Ахъушала шилизибси халаси хIурмат сархибси хъалибарг саби Мирзаев МяхIяммадхIябиб Ялдаровичла ва Мирзаева Зубалжат ХIусейновала.
Илди хъайчикабиибхIейчирад ишдусла июльла 8-личиб 54 дус диркули сари. МяхIяммадхIябиб ва Зубалжат хIербирули саби дигиличил, хIурматличил, балгундешличил, цала цали хатир хIебуи. ХIябибли ва Зубалжатли авал урши-рурси абикьур, багьуди касахъиб, гIямрула дякьличи дураиб. Гьанна биалли илдачибад акIубтас гIяхIси бяркъ бедес, багьуди касахъес къайгъилизиб, кумекбикIули саби.
МалхIямси ва сабурла МяхIяммадхIябиб акIубси сай Ахъушала шилизибси хIурматла хъалибарглизив. Школа таманбарили гIергъи ил белчIуди даимбирули, шила хозяйствола институтлизи керхурсири. ГIяхIти кьиматуначил шила хозяйствола институт хъараахъурли, декIар-декIарти жавабла къуллукъуначив узули, хIялалси бузери бариб хъалибарг абикьес багьандан илини.
Сунела гIямрула рархкья Зубалжатла хIянчи бетерхахъесра МяхIяммадхIябиб мурталра кумеквикIули сай.
Зубалжат Мирзаева Ахъушала районнизиб машгьурси, халаси хIурматла ГIяндухъала насаблизирадси сари. Зубалжатла неш ГIябидат (бунагь-хатIа урдуцаб сунела) дахъал дусми Ахъушала шила Советлис бекIдеш дирули калунси, пасихIчерси, хIурматчерси хьунул адам сарри.
Зубалжатли 1970 ибил дуслизиб гIяхIти кьиматуначил Ахъушала цаибил урга даражала школа таманбарили, МяхIячкъалализибси Дагъиста пачалихъла университетлизи карерхур. 1975 ибил дуслизиб ДГУ-ла историяла факультет таманбарили, Семгамахьила урга даражала школализиб сунела бузерила гьуни бехIбихьиб. Ил школализир Зубалжатли историяла дурсри кадирхьули рузули калун, гьаланачи мугIяллимли, гIур завучли, 1993 ибил дус бикайчи калун.
2010-ибил дусла январьла 20-личиб Ахъушала шилизиб ДР-ла ГI.Тахо-Годила уличилси музейла филиал абхьибсири. ИлхIейчирад Зубалжат ХIусейновна ил историко-краеведческий музейла директорли рузули сари. Зубалжат музей гьалабяхI башахъес, иларти секIал имцIадикIахъули, детурхути шадлихъунира дахъдикIахъес къайгъиличил рузули сари. Музейлизир лерилра байрумтас, машгьурти тарихунас, ЧебяхIси ВатIа дявила бутIакьянчибала хIурматлис, пачалихъла хIянчизартас, поэтунас, писательтас, культурала хIянчизартас, художникунас, спортсментас ва бахъал цархIилтира хIурматла адамтас хасдарибти выставкаби, шадлихъуни, гьунибаъниби детурхули сари.
Музейла директорли дахъал цархIилти организациябачил ва учреждениебачил бархбас бузахъули сари. Культурала управлениела хIянчизартачил дарх дахъал шадлихъуни дурадуркIули дирар музейлизир. Ила бахъал гIяхIли башули саби Ахъушала шилизибад, алавчарти шимазибад, шагьуртазибад ва цархIилтира мер-мусаличибад. Илар чедаэс вирар адамтала, шимала, тIабигIятла суратуни. Илкьяйдали, чедаэс вирар гьалабла манзиллизир дузахъули калунти тIалхIяна, миллатла палтар, кIунби ва гIурра дахъал секIал. Чеабиуси наслулизи хъумхIертахъес, гьалабла манзиллизир гIямру сегъунти дирутирил, секьяйдали хIербирули, яшавбирули буилил нушала хала бегIтани.
Музейла директор Зубалжат Мирзаевани музейкад экскурсия биралли, гьарил шила, махьурбала халкьли гьалабла замана дузахъути сегъунти гIядатуни дуибтирил бурули сари.
Музей абхьибхIейчирад илар детурхути шадлихъуназир, выставкабазир бутIакьядеш дирули сари МяхIячкъалализибад башути жавабла хIянчизартани, художникунани, археологунани, районна шимазибад ва алавчарти районтазибад башути гIяхIлани.
Зубалжат Мирзаева ДР-ла Правительствола, ДР-ла культурала Министерствола, «Россия – дила тарих» бикIуси паркла, «Ахъушала район» МО-ла администрацияла, ДР-ла Миллатла политикала Министерствола, культурала ва туризмала управлениела, Ахъушала шила администрацияла шайзирад чумал ХIурматла Грамоталичил, Баркаллала кагъуртачил, Дипломтачил ва ДАССР — 100 дус биънила хIурматлис медальличил, Грамоталичил шабагъатларарили сари. ГIурра лер музейлис шабагъатладарибти, Москвализирад дедибти «Знамя Мира» бикIуси, «ООН в России: 70 лет» ибси Программа хIясибли, ЮНЕСКО-ла даршудешла культурала институтла ва «Восточный Базар Тюбетейка» бикIуси халкьани-ургабси культурала фестивальла шайзирад дедибти Дипломти.
Майла 15-личиб — хъалибаргла халкьани-ургабси БархIи, майла 18-личиб биалли — халкьани-ургабси музейтала БархIи дурадуркIути сари. Илди байрумтачилра Зубалжат ва МяхIяммадхIябиб Миразаевхъали мубаракбирулра.
ХIушала гIямрулизир ва бузерилизир сархибдешуни, чархлизиб арадеш имцIадикIули, хIушала дигутани разидирули хIердиэс кьадарбиаб!
С.ГIябдуллаева
