Гьарил адамлис тухтуртачи вашес чевкъули бирар, хаслира — мер-муса хIясибли сунела у хIисаблизи касахъибси поликлиникализивси терапевтличи. Се-биалра челукьуси биалли, илини хIила ва жихIла анализуни дедахъес, флюорограмма ва кардиограмма касахъес направлениеби лукIути сари. Илала дурабадра, хасти баянти дакIудухъи, гIягIнидеш акIалли, цархIилти тухтуртачи урхьуси сай.
ХIила анализуни бегIлара дахъал сари:цахIнабси анализ, биохимический, RV ВИЧ, гормонти се хIяйчир сарил ахтардидируси, АЛТ, АСТ ва дахъал цархIилтира. Илди анализуни агарли больницализира каркьуси ахIен. Пачалихъла поликлиникабази башутани балули бургар илдазир кадизахъурти шуртIрачила.
ЗягIипсини направлениера касили, савли-жявли поликлиникализи вакIили, илаб ярга буцес гIягIниси саби ахтардилис хIи дедес багьандан, илхIелира сягIят урегличив. Гьалаб бакIибтани илаб ярга кабизахъурли сияхIлизи уми лукIути сари ва чучи ярга сабаайчи цархIилти тухтуртачи башули итара ишара дуцIбикIути саби. СенахIенну, мисаллис буралли, нушала поликлиникализир гьанна бикайчи хIи дедлугути кIел кабинет лертири: цализиб общий анализ кайсуси, цархIил кабинетлизир цархIилти лерилра хIила анализуни дедлугуси.
БегIлара тамашала — ца кабинет поликлиникала жаняхIла балуй шайчибси юртла бутIализиб, цархIил — алгъай шайчибси. Бурес чебиркур, гьар бархIира-сера анализуни дедлугути 50-йчибра имцIали адам бирути саби, ва илди жаняхIлизибад ярга сабаилил багьес итил кабинетлизира ишиллизира башути саби, гьести гIямрула адамти биаб, жагьилти биаб. Жявли балкьаэс багьандан флюорограмма барес ва кардиограмма касесра ярга бурцуси саби. Илкьяйдали поликлиникализир 2-3 сягIят аркьути сари анализуни дедесцун.
Ита-иша дуцIбикIес бамсурли, гьаман зягIипбиркути бухънаби бекIливиубси тухтурлизи гIярзбухъи, хIи ца кабинетлизир дедлугес бехIбихьиб. ИлхIелира тухтурла направлениеличил регистратурализи вякьи илабад штрихкод сасес гIягIнисири, илавра яргаличи кайзурли. Итира зягIипти адамти инжитхIебарили, анализуни касес асухIебирусив? Иличибли кункдеш алкIахъулив, гьатIи, илдани, гьатIира бачабирхахъули кьалли адамти.
Адамти гIуррара бекI тухтурлизи гIярзбухъи бииши, илди штрихкодуни регистратурализирад урасили, гьанна анализ кайсуси процедурный кабинетлизи дедили сари ва вякьунсила направление хIясибли, илди хIиличилти пробиркабачи диршути сари. Суал алкIули саби, илди лерилра авара селис гIягIнитил балуси агарсив? Илди хIейгули камси-биалра ахъри лебти адамти дурхъали диалра багьалис цархIилти клиникабазир анализуни дедлугули саби. Зумали зягIипбиркути адамтала ахъри хIебиалли, илдани се барес гIягIниси? Итира хIербиэс къиянхIели ва гьар секIал дурхъахIели поликлиникализи башути зягIиптас шуртIри акIахъес асухIебирусив илди инжитхIебирули?
Дила пикрили, пачалихъла поликлиникализиб, больницабазиб зягIиптачи хIеруди бирнила шали хIярхIбиубли саби. Ила башутикIун дусличи-дус итира камбикIули саби, яра адамти багьалис дузути медицинала центртази башахъес дирути авара хIедиэс илди?
Наида Гъуруева
