Майла 15 ибил бархIи Дагъис­та халкьла поэт, Аминат ГIяб­дул­­манапова акIубси бар­хIи саби, ил ишдус 80 дус рирули сари. Ил­­ди 80 дусла духIнар А.ГIябдул­ма­на­повани бамсри хIебалули рузниличил дахъал сархибдешуни диахъуб. Илди сар­хибдешуни Аминат ГIябдулманаповала бузери дигнила, жавабкардешла ва нешла мез дигнила бикьруми сари.
Аминат ГIябдулманапова Дахадаевла районна Хъярбукла шилизир акIубси сари. Илала дурхIядеш къиянтири, сари шел дус риубхIели, неш ребкIибсири. Ил анцIбукьличила Аминатлизи чилилра бурули ахIенри, ил багьандан ил рахъхIи пикририкIусири, чина аррякьунсил сунела неш или. Лебилра илизи унраличибси шилизи цIедеш асес аррякьи сари или бикIулри. РахъхIи хIерли кариили калун Аминат ГIябдулманапова, амма сунела неш сеналра ляркьули ахIенри. ГIяхIцад замана бикибхIели ахирра-ахир А.ГIябдулманаповани сунела неш ребкI­ни­личила багьур ва дебали пашманриубсири, сунези чилилра селра хIеиб или. ГIур рахъхIи калун Аминат риштIаси рузира рикули, сарира нешла хIябличи рашули. Ил анцIбукь Аминат ГIябдулманаповани гьаннара гьанбиркахъули сари.
ГIур ил школализира рашес рехIрихьиб. Илар сарри илини цаэсти назмуртира лукIес рехIрихьибси. Илини сунела бегI гьалар делкIунти назмурти Сулайбан Рабадановлизи дедибтири, илини биалли илди газетализи кадяхъибтири. Иличи разириубли А.ГIябдулманапова назмурти лукIес даимриубсири.
Шагьарлизи ракIибхIели ил чумал машгьурти писатель- поэтличил тянишриубсири. Илди сабри ГIяхIмадхан Абу-Бакар, ХIябиб ГIялиев ва цархIилти. Илдани халаси кумек барибсири Аминат ГIябдулманапова машгьурси поэтесса ретаахъес багьандан. ХIябиб ГIялиевли илала «АхIерти адамти» бикIуси цаибси жуз дуракаиб. ГIяхIмадхан Абу-Бакарли биалли, Москвала М.Горькийла уличилси институтлизи карерхахъес кумекбарибсири. Ил карерхахъес диргалабулхъутира лебри, амма Аминат карерхур ва лебтасал­ра гIибратласи студентка ретаур. Илар ру­чIу­хIелира дахъал назмурти дел­кIун­тири А.ГIябдулманаповани ва газе­таби-жур­нал­тази кадяхъибтири. Къияси гьуни сабри Ами­нат ГIябдулманаповала, амма севан къиянси биалра ил машгьурси поэтесса ретаур.
ДелкIунти назмуртас, дураибти жузас пачалихъла чумал премияра касибтири. Масала, илдазирад цацадехIти гьандушалли, Р.ХIямзатовла уличилси премия (2014 ибил д.), «ЧердикIибти» бикIуси жуз урус мезли дуракаибхIели, Аминат ГIяб­дул­манапова «Филантроп» бикIуси премияла лауреат ретаурсири.
Гьанналис илини 67 жуз дураили сари.
Лебтанилра балуливан, А.ГIябдул­ма­на­по­вани дурхIнас хасдарили лукIути назмурти дахъал сари. Иличибли багьес вирар А.ГIябдулманаповас дурхIни секьяйда бигахъутил. Ил мурталра школабази, колледжунази, университетунази дурхIначил, студентуначил гьунираэс рашули рирар. Илар Аминат ГIябдулманаповани сунела назмурти дучIа, дурхIнас, студентунас насихIятуни, гIямруличила хабурти дурули дирар.
Нушала машгьурси поэтесса, Аминат ГIябдулманапова, сари акIубси бархIила байрамличил мубаракрирулра. Илис арадеш, гIеркъати гIямру, сархибдешуни ва талихI дулгулра.

Ханум ГIялиева