УргIерила ши жяв заманаличибад гъабзадешличил ва хIурматличил машгьурбиубси саби. Дахъал дусми гьалаб илаб лебилра сирхIяла наибство бирусири ва алавчарти шими наибла бекIдешлиур дирутири. Совет хIукумат кабизурли гIергъи, сирхIяла шими кадурхуси УргIерила (Ураринский) район бирусири, ва ил 1937 ибил дусличи бикайчи калунсири. Илкьяйдали илаб бирусири УргIерила хабардерхурси базарра. Илар чумал районна халкьли лерилра чус гIягIнити масани исутири.
ИшбархIира ургIерантани Дагъиста тарихлизир мурхьти къел кавлахъули сари. Бахъал машгьурти адамти дурабухъун ил шилизибад: бурибти гIялимти, искусствола хIянчизарти, спортсменти ва баркьудила адамти. Илди-ургав халаси хIурматличил гьанушес вирар хала бегIтала амру даимбируси, шиличи ва шантачи уркIи изуси, бусягIятла замана шилис бекIдеш дирули узуси ХIябибуллаев ХIябибулла МяхIяммадович.
АкIубси сай ил 1983 ибил дуслизив урибси мугIяллим, жявли гIямрулизивад шалгIевухъунси МяхIяммад ХIябибуллаевла ва дахъал дусмазир УргIерила участковая больницализир рузули калунси, гьанна бамсриихъули хъулирси Маннила хъалибарглизив. Дебали хIурматла хъалибарг саби ХIябибуллаевхъала.
ХIябибуллагьла сайгъунти пергер рузбира леб: ПатIимат гIилмуртала кандидат, доцент, Дагъиста пачалихъла педагогикала университетла Дагъиста мезанала кафедрала заведующая сари; Раисат, медицинала академияра белчIи, биштIатала тухтурли рузули сари; Хадижат узиван баркьудила адам сари.
ХIябибуллагь ХIябибуллаевли, гIяхIти кьиматуначил УргIерила урга даражала школа таманаили, сунела белчIуди улкала тах шагьар Москвализибси автомобильно-дорожный университетлизиб даимбариб. Илра ункъли хъараахъурли, чедиб бурибси университетлизиб сунела бузерила цаибти гунзри кацIиб. ГIур баркьудила адам ветаурли, бузерила гьуни даимбариб.
Серхурси дарган уршили, заманала башриличил варх вашули, сай-вегIси предприятие акIахъуб ва гIяхIцад дагъистанлантас хIянчила мерани детаахъур. ВиштIахIейчивад ил адамтас кумекбарес, къияндикибсилис кумекла някъ гьабалтес бурсивиубсири. Чумра адамлис багалавиуб ХIябибуллагь МяхIяммадович.
Илини дирути чедиухIели, 2020-ибил дуслизив сунела шантани халаси игьдибар бихьили, ил шила бекIли викIиб. Гьайгьайра, шантас бедибси гъайлис марли калес багьандан, илини шилизир дахъал хIянчи дариб. ХI.ХIябибуллаевли дарибти лерилра ца макьалализир дурес хIейрар, биалра чумал гьандуршис. Шила культурала Юрт къулайбариб, шила духIнарти гьундури бетонни ва къирли дуцахъиб, волейболла хIязлис хасбарибси жагаси майдан тIашбатур, УргIерила ши ва школа 100 дус биънила байрумти дурадеркIиб. ГIурра дахъал хIянчи дариб илини 5 дусла духIнар. Ишаб бурес чебиркур, имцIатигъунти харжани сай-вегIти диъниличилара.
Бара гьаларван дарибти заб-маркали «Цугни-УргIери» бикIуси федеральный кьадрила гьуни, къаркъуби-гIянжи хIусдухъи, заябиубхIели, чумал бархIила бухIнаб ил къулайси агиличи бикахъиб. Ишгъуна къиянси замана, вегIла шиличи ва шантачи уркIи изуси адам левни халаси игъбарра саби. Илгъуна игъбар лебал УргIерила шантала, илгъуна пергер дубурлан, гIяхIгъабза левхIели.
Ириъ шантани ил сагадан викIиб шила бекIли. Дахъал сари ХIябибуллагьла кьасани-хьуланира, дахъал сари къайгънира шилизир халкьлис кункдешуни акIахъес, шанти шинничил ва газличил гIеббуцес багьандан. Илди пикруми детерхахъес багьандан, сунела шилисцун ахIенну, арагIеб Дахадаевла районнис багалавиэс дигули сай.
Лерилра хIела пикруми-кьасани детерхаб, хIурматла ХIябибуллагь МяхIяммадович! Мурталра Кьудратла ВегIли гIевурцули гIямру деркIаби. ХIедра, хIела кулпетлисра арати гIямру дулгулра.
Кьади ГIялисултIанов
