Нушала республика жявхIейчибадал кьуватчебти спортсментачибли машгьурси саби. Спортла декIар-декIарти журабазирти дагъистанлантала уми арагIебли дунъяличир тIинтIдиубти сари. Илдигъунти сархибдешунала дигIяндеш селизиб саби? ДигIяндеш – Дагъиста спортла хIял-тIабигIятлизир, сарира нушала дубурлантала даршдусмала гIядатуначил, илдани дуркIути гIямрула бетуцличил ва чедибдеш сархес гъираличил цIацIали дархдасунти.
Дагъистайзиб акIубти уршбала гIямрулизиб спортли декIарси мер бурцуси саби. Дубурла мер-мусаличиб акIубти дурхIнала саберхурдеш ва чIумадеш мурталра чихъли кьиматладирутири. БиштIати уршби кьакьурбазиб хIязтали биркьули, дуцI-тIяхIбикIули, мушулбашули халабиули саби. Спортла заланазибцун ахIен илди ахъси даражаличи абикахъес руркъути, хъулиб бегIтанира халатала хIурматбирахъес, илдала сархибдешуначи разибирахъес бурсибирути саби.
ДурхIни биштIахIейчибад низамличи биркахъни ва илди чула лерилра цIакьани пайдаладирахъес бурсибарни дебали мягIничебси саби. Буралли, биштIати уршби ва рурсби спортла школабази тренировкабачи башахъути саби. Замана арбашукад пагьмучебти тренертани илди къияндешуни ихъахъес, чисалра удихIебиркахъес бурсибиру ва машгьурти спортсменти бетарахъу.
Илала дурабадра, дубурлантани спортлизир дирахъути сархибдешуни лебилра республика пахрули бицIеси сабабра республикала халкьлис цIакьла ва чIумадешла лишанра сари.
Спортли адамти адуцалачебти бетарахъу, арати гIямру дуркIниличи жибиру. Ил кьялилизир дубурлантани дирахъути сархибдешунани чеалкIуси наслура уркIичеббирахъули, Дубуртар Улкала спортла тарихлизи сагати уми кадерхахъес гьуцIбирули саби.
ПатIимат Мирзаева
