ТIабигIятла гьа­на­гар­ти анцI­бу­кьу­на­ни диахъуб­ти асур­тачила балахъули саби де­кIар-декIарти шимазибад.
Апрельла 1-личибал Хайдакьла районна бекI Запир ХIя­­­сановли муниципалитетлизир къиянти аги-кьяйдаличила ба­гьа­хъурсири. Илала хъарбаркь хIя­сибли, къалабати масъултазиб бузуси комиссияра акIахъуб. Ил бусягIятла заманара шимазир аргъ-бархIила балагьли дарибти асурти агардирнилизиб бузули са­би. Специалистуни мерличи бя­кьи, барибси заралла кьадар кабилзахъули, ва адамтас кумек гIеббиахъули саби.
Дарибти дахъал заб-маркали Хайдакьла районнизир гIянжи ва къаркъуби хIусдухънила гIяхI­цад анцIбукьуни диахъуб, гьундури ва гумурби заядариб.
«Къаякентла ва Хайдакьла районтала дазуличир гIянжи-къаркъа хIусдухъи Янгъикент, Ту­менлер, Сагаси Барша, Малла­кент, Чумли ва ХIулли шимазибад адамти башуси хан гьуни гIекIиб. Гьанна Мажалисла ши­лизивад алаввиубли вашес чев­къули саби. Янгъикентла шилизир хIя­бал гуми зараллизи дикиб. Илди­гъунти къиянти аги-кьяйда диалра, шила духIнарад машинаби дашес гьачамлис имкан леб», — багьахъур муниципалитетла бекI Запир ХIясановли.
Илала гъай хIясибли, хIус­булхъ бетаурси мерличи Хайдакьла ва Къаякентла районтазирад хасти техника дархьили саби. Илдала кумекличил гьуни умубирнила, ибхьнила хIянчи детурхули сари.
Апрельла 5-личиб биалли, Хай­дакьла районна Хъирхъила ши­лизиб гIянжи-къаркъа хIус­ду­хъи адамти хIербируси юрт тамай заябариб, илкьяйдали кIел-гьа­тIи юртлисра зарал биахъуб. Се­пайда, букьбуунси юртлизир хIер­рируси хьунул адам беб­кIа­ли раргиб.
Хайдакьла районна администрацияла пресс-служба