Март баз хIебла бехI­бихьуд саби или гьанбир­куси­ри. Школабазир каникулти гиб­­хIели, биштIатира арбукили ши­­лизи бегIтачи шадир ря­кьун­ра.
Ил бархIил, мартла 27-личир, дугели сягIят ве­цIал хIедикили лерай, заб дехI­ди­хьиб. Забла кIунтIри ванзаличи кахIегахъес кьасбарили бургъусигъуна халаси дягIра багьарбиуб. Тамашала аргъ сабри. ТIабигIят селичи-биалра дебали гьим­букIили саби или гьанбикеслири. ХутI­ла шалуби дягIла цаэсил гьигьличил ди­шахъун, телефонтала бархбас (связь) бе­тахъиб. Ду­ги-хIери багьлахIедирути дягI-забли гьарил хозяйст­волис зарулти ди­­рулри: цацабехIтала хъулрала хъулчри ду­­кIулри, цархIилтала юртла бяхIяназирад, ул­кьайтазирад шин дашулри. Шимазирти гьун­дури хIуркIбани гъярдарилри, ил гьана­гарси балагьли чи-дигара урухвареслири.
Амма, хутIла шала жу­мягI­цадхIи бетахъибти, хIуку­матли гьаннара чучи газ ахIе­ба­ахъибти, бурес агарси халаси дягIлира, тIашбизагарли ургьути заблира зарулти дарибти дубурланти ряхIятлири, «Аллагьла кьадурти сари», «УркIецIи халал Аллагьли вайтIа хIедатишагу» ибти дугьби сарри илдазирад иргъути. Гьанбикесли саби, мурталра илдигъунти бехIемцIуни детарули бурсикабиубти бургар или, ахIен, дила гIямрулизиб нуни бегI гьалаб сабри илгъуна чебиуси. ТIабигIятла кахси бе­хIемцI­лизибад урехиагарти ду­бурлантала сабур, Аллагьличи бирхауди сарри наб тамашадизурти.
Илдигъунти къияндешуни чедакIибхIели, хIукуматла кумекуначи хIерли кахIебиили, ца някъла хункIлизир шелра тIул кьяйдали, шанти цабиуб. ДягIли кадикахъибти тIулри тIашдатес кумекбикIули, заякадиубти гьундури къулайдирули мурул адамти бузесбииб. Илдала баркьудлумани гьатIира якьиндиахъуб дубурлантала ахъси гьав, яхI, уркIбала чIумадеш ва цадеш.
Илди анцIбукьуназиб, районна бекI Арсен МяхIям­ма­довла хъарбаркь хIясибли, РЭС-ла хIянчизартала лерил бригадаби дузулри. РЭС-ла хIянчизарти галгуби кадикили, шиферти чегили, къябдердибти хутIла гьимирти къуйладирнила бузерилизи ахъилри.
Гьундури къулайдирутасра хIянчи дахъалри. Мартла 28-личирад дехIдихьили гьаннара илди хIянчи даимдарили сари.
Акьудеш агарли бузути РЭС-ла хIян­чизартани Мурегала, МахIаргила, Бурдекила, Мургукла шимази хутI сагадан баахъиб. УбяхI МулебкIила шилизи хутI баахъесра бамсриаагарли бузулри илди. Амма кадикибти тIулри дахъ-дахъал диънили ва илди кадалтути мераначи машинаби хIедашули биънили хIянчира духъяндилтIахъулри.
Заб даралра, дяхIи баралра итира урехила мер саби «ХIурхъила бахI»-ларти шурмала ургабад барибси гьуни. Иш гьакIлисра иларад гьундурачи къаркъуби кадикилри. ХIянчизартани техникаличил къаркъубазибад гьуни умубариб. Ки­чи­хIямрила шила дахъал хъалибаргуни шин агарли калири.
Районна администрацияла хIянчизарти ва нушала редакцияла рурсби, Арсен МяхIяммадовла хъарбаркь хIясибли лебил шимази биулри, чинаб сегъуна кумек хIяжатлил хIясиббирулри.
Арсен ГIялишейховичли къияйзибикибтас диубсигъуна кумек бирехIе или балахъули сай. Гьанна бакIили саби районна администрацияли халкьличилти бархбасуни уржахъуси замана. Дирхулра, юртани дукькадуунти хъалибаргунас хIукуматлира кумекуни дирниличи.
Аргъ сегъуна-биалра, гьав ахъти дубурланти ЧевяхIси Аллагьли гIеббурцаб!

Басират ХIяжимурадова