ИшбархIи наб бурес дигулра спортлизи ахъиб­та­чила. ГIяхIсив дебали спорт дигахъни, вайсив? Спортли адамла арадеш дебабирахъулив яра усал­бир­кахъулив? Спорт дигахъуси адам сегъуна вируси?
Гьанбушес дигахъаси МяхIячкъалала шагьарлизив хIерируси, спортлизи ахъибси адамличилара (ишаб илала у бурули ахIенра). Ца пулан мурул адам чумал дус спортлизив жигарчевли гьалавяхI вашули уили сай. Илини, спортли арадеш гIяхIбулхъахъуси, дебабирахъуси саби ибти пикрумачил гьар даим спортзалтази вашули, тренировкаби дархьхIедалтутири. Ца бархIи спортзаллизивхIели иличи къагъдеш чебакIиб. Амма илини илцад-декIар пикри бяхIчиаили ахIен. Камси замана дикили гIергъи, ил тренировкабачив, къагъвиубли кайкиб. Бархтани ил больницализи арукиб. Илав ил реанимациялизи викиб. Тухтурла гъай хIясибли, илала лерилра анализуни вайтIа сарри. Амма илини гIямрулизир зараллати секIал пайдаладирули ахIенри, чIянкIли спортлизивцун сайри узуси. Тренировкабачибси ибкьдешли илала уркIили яхIхIедуцили, къагъвиублири ил. Анализунала баянти хIясибли, илис уркIиличи гужбарес асубируси буили ахIенри. Сунени биалли, иличила селра балуси аги. ХIябцIанну кIира дус виубси, бегIлара гIямру вавалидирхъуси манзил мурул адамлис уркIи барсбаресра асубирар бикIули саби тухтурти. ГIяхIдеш биахъес узули, вайдешличи шурбухъири. ХIера, сай шакра хIейкили, се бетаурлил илис.
Наб бурес дигуси: гьарил секIа дазу биэс гIягIниси саби. Адамла уркIили декIти, цIакьти хIянчурби чекайсути ахIен. Илра гьар даим бузуси биркIан саби, илисра мугьлатдеш лугес чебиркур — гуж хIебирес, барес гIягIниси декIси хIянчи лебли биалли, ил кам-камли бирес. Челукьуси агара биалра, дусла ухIнав цайналра медосмотрличи вашесра гIягIниси саби. ВегIли мяхIкамхIебаралли, урхIли вегIла арадеш мяхIкамхIебиру. Ил багьандан хIушала хIушачи ва арадешличи чекадилзеная. ЖагьхIели ил хIебирадалли, духънадаибхIели дебали пашмандиэс асубирар.

Анжела Мутазова