Бара гьалабван ГI.Ба­тирайла ули­чилси Даргала театр­ли­зиб Осетияла халкьла дра­ма­тург Тотраз Кокаевла пьеса хIясибли «Фатима» би­кIу­си драмала спектакль гьалабихьиб. БурахIелли, урус мезличибад дарган мезличи хабар шурбатурсири нушала рархкья Муъминат Хаттаевани.
Илаб Фатима бикIуси дубурлан рурсила кьяркьси кьисматличила бурулри. Спектакльлизиб баркьуди дургъбала манзиллизиб кабиркули саби. Илар вайдеш ва гIяхIдеш, разидеш ва кьутIкьудеш, дергъ ва даршудеш цугдурцули сари. Илкьяйдали лерилра манзилтазир аргъбаибтили кавлути адамдешла дурхъадешуначила ва бекIахъудила шуртIрачилара темабира илар ахъ­дурцули сари.
Цундеш, кьутIкьудеш ва анцI­­кьи-шишимти ахIи, дургъбала сегъуна асар биэса. ХIе­ра, ил спектакльлизирра сунела гьалмагъ дергълизи арукибси Фатимасра кьисмат илгъуна кьадарбирар или гьанбиркули ахIенри. РахъхIи ил Жамбулатлис хIерли калун. Ахирра-ахир ил дудешли цар­хIил уршилис шери редиб. Ца гьачам сунела виштIаси урши усаахъес къайгъилизир лерли, Фатимачи ца гIяхIл вакIиб. Душмантала ясирлизивад ухъунси Жамбулат сайри ил хъули чарухъи. Сунечи Фатима аррукес ил вакIилри. Ил кьа­бул­хIерикибхIели, Жамбулатли рурсила мурул каршули сай. УркIрухъи урухриубси Фатима гIякьлу-дагьрилизирад рухъун. ХIера, ишаб авторли адамличи гужбарес асу­хIе­бирни чебиахъули сай. Илгъуна баркьудила ахир кахсили бетаэс асубирули саби.
Адамтас спектакль дебали гIяхIбизур. Ахирличиб заллизиб зайбикIуси вяхли дяхъибти хъутрала тIама илис бикьрили бетаур. Илар ахъдуцибти темаби нушала ишбархIила манзилличи хасти диъни багьандан, гьарил баркьудила мягIна бархьли аргъес имканбикIули саби. Спектакльла декIар-декIарти бутI­назиб цацабехIти адамтала гIямру сипатдирулигу ибсира пикри башулри. Лебтанилра ил гьачамалра чебаэс гIягIниси саби или гьанбиркули саби.

ПатIимат Шахова