучIантази мез мяхIкамдарес гIягIнили биъни аргъахъни. Дила пикрили, ил дебали къиянси хIянчи саби, хаслира — шагьарлизиб хIербирути, чусра нешла мез, гьайгьайра, хIяжатти ахIен или гьанбиркути адамтази ил пикри аргъахъес. Биалра нуша илдачил гьар бархIи дузулра. ДурадуркIути конкурсунани, спектакльтани, конференциябани нешла мез дагьахъес, мяхIкамдарахъес адамтала иштIяхI алкIахъа. Чебиуливан, гIергъити дусмазир ил шайчирти далдуцуначир бутIакьяндеш дирутала лугIи имцIабикIули саби. ХIера, ишбархIира, иш балбуцличиб лебри МяхIячкъалала школабала, гимназиябала бучIанти. Нушани чебаира секьяйда илди халаси иштяхIличил хIя­дур­биублирил. Чедаахъиб илдани сценкаби, уркIиличир дуриб даргала поэтунала ва писательтала назмурти. БучIантас дигестили детаур гьаладихьибти гIяхIцад багьираби, ребусуни, кроссвордуни. Илдигъунти хъарбаркьунани дурхIнала багьудлуми гьатIиралра мурхьдирахъу».