Арбякьунси жумягI республикализиб 1,5 азирличиб имцIали адам Covid-19-ла изайзи бикниличила балахъули саби регионна арадеш мяхIкамбирнила Министерстволи. Илкьяйдали шалгIеббухъунси жумягIлизиб ил кахси изайзибад 44 адам алхи саби. Тухтуртани бурни хIясибли, коронавирусла чейхъуси изай гьаланачиб гьести гIямрула адамтас урехи алкIахъулри, гьанна биалли, жагьилтачира ил изала чейхъули саби ва, сецад хIейгули хьалли, илди улхули саби.

МяхIячкъалала цаибил больницала пульмонологияла отделениела заведующая Мадина МяхIяммадовала гъай хIясибли, халкьла иза чехIейсудешла даража гIяшли биъни багьандан, Дагъистаннизир аги-кьяйда вайтIадиркули сари.
«Дагъистанлантани вакцинала мягIничебдешличила аргъили, ил бирахъес бехIбихьалли, аги къулайбиэсра асубирар. Илкьяйдали лебтанилра Роспотребнадзорла тIалабунира дузахъес хIяжатбиркур.
Изала бяхIяъниличи ва антителаби лерниличи хIерхIеили, прививка барахъес гIягIниси саби, сенахIенну иза жураби дарсдикIухIели. Изала чехIехъахъес яра чехъили гIергъи, декIти асурти детхIеахъес багьандан, вакцина цайли цаси тяхIярли бетарули саби.
Бахъалгъунти адамти дугIла гъай-мезличи бирхудешли, республикализиб ибкьси аги кабилзахъули саби. Сепайда, илдигъунти гъайли чула ва тухумтала арадешлис урехи акIахъес асубирниличи илдани пикри бяхIчииули ахIен», — буриб М.МяхIяммадовани.