Ишди бурхIназив ну ца биштIаси балбуцличи къаршиикира. Дила юлдаш художник ва писатель Марат ХIяжиев нушала республикализиб дурайуси бегIлара бурибси журналла бекI редакторла хIянчиличи катнила разидешлис илала юлдашуни урхьула дублабси художникунала устаханализиб цахIнабикилри. Маратли нура ила тIалабварира.
Ца ну ахIенти лебилра саби-ургаб цалис ца тяништири. Илдала ургаб разиси ихтилат бемжурлири. Чула суратунала выставкабачила сабри илди гъайбикIути. Лебилра илди нуни чуйнара телевизорлизибад чебаибтири. Амма илдазив цалра нуни валуси аги. Илдани набчи сегъуналра пикри бяхIчииули ахIенри. Бархьли бурисра: наб ил хIейгибизур. НукIун, гьалавван гIядатла шила мугIяллим ахIенрану, бахъли валуси журналист сайра. Республикала газетала корреспондент. Хабуртала жузла автор. Саби-декIар чи саби, илцадра уктемли башес? Чула суратуназирти урхьура, дубуртира, дубуртала къярданазир гъятIдиибти юртанира ахIену? Нушани илди иткъира чедиути сари (Ишди чедирти гьимукIибси адамла гъай сари). Дагъистанна художникуначила дила цархIил, гIяхIси пикри саби.
ГIядатлисван камси замана кали, дила илавад арукьес пикри бакIиб. «ХIерризи, гьари, хIерризи Уста Шамхалли дарибти палтаргу итичирти!» — рикIар ца хьунул адам сунела мякьларсилизи, някъ набчибяхI бяхIчиаили. Лебтанилра илди гъай дакьиб, ва набчибяхI хIербизур. ГIур илдани набчи гъамбирули, дила махмурла костюм някъбани халбирес бехIбихьиб. «Костюм от Шамхала» или шивкIивдикIулри илдала мухIлубира.
«Костюм от Шамхала» дикIути хIябал девли тамашала асарбариб устаханализибти художникуначи. ЦархIил хIерличил хIербикIесбииб илди лебилра набчи. Халаси гьунарла секIалли урдухъун дила махмурла дуркькадиубти палтар.
ХIябал дус гьалаб нуни пикрибарира 50 дус нушала хъулиб лебси махмурлизирад наб костюмти дарахъес. Ил наб хъубеш нешли пешкешбарибсири. ГIяпабаркь, дила гъамси юлдаш кьярбукIан ЖабрагIилли аркусири ну сунела юлдаш, палтарла уста худуцIлан Шамхалличи. Амма валкьхIеур ну Шамхалличил тянишварес: ит дус демдрила изай ил иш дунъяличивад арухиб.
«ХудуцIланти бахъал лебти саби нуни балутира», — пикриухъунра ну. ИлхIели бегI гьалав гьаникиб ДР-ла урибси тухтур, бусягIят МяхIячкъалала цаибил поликлиникализив узуси хIулбала тухтур Расул Расулович ХIябибов. Ил дила гьарли-марси юлдашра сай. Тиладибарира илизи нуни Шамхаллизи ну кьабулварахъес. Камси замана дикибхIели, Расулли набзи Шамхалла телефонна номер гиб. «Илини хIечила балули сабину — зянкъдяхъя», — викIар дила юлдаш.
Ну учIухIелира сегъунтирил палтар дарахъес Дахадаевла уличилси кьакьалабси палтар ибуси устаханализи вякьунсири. Гьанна, итхIейчирад шуцIали дус дикили гIергъира наб ила укьес чебуркъуб. Варгира илав Шамхалра. Илини, хIяйна примеркаличира укили, бирбубли таманбариб дила махмурла костюм. Нушала газетала бекI редакторли, чебаибмадан, ил Шамхалли барибси биъни багьур. ЦархIилтира биуб Шамхалла хIянчи багьурти. Амма бахъалгъунтани балули ахIенри, се костюм сабил нуни бихуси. Нура вархли шакиркули ахIенри сегъунти дурхъати палтарличил вашулрил.
Шамхал ГIялихановла ули баягъи итди художникуначи итгъуна халаси асарбирни нуни, гьайгьайра, хIебагьурра. Нуни ил Россиялизив илцадра машгьурси палтарла уста виъни багьурсира гьанна кьанни сабри, Интернетлизирти иличила белкIани делчIунхIели.
Шамхалли бирбубси махмурла костюмли илцадра дила хIурмат ахъбурцалли, се бикIесара итди «дила сагати юлдашуни» художникуни, рахли Шамхалли наб гьарли-марли гIяхIси ва дурхъаси чIянкIилизибад костюм баралли? Лябкьуси дусла июньнис ну 75 дус вирусира. ЧевяхIсини кумекбаралли, къунзулхъас ну цагьатIи Шамхалли бирбубси костюмличил.
