Дила пикрили, чис-биал­ра чеблалис арц, яра бирцуси мас де­дили, чебла чарбарахъес хIей­ру­ти анцIбукьуни бахълис тя­ништи сари. Чеблалис ар­ду­­хибти секIайс багьа хIе­лугули ту­кен­чиб­и, ба­зар­личиб бирцути ин­­жит­­бирути анцIбукьуни да­хъал дирар. Чула бухIнаб гъамти ту­хум­танира чеблалис арц са­сили чархIедарибти анцI­бу­кьу­ни къаршидиркули сари. Ил­­ди­гъунти анцI­бу­кьунани адам­тала ур­гар тIягIямагарти аги-кьяй­да кадилзахъули сари. Де­диб­­ти арц чардарахъес бя­кьун­ти адамти кабушибти анцI­бу­кьу­начилара халкьли ха­бур­ти дурули бирар.
Нуни пикрибариливан, ши­ма­­зиб чеблуми чархIедирути мур­­талра цабехI адамти саби. Рах­­ли пулан адамли хIела чеб­ла чархIебарили виалли, дир­ха­ла­ли­чил бурес вирар, илала гьа­рил ту­кейзир чеблуми дирар ва илди чар­дарес пикрилра викIули ахIен. Тяп илкьяйда, чеблумачиб чула яшав лушутира лебли биънира хIекьдеш саби.
Ил шайчиб, бирхаудиличил бурес рирус, илдигъунти адамтала юртлизиб сегъуналра баракат хIебирар. Илди чула гIямрулис чеблумауб кавлан.
Нуни буруси анцIбукь гьар­ли-марли Кубачиб бетаурси саби. Мурул-хьунул уршира саби­ра унра шилизибад Кубачи хIер­биэс бакIиб. Хьунул больница­лизир санитаркали рузулри, мурул кьис-кьутIла уста сайри. Жагали хIер­ка­бирулри.
Се багьана бетаур биалра, мурул держлизи ахъиб. Илдала хъу­либси баракат каберхур. Ле­рил­рара-сера тукентазир муруй чеб­луми дариб. Хьунул чидил тукейзи рухIнарухъалра хIела мура чебла леб или гьанбур­шулри. Илала чеблуми чар­д­ирес хьуна алапа биули ахIенри. Хъалибарг халкьла ургаб хIур­ма­тагарбирулри. ГIур зя­гIи­пикили мурул вебкIиб. Илала гIергъи хьунул гьарил тукейзи гьарракIили, мура сецад чебла лебал белгибариб.
«ХIуша набчила вайтIа пик­­ри­­мадикIудая, нуни мура чеб­­луми сеналра чардирис», — ри­кIулри ил гьарил тукен­чи­зи. ВебкIибси му­ра чеблуми хIялалдатес тукен­чиби кьа­булбиркули биалра, сари кьа­булриркули ахIенри. «ХIу­шани хIялалдатадалра чебла ахъес набчи хъарси саби, Че­вяхI­си ­багьандан сецад чебла лебал бурая», —рикIулри. Ца-кIел дусла духI­­нар илини лерилра чеблуми чардариб. Санитаркала алапа кайсули хIеррируси хьунул адамли лерилра чеб­луми черахъниличи адамти та­ма­шабирутири. Илала юртлизи баракат чарбиуб, адамтала ургаб хIурмат имцIабиуб, уршира халкьли дигиличил алавуциб. Челябкьлализир ил хьунул адам уршира сарира хIяжлизира рякьун, чус жагаси юртра тIаш­ба­тур, халкьла ургаб хIурмат-кьи­мат­­личил хIербирули саби.
Бурес чебиркур бусурман дин­­низиб чебла чарбарни дур­хъаси баркьудилизи хал­би­руси саби. Илкьяйда дурхъаси са­би, чеблаличи хIяжатхIейкили су­нела лебсиличи разили хIе­­рир­­ни­ра, дурхъаси саби де­бали хIяжатсилис чеблалис арц деднира. Чеблалис арцра Че­вяхI­си багьандан дедлугути сари, рахли чархIедаралра сунени хIя­лал­датес виэсли. Арцла вегIли хIялалдатурли виалра, чеблалис сасибсилис илди хIялалдирути ахIен, иличи чебла ахъес сеналра хъарси саби. Шагьид бебкIали вебкIибсила лерилра бунагьуначивад ЧевяхIси че­вурхули сай, чархIебарибси чеб­лаличивад Ил чевурхули ахIен.
«УрухкIеная чеблализирад! Чебла дугила пашмандешла ва дардла, хIерели мучлаагар­виъ­нила хьулчи саби», — илкьяйда белкIи саби дурхъаси Кьуръа хIя­дислизиб.
Чебла хIехъибси адамли бе­диб­­си садакьа кьабулбируси ахIен.
Чебла сайсухIели ил чарбарес нигет барес гIягIниси саби. Чебла чарбарес пикриикIуси адам балагь-кьадарла анцI­бу­кьу­­­на­зи­вад верцахъес багьандан Че­вяхI­­сини хасси къараул кал­тули сай.
Чар­хIе­барес пик­ри­барили чеб­ла са­сибси адам хъул­килизи ха­лируси сай.
Чебла агарси адам халкьла ур­гав дяхI ша­­ла­ли, уре­хи-урези агарли хIе­риэс ви­рар.

Муъминат Хаттаева