Хайдакьла районна ЦIур­хачила шилизиб ишдус майла 10-личиб, Дагъиста шила хозяйствола урибси хIянчизар Рабазанкьади Юсупов гьаниркахъули, гьар дус дурабуркIуси волейболла абз бетерхур. Ишдус ил 18 ибил дус гьаб-гIергъили дурабуркIусири. Гьалавван илди абзанала сиптакар Рабазанкьадила урши МяхIяммадрасул Юсупов сайри.
ЦIурхачир школабазиб бучIути рурсбала волейболла командабала абзани сари детурхути. Ишдус ила дакIилри Дагъиста хIябал районнизирад финаллизи дурадухъунти шел урга даражала школабала команда: Мажалисла, ЦIурхачила, КIишала, Кудагула, Дюбекла.
Ишдус ЦIурхачир волейболла абзаначил цазаманализир гира ахъбурцнила шайчирти абзанира дурадеркIиб. Илдала сиптакар МяхIяммадрасул Юсуповла юлдаш Башир Сулайбанов сайри. КIидехIелра абзани ЧебяхIси Чедибдеш 81 дус биънилис хасдарибтири.
Ил бархIи ЦIурхачиб бахъал гIяхI­лира лебри. Илдала лугIилизиб — Хайдакьла районна бекI Запир ХIясанов, районна белчIудила управлениелис бекIдеш диран Мадина Мирзаева, Шапи ГIялиев, Хизри Юсупов ва цархIилтира.
Байрамличир чула устадеш чедаахъиб Дагъиста бурибти гIяртистунани ва делхъла коллективтани.
Абзани ибхьули гъайухъунси Запир ХIясановли Рабазанкьади Юсуповли лерилра сунела гIямру районна шила хозяйстволис багъишладарибти сари или буриб. Илини бахъли валуси жамигIятла хIяракатчила урши МяхIяммадрасуллис дахъал дусмазиб сунела шилизиб волейболла абз дурабуркIнилис халаси баркаллара багьахъур.
«Спортла абзанани жагьилтазиб спортличи иштяхI алкIахъуси саби ва илдала хIял-тIабигIят руркъути са­ри. Рурсбала волейболла хIязличи хIери­кIескIун гьатIира иштяхIдухъеси саби», — викIар Хайдакьла районна бекI. Илини абзбикIути рурсбас бархьси, къалп агарси хIяз балгун.
Мадина Мирзаеванира дуриб рурс­бас жагаси хIязличи гьуцIирути дугьби. Шапи ГIялиевлира Хизри Юсуповлира спортсменти гIяхIти дугьбачил гIеббуциб.
Волейболла абзаназиб чедибикиб ЦIурхачила школала команда, кIиибил мерличи бакIиб Мажалисла школа, хIябэсил мер бикиб Дюбекла школала командалис. БегIлара гIяхIси игрокли уррухъун Барият МяхIяммадова, бегIлара гIяхIси нападающийлизи халрариб ПатIимат АбихIяжиева. ХIербикIутала шайчибад савгъат бикиб Жамилат Эмюрбековас, бегIлара гIяхIси рапфасовщикли уррухъун Кудагула школализирадси Марьям МяхIяммадова, бегIлара гIяхIси защитниклизи халрариб КIишала школализирадси Аминат МяхIяммадова.
Чедибикибти кубокуначил, медальтачил, грамотабачил, арцличил шабагъатлабариб. Цаибил мер буцибси командалис 300 азир къуруш дедиб, кIиибил мер буцибсилис — 200 азир, хIябъибил мер буцибсилис — 150 азир. Мерани хIедуцибти командабасра шуцIа-шуцIали азир къуруш дедиб. Волейболла хIязлизиб устадешличил декIарбухъунти шел рурсилисра арц дедиб. БегIлара гIяхIси тренерлис 150 азир къуруш дедиб.
Гира ахъбурцнила шайчирти абзаназив лебтачивалра чедиикиб МяхIяммад Абакаров. Илини 24 килограммла гира гехIцIайна ахъбуциб. КIиибил мерличи вакIиб ил гира верхIцIайна ахъбуцибси Шамил МяхIяммадов. Гира шуцIанну гехIрайна ахъбуцибси Башир Сулайбанов хIябъибил мерличи вакIиб. Илдира медальтачил, грамотабачил, кубокуначил ва арцличил шабагъатлабариб.
Абзанала спонсор МикагIил Са­ли­хIовли командабас ва тренертас кондиционертира дедиб.
ЦIурхачибси цагьатIи майла байрам Дагъиста бурибти далайчибала ва делхъла устнала концертличил таманбиуб.

ХIяжимурад Ражабов