Ахъушала районнизир ишдусла март ва апрель бузразир дарибти дахъал дяхIурби-забли гIяхIцад зарулти диахъуб. Гьар замана халкьлис тIабигIятла шайзирад нукьсандешунира камдирули ахIен. Ери-юрт, гьундурала дублар дарибти луцри гъятIдиибти мер-мусаличи районна ва шила администрациябала шайзибад халаси пикри бяхIчиаили, илди къулайси тяхIярличи душес къайгъилизиб бузули саби гIяхIцад адамти.
Сунени бекIдеш дируси районна халкьлис гIяхIти шуртIри диахъес багьандан МяхIяч ГIябдулкаримовли Федеральный ва республикала кьадрила программабази район каберхахъурли, дахъал къулайдешуни детурхахъули сай. Илкьяйдали, гьанна бусягIятра леб Ахъушала шилизибси машинабала «Леваши – Ахъуша – Мажалис – Мамедкъала» бикIуси гьунила дублабад бируси лац. Илаб гьалабра жявлил барибси къаркъубала лац бирусири. Ишдус заб дарили гIергъи, бяхI хIусбухъи, шурмира, гIянжила бекIнира кадикили ил лац гъятIкабииб. Лац гъятIаили лебилра гьунила кьадар буцибти гIянжила халати бекIни кадиркутири. Илди кадикибмад Ахъушала автомобильтала гьундурала кабизлизиб бузутани трактортачир умударили урисутири. Илкьяйдали чуйнара гъятIдииб ил гьуни кIапIбарибти гIянжи ва шурми.
Ил гьуни ремонтбарахъес республикала кьадрила программализи каберхахъес багьанданра районна бекI ДР-ла транспортла Министерстволизи дугьаизурсири.
Гьанна ил гьунила дублабад, бяхIла мякьлабад лац леб бирули. Ил лац бирули саби халаси устадешличил, мурхьси хьулчира абитIи, бетонра картIили, мегьла тIерхьубира бетоннизи катIи, метрличибра имцIали бягIудешра барили, чебетаахъили, бяхIлизирад хIусдухъунти къаркъубани ва шурмани гъятIхIебиахъесли.
Илдигъунти къулайдешуни детурхахъути Аллагьла шайзибад кириличи, адамтала шайзибад баркаллаличи лайикьбикили саби.
Гьаннала гIергъира халкьлис гIяхIдешуни дарес пикрибикIутас арадеш бараб, чула гIямрулизир сархибдешуни имцIадикIаб!
Сабият ГIябдуллаева
