Халкьла гIяртистка Зульфия Ильясовани дургъбала бутIакьянчи Муса Мусаевличил ну тянишрарира. Ишди бурхIназив ил 102 дус виубли сай.
Зульфия Ильясова «Чедибдешла кумекчиби» бикIуси саби гIяхъулатала цахIнабикла вакил сарливан, дургъбала бутIакьянчибачил илини бархбас бузахъули сари. Гьариллис хIяжатси кумекра гIеббахъес ил къайгъилизир сари. Ишди бурхIназир ну илини тамашала адамличил тянишрарира. ЧебяхIси Чедибдеш сархибхIейчирад 81 дус дикили сари, амма итди кахти бархIи-дугилис бикьрили беутаурти гьаннара дунъяличиб мицIирли лебал. Нушала хIукуматлира илдала халаси хIурмат бирули саби ва гьарра шайчиб гIеббурцули саби.
Муса Мусаев Ахъушала районна БурхIимякьла шилизив акIубси сай. Илала гIямрула гьуни дебали тамашаласи саби. Хабарагарли дургъби дехIдихьибси манзиллизиб илала кIел узи дявтази арбукибтири. Илини 1942 ибил дуслизиб ца урши илав алхи сай ибси кагъар бегIтачи бакIибсири или бурули сай. КIиэсил илала узи Кавказла оборонализив душмайчил ургъули калунсири. Илав вяхъибхIели, кьяш чеббяхъили, гIяхIцад замана госпитальлизив ил калунсири. Муса Мусаевла кIиэсилра узи сагъхIейубли илав илхи сай. Узбала жан кераснилис душмайс чеббицIес или гьирвикIуси, дусмас виштIаси, Муса чуйнара дергълизи арукахъес ибси тиладиличил военкоматлизи вякьунсири. Ахирра ахир, дусми имцIадарили ил дявтази вархьиб. Каснодарла крайлизив ил калунсири. 1943 ибил дуслизив декIли вяхъибси Муса гIур дявлизи вархьибси ахIенри. Гьанна биалли, Муса Мусаевлис республикала руководстволи гьарра шайчиб хIяжатси кумек гIеббиахъули саби. Сулейман Керимовли шел миллион къуруш арцла гиб илира илини бурули сай. Чедибдешла байрамлисра депутатунани, шагьарла бекIли сунес арц дедлугниличила, амма илди сунесцун дихIхIедихIниличила илини бурули сай. ЗягIипти адамтас, интернатуназибти дурхIнас, мижитунази илини арц дурхьули сай. Халаси баркалла балахъулра Муса Мусаевлис илгъуна мяхIничебси анцIбукь дураберкIнилис.
Даргала ва Дагъиста
Багьа бакIахъиб гъабза
Россияла Кавказла
Пахру ветаурри хIу
ХIела чевяхIдеш бурес
Гъайбухъун иш гIяламра
ХIела гьунарти дурес
ХIядурли сарра нура.
Хабарлари, хабарла
Хамбарибси даргала
Дубуртазив акIубси
Душмантас чегахъибси.
Гъабзари гъал бецIливан
Душма хъянтIа айтIунси
Дурхъал Муса хIела у
Дунъяличиб айтIунси.
ВатIан багьандан хIуни
ГIязабти чекасири
Гитлерла гъармукаби
Чумра гIязабберкIири.
Ил дурхъаси чедиблеш
Нушачи баахъири
Халкьлис азадти гIямру
ХIуни пешкешдарири.
Аминат ГIябдулманапова, Дагъиста халкьла поэт
