Бархьси саби, гIергъити дусмазир нуша лебтанилра Европала жу­рала палтар дихулра. Буся­гIят­ла замана палтарла хIекьлизиб се­гъуналра низам агара. Мурул адамтала ва хьунул адамтала палтарлизиб декIар­деш баргес гьамадли ахIен. Хьунул адам­лис мягIничебсили бетарар мурул адамличи мешухIерикни. Ил ца сунечицун хасти лишантачирли мурул адамлизирад декIаррулхъуси сари.

ИшбархIи хьунул адамтани шалбар имцIали бихули чебиулра. Бурес чебиркур, янила манзил хIеваличибван ахIи, шалбарличиб гIяхIцадла ванали бирар. Бусурман диннизиб шалбар бихахъес къадагъабируси мер агара, амма ил чегьурхIели, чархла биркIанти чехIедиэсли ва мурул адамтала хIер битIхIейкIесли, гIеркъаси хIева бихес чебиркур. Нушала хала нешананира гьалар хIевнала удир кьякь дубличирти шалбурти дихутири. Гьанна биалли, илдигъунти гIядатла палтар делхъ-далайла абзаначир сари челгьути.
Жяв замана кабикибси ца анцIбукь гьалабирхьулра. Гьачам МяхIяммад Идбаг (с.гI.в) ГIяличил варх (р.гI) Бакила хIябразив левли, эмхIеличир хIябрала мякьларад шалгIеррулхъуси хьунул адам карикили чераили сай. Ил (с.гI.в) шайчи ласяхъили сай. ГIяли (р.гI) илизи викIули сай: «Хьунул адамли шалбар чегьурли сари, цалра чархла биркIан гьаргхIебиуб». ИлхIели идбагли (с.гI.в) ил хьунул адамлис балга-дугIя дарили сай. Шалбарличи илгъуна пикриличил хIеризалли, МяхIяммад Идбагли (с.гI.в) ил гIяхIсилизи халбарибси саби викIес вирар, сенахIенну машинабачи абицIухIели, кабицIухIели, ганзухъуначибад ахъбирухIели ва гIямрула цархIилти анцIбукьуназиб дягIути шалбуртани хьунул адамтала чархла биркIанти дигIяндирули сари.
БусягIятла замана хьунул адамтачир кагибти бусурман журала шалбурти хIясибдирулра нуни. Сунела бягIудешли ил шалбар сабил, юбка сабил де­кIар­барес къиянни саби. Дебали кьакьаси шалбаричиб илгъуна шалбар чегьалли, хьунул адамла куц-ка­биз­ра жагатили дирар.
Гъай агарли, хIе­вали ва юбкали хьунул адамла исбагьидеш хас­ли декIардиру. Амма, бархьли бикIибси шалбарлира илала хIекь­лизибси масъала ункъли гьунчибуршу.