Дагъистайзирадси фельдшер Жайран Ибрагьимова Ярагиевнани кардиологиялизирти хIянчира дарили, рархкьябас хIерудира гIеббаахъили, дявила хасси балбуцлизир бутIакьяндеш даресра бажардириркули сари.
«ГIямрули илкьяйдли кьадарбиуб», — рикIес рирар ил. Амма, уршилизирад ва муруйзирад мяхIрумриубси илини, сунела децI-шишимтачи хIерхIеили, цархIилтас кумекбирес, илдала гIямру дерцахъес цIакьани дургули сари. «Къалабаси кумек»-ла ва кардиологияла отделениела фельдшер, 1991 ибил дусличирад профсоюзла член сарси Ж.ибрагьимовала кьисмат халкьла фронтла хьулчили бетаурли саби. Ил хъалибарглизир цайли цаси медицинала хIянчизар сари. 8 дус гьалав илала урши алхунсири, гIур хIябал дус дикибхIели – мурул. Гьанна Жайран Ибрагьимовани рурси арилкьули сари. Къияндешунани биалли, ил мутIигIхIеракIахъибну, гьатIиралра дебшларариб.
«Ну хIянчи агарли руэс хIерирус. Медицина – дила дунъя саби», — бурули сари макьалала игитли.
Илала бузерила гьуниличила гъайикIалли, Жайран Ярагиевна, Каспийскла медучилище таманбарибхIели, 30 дус Хасавюртла дурхIни биркьахъуси Юртлизир рузули калун, 8 дус – центральная больницализир. Гьанна фельдшер Ж.Ибрагьимова цазаманализир кIел мерличир рузули сари – шагьарла цаибси больницализир кардиологияла отделениелизир ва «къалабаси кумек»-ла станциялизир. Илцад хIянчира бекIдирули, илини жамигIятла гIямрулизирра жигарла бутIакьяндеш дирес замана бургули сари. Жайран Ибрагьимова 1991 ибил дуслизир профсоюзлизи карерхурсири, гьаннара илис ил организация жамигIятла гIямрулизир бутIакьяндеш дарес имканбикIахъуси гIяхIси гьаликI саби. Фельдшерли волейболла шайчирти декIар-декIарти абзаназир, концертуначир, спартакиадабазир бутIакьяндеш дирули рирар.
«Профсоюз коллективлис дебали хIяжатси саби. Ил нушала цахIнабси баркьудира саби», — буриб Ж.Ибрагьимовани.
Дявила хасси балбуц бехIбихьибхIели, илала уркIи ил бетурхуси мер-мусаличи гьуцIбикIулри. Амма хъалибаргла масъултани ил итмаданал ила рукьяхъес имканхIебакIахъиб.
«ИлхIели нуни аргъира: эгер ну ила рукьес хIерирули риасли, хIебиалли, барх цархIилтира аркис», — бурули сари илини.
Дагъиста рурибси гIяртистка Рукьият Сатыбаловачил барх илини «Солдатлис – посылка» бикIуси балбуц бузесаиб. Гьайгьайрагу, ил гIеббуциб профсоюзлира. Социальный сетанала кумекличил ил баркьудиличил бархбикиб бархкьябира – медицинала хIянчизарти. Бузерила гIядатлати бурхIни саби-гIяхIъулати тухтуртала гIяхIбаркьла хIяракатличил чедицIиб. Илдани дявила хасси балбуц бетурхуси мер-мусаличи декIар-декIарти секIал дихулри: муридешуни, бургъанти дигIянбикахъес хасдарибти (маскировочные) сетани, хандакьуназир пайдаладирути шямани, берк-бержла цархIилти продуктуни. БегIла гIергъити архIябала замана илдани бургъантас хинкIира дархли дарили, илди разибариб.
СВО-ла бургъанти гIеббурцни багьандан, Жайран Ибрагьимова 2023 ибил дуслизир «Украинала миллатчибас къаршидеш дирули дурабуркIуси дявила хасси балбуцлизир бутIакьяндеш дарни багьандан» бикIуси медальличил шабагъатларариб.
Больницализиб иличил барх бузути бархкьябанира ил кумекличил бургъантачи рашниличила балули, гIягIниси замана илала дежурствоби ва сменаби дарсдарес къайгъибиру. Илдани дарх посылкабира цаладирхъули бирар. ЗягIиптира арабирули, бургъантасра кумекбирес Ж.Ибрагьимова румсули ахIен. ХIера, илгъуна сари гьарли-марси ВатIайчи дигичерси, илала асилси рурси.
ПатIимат ГIимранова
