ТIабигIятла шайзирад гьар замана халкьличи, мицIирагличи, ери-юртличи, гьундурачи балагь-кьадар хьурадирули дирар. Илдигъунти къияндешуни чедуркъубхIели, бегI гьалаб адамтас кумеклис, асурти черардукес музабулхъули саби хутIла, газла, гьундури къулайси тяхIярличи дуршути управлениебала, организациябала хIянчизарти.
Ишди бурхIназибра мартла ахирличир, лебилра Дагъистайзир кьяйдали, Ахъушала районнизирра дахъал заб ва дяхIи дарили, шурми, къаркъуби, семгала гIянжила кьалуби хIусдухъи, шин чедидерхурли ва семс духIнадухъи, дахъал зарулти детаур. ХутIла гьимирти къябдердили, гIяхIцад адамти шала агарли калун. Газла турбаби ва гьундури заядиуб, халкьлис дахъал къияндешуни акIуб. БяхIяназирти, къиянти мер-мусаличирти ахъти тIулрачи абицIули, чула арадешлис урехи лебкъира, хасти хIянчизартани чучи хъарси хIянчи бирулри, гьимирти диршулри, газла турбаби ункъдирулри.
Заблира-дяхIилира ургьесбиибмадан бехIбихьили гьанна бикайчира жжигарчебли бузули саби Ахъушала районна кIиибил ДЭП-ла, Лавашала районна Ахъушабси РЭС-ла отделениела, «Управление благоустройства и технического обеспечения» организацияла ва «Газпром газораспределение Дагестан» ООО-ла хIянчизарти.
Шимазиб гьаннара хIебацIили халаси дяхIи леб, трактортачил адамтас ва мицIираг дашахъес гьундури умудирули сари. Ахъушала шила духIнар ва алавчарти махьурбазир гIянжи-къаркъа хIусдухъи, гьундури кIапIдариб. Илдира трактортази умударахъили, къулайси тяхIярличи дуршули сари.
Халкьлис къияндикибси замана, дуги-хIери хIеили, цалис цали кумекбирути ва манпагIятбирути адамтас баркалла багьахъес дигулра. Чекабизурли бузути, илди чедир гьандушибти управлениебала жавабла хIянчизартас чула гьамадли ахIенси хIянчилизир сархибдешуни имцIадикIаб, гьамаддешуни диаб!
Илкьяйдали баркаллаличи лайикьбикили саби илди лерилра хIянчи детерхахъес багьандан хIерудибирути Ахъушала районна бекI МяхIяч ГIябдулкаримов, Ахъушала шила бекI Набигуллагь ГIябдулвагьабов ва лерилра шимала бургира.
Кьудратла ВегIли лебтасалра баракат хьурабараб ва гIяхIдешуни кьадардараб!
Сабият ГIябдуллаева
