ГIергъиси замана нушала республикализи башути туристуни имцIабикIули саби, ва ишарти жагадешунани илди хIяйранбирахъули саби.

Илкьяйдали Россияла гIяхIцад регионтачил Дубуртар Улкала бархбасуни чIумадикIули сари ва да­гъис­танлантала гIяхIялдешличи лебилра мяштI­ка­­бикIули саби. Амма илдигъунти гьалмагъдешла детуцунас диргалабулхъуси ца секIалра леб. Ил хIейгести анцI­бу­кьу­начил бархбасунси коронавирусла чейхъуси изала саби. Ил балагардеш агарбирнила ва адамтала арадеш мяхIкамбирнила мурадличил рес­пуб­ликализир да­хъал декIар-декIарти далдуцунира ду­радуркIули са­ри.
ХIера, гьалабванра МяхIячкъалализибси филармониялизиб СКФО-ла ва Миллатла Ассоциацияла вакилтани халкьличил гьунибаъни дураберкIиб. Балбуцличиб ахъбуцибси масъалари Северный Кавказла регионна ишбархIила мягIничерти детуцуни гьаладяхI дашахъни. ИмцIали пикри бяхIчиаиб республикализиб туризмала кьяли гьалабяхI букнила ва прививкаби дирнила масъултачи.
Регионна чейхъути излумала шайчивси тухтур Николай Павловла мяхIкамдеш бирнила ва вакцинаби дирахънила хIекьлизибси хIукмула мягI­ни­чеб­деш­ла черкад цалабикибтани чула пикруми дуриб.
ДР-ла туриндустрияла вакил Рабазан Адилаевли бурни хIясибли, МяхIячкъалала мягIничерти мер-му­саличи туристуни хьурали башнила масъайчила пик­риухъес хIяжатли саби. Буралли, Университетла площадличибадли Къоркъмасовла, Ленинна уличилти кьакьурбикад Родопский бульварличи баайчи мер-муса хасси тяхIярли далкьаахъес чебиркур. Илини МяхIячкъалала тарих дебали давлачебси биъниличила ва гIяхIлас ила имцIали башес дигниличила буриб.