Нушала хала бегIтани бурни хIя­сиб­ли, дубуртазиб мурталра адамти цIакьти, залумти ва са­бер­­хурти бирути саби.

Гьести гIямрула адам­тала пасихIдешличила, жагьилтала адам­дешличила ва хьунул адамтала жа­­га­­дешличила дахъал сари нушачи даиб­ти хабурти ва айтуби. Илала дура­бад­ли­­­­ра, гьарил шила чучи хасти гIя­да­ту­ни­­ра бе­ту­цу­нира лерти сари. Ду­бурла ахъти му­зур­банира мурхьти къа­дур­ба­нира шими ца­личирадли ца гьа­рахъ­дир­­кахъухIели биэс гьарил мил­латла мез­ра декIардулхъути са­ри. Ши­мала гьа­рахъ­дешличи ва мезанала де­­кIар­деш­ли­чи хIерхIеили, дубурланти ца­балги шад­ли­хъуни дурадуркIули, мур­талра цала­бир­­кули мушулбашули ва цархIил жу­ра­ла спортла хIязанази ихъутири. Ил­кьяй­­­дали дубурлантани чархлизи кьу­ват­ра дагьрилизи пасихIдешра хьу­ра­­ди­рули, адамти-ургар узидешла гье дел­гIу­тири. Чула гьунартачибли дунъя хIяй­ран­ба­рибти спортсменти саби ГIяли Къилич, Са­ли Сулайбан, ГIусбан ГIяб­ду­ряхI­ма­­нов,… кIи­­найс Олимпиадала хIя­за­назиб чем­пионти бетаурти Загалав ГIябдулбеков, Вла­димир Юмин, Сайпулла АбсягIидов, Бу­вайсар Сайтиев, … Ил лугIи даимбарес ви­рар гIурра ва гIурра. Ил дебали дигеси ва пах­рубареси анцIбукьра саби. Гьанна маш­гьур­ти спортсменкаби бетаурти рурс­бира леб. Елена Исин­бае­ва­цун гьан­ру­шал­лира баиб­сигу.
ГIергъиси заманара сецад-дигара спорт­­сменти бурес вирар дубурла шима­зи­бадли дурабухъи, дунъяла рингани му­тIигI­дирути ва гьаннала гIергъира илгъуна бетуц даимбарес имканти лерти багьадурти.
ГIе, ишбархIи дубурлантала гъабзадешличила ва игитдешличила сецад-дигара баянти гьандушес вирар. Кали сари мезанира. Амма урус мез имцIали дузахъниличирли миллатунала мезани детихънила урехира леб.
Спортсментасра игитунасра декIардешра агара чидил дарган, кIарахъан яра лезгин саял. Бархьаначи буралли, цархIилти дубурлантанира миллат гьанхIебуршуну, нушала дагъистанлан сай иру гьунар сархибсилис. Дунъяличи хабардерхахъурти багьадурти абикьурси Дубуртар Улкала гIяхIгъабза уршби саби Россияла Игит МяхIяммад НурбяхIяндов, гьачамалра удихIейкибси мушлукья ХIябиб НурмяхIяммадов… Илкьяйдали декIар-де­кIарти бетуцуназиб машгьурбиубти ба­гьадурти бахъал саби нушала респуб­ли­кала. Иш гьакIлис ца мисал гьан­бур­шехIе.
ХIера, шел сягIятла бухIнаб 10 килограммлацад битIакI камбариб 66 дус виубси дагъистанлай. Илкьяйдали Россияла рекордунала Жузлизиб цагьатIи у дакIубиуб. Ил сай Ахъушала районна МухIела шилизивадси БяхIямма Айгубов. 66 дус виубси илини Е.Исинбаевала уличилси стадионничив дуцIикIули, 5 сягIятла бухIнаб сунела кьаркьа 9,3 килограммла битIак камбиахъуб. Гьанналауб илгъуна анцIбукь кабикибси ахIен.
Ил далилличила Россияла рекордунала Жузла специалист, цIакь чебиахънила шайчив Гиннесла рекордунала Жузла кIина рекордсмен ветаурси Александр Пересветли БяхIямма Айгубовли дураберкIибси гьунарла хIясилти каиб ва ишкьяйда буриб:
«Нуша тамашала баркьудиличил тянишдиублира. Гьанналауб илгъуна рекорд биубси ахIен. Ну иша вакIибхIели, 65 дусличивра имцIали виубси адам чеира. Нуни бекI редакторличи зянкъдяхъира ва багьахъурра дусмачи хIеръили рекорд кабатес чебиркур или. БяхIямма Айгубов чеалкIуси наслулис тамашала мисал сай бузерилизив бажардииркниличивли, цIакьси виъниличивли ва кьуватчевдешличивли».
Россияла, Европала ва дунъяла декIар-декIарти чемпионатуначив чуйнара чедиикибси Дагъистайзивадси спортла ветеранна битIикI 88 килограмм сабри.
Аргъ-бархIила шуртIрачи хIерхIеили, Б.Айгубовли сунела баркьуди даимбариб. СанигIят хIясибли ил цулбала тухтур сай. Гьала-гьала берхIили иличи нур чекьур, кIинайс биалли зак гъагулта кIапIбариб ва спортсменничи забли ургьескабииб. Амма ил забли уруххIейахъуб ва ункъли финишличи ваиб. Илала арадешлис тухтурти къарауйчибри ва финишличи ваибмад хIила гъяж хIясиббарибсири. Спортсмен къулайси агиличиври. Ил хIянчи илини ца иткъи барибси ахIенри. Илала гIяхIти устадеш лерри ва сунечи сай вирхулри.
«Нуни гьарли-марли жявлил кьаркьа битIакI камбирахъусира. Ну азадли мушулвашухIели жумягIла бухIнаб 17 килограммла битIакI камбирес имканти дирутири. ВерхIел журала битIакIла спортсментачил вирхIусири ну итIели 120-личибадли 69-личи бикайчи. Гьариллис-декIар ил секIал барес гьамадли хIебирар. 7-8 сягIятла бухIнаб нуни 15 килограмм камбирахъусири. Наб сагати рекордуни кадизахъес дигухIели ишбархIи нуни 10 килограммличи гъамли битIакI камбарилра», — буриб Б.Айгубовли.
Спортсмен гIевуцес МухIела шилизибадли сунела гъамти ва шанти бакIилри. Илгъуна рекорд кабизахъни багьандан, Дагъистан Республикала физкультурала ва спортла Министерстволизивра Б.Айгубов мубараквариб. Ведомствола руководитель МяхIяммад МяхIяммадовла шайзивадли рекордсменнис баркаллала дугьби дуриб физкультурала ва спортла Управлениела начальник Халитбек МяхIячевли.
«Нура гьалав спортсмен вирусири ва азадли мушулбашутала къяяназив вираси. Нуни ункъли балуси саби кьаркьа битIакI камбиахъес сецад къиянсил. Ну вирхусири БяхIяммани илцад битIакI камбарес вирниличи, хIятта илгъуна секIал тамашабизеси биалра. Нуша разидиубра илгъуна рекорд Дагъистайзиб кабизахъниличи ва дубурлай халаси гьунар чебаахъниличи. Иша вакIес бетхIеур нушала министр МяхIяммад Юсуповичлис. Илини набчи хъарбариб БяхIямма гIевуцахъес. Илгъуна гIяхIгъабза чедибдешличил уркIи-уркIилавадли мубаракра вирулра», — викIи Х.МяхIячев.
Илкьяйдали шадлихъла аги-хIяйзиб Россияла рекордунала Жузла сертификат бедиб БяхIямма Айгубовлис.
Республикала рухIласи давлали сабси «Замана» газетала редакцияла хIян­чи­зартира дебали разибиахъуб дарган гIяхI­гъабзали илгъуна гьунар сархнили. Ну­шанира мухIен дубурла чIака уркIи-уркIилавадли мубараквирехIе ва гьаннала гIергъира арасили, спортлизив гьалавяхI вашусили ва чедибдешуни сархусили кали дигулра!
Дерхъаб хIела гIямру, хIурматла дубурлан!