«Ахъушала район» МО-ла администрацияла адамти кьабулбируси жаняхIлизир дахъал дусмазир рузули сари ГIябдулвагьабова ПатIимат МяхIяммадкамиловна.
Ишди бурхIназир районна бекIла заместитель Эльвира ХIясанхIусейновани буриб: «ПатIиматличила белкIес лайикьли саби. Жавабкардешличил черетаили рузули, сунела бузерила гьуни даимбируси хIянчизар сари ил».
ПатIимат МяхIяммадкамиловна, 1999 ибил дуслизиб Ахъушала урга даражала цаибил школа таманбарили, Дагъиста пачалихъла университетлизи карерхурсири. Университетла филологияла факультетра таманбарили, сунела бузерила гьуни бехIбихьиб.
ПатIимат вецIал дус рузули калун Ахъушала шила Советла администрациялизир, авал дус хIянчи бариб Ахъушала урга даражала хIябъибил школализир урус мезла ва литературала дурсри кадирхьули. 2015 ибил дусличирад ПатIимат рузули сари Ахъушала район» МО-ла администрациялизир пресс-секретарьла къуллукъличир.
Районна администрациялизи челукьути суалтачил бахъал адамти дугьабилзули бирар. ДяхI шаласи ПатIимат гьариллизи малхIямли гъайрикIули, илдала къуллукъ бетерхахъес бажардилизир рирар. Районна администрацияла жаняхIлизир рузуси хIянчизар дебали чекаризурли рузес гIягIниси сари. Илдигъунти тIалабуни мардирули, сунечи хъарси хIянчи бетурхахъули сари ПатIиматли. Илини дахъал дусмазиб хIялалси хIянчи барни багьандан, байрумтала замана чумал ХIурматла Грамоталичил шабагъатларарили сари. Илди-ургар лер: Дагъистан Республикала БекI Сергей Меликовла шайзибад, ДР-ла «Совет муниципальных образований»-ла шайзирад дедибти Грамотаби, «Ахъушала район» МО-ла администрацияла шайзирад дедибти ХIурматла Грамотаби, «Мы творим будущее. Исторический опыт и современные проблемы военной безопасности России» бикIуси ЧебяхIси Чедибдеш 80 дус биънилис хасбарили, Ахъушала районнизиб дураберкIибси лебил Россияла гIилмула-практикала мажлис бетерхахъес кумекбарнилис бедибси Баркаллала кагъарра ва цархIилтира шабагъатуни.
ПатIимат халараибси сари Ахъушала шилизиб хIурмат сархибси хъалибарглизир. ПатIиматла дудеш МяхIяммадкамил 12 дус Ахъушала шила Советлис бекIдеш дирули калунсири ва неш Зубайдатличил хIябал урши-рурси абикьур, гIяхIси бяркъра бедили, багьудира касахъили. Гьанна ПатIиматлира сунела гIямрула вархкья ХIяжимурадличил барх абилкьули сари хIябал урши-рурси. КIелра халатигъунти урши, чебяхIси даражала багьуди кайсули, пединститутлизиб, физкультурала факультетлизиб бучIули саби, рурси цаибил класслизи рашули сари.
С.ГIябдуллаева
