Дагъистан Республикала хIянчи бедлугантани, хIянчи агарти бузериличил гIеббурцухIели, субсидияби касес бирар.

ДР-ла бузерила ва социальный бяхIчибизлизиб гьалабяхI арбякьундешла шайчибси Министерстволи штатлизи хIянчи агарси, адамти хIянчиличил гIеббурцуси Центрлизиб сунела у хIисаблизи касахъибси адам къуллукъличи уцибси хIянчи бедлуганнис субсидияби дедлуга или балахъули саби ведомствобала пресс-службализиб.
«Бузерила ца мерлис субсидияла кьадар 50 азир къурушличи абиркур. Пачалихъла кумек касес багьандан, хIянчи бедлуганнис «Россиялизиб хIянчи» («Работа в России») бикIуси порталла сай-вегIси кабинетлизибад гIярза бархьес ва акьути мераначила, къуллукъуначила сияхI каберхахъес чебиркур», — буриб пресс-службализиб.
Ведомстволизиб багьахъурливан, субсидияби гьаладирхьнила белгити тяхIяр-кьяйда 2021 ибил дусла мартла 13-личибадси РФ-ла министртала кабинетла 362 ибил номерличилси «2021 ибил дуслизиб хIянчи агарти бузериличил гIеббурцути предпринимательтас пачалихъла кумек гIеббиахънила хIекьлизибси» хIукмуличил тасдикьдарибти сари.