2024 ибил дусла декабрьла бехI­би­хьуд­ли­зиб Юсуп МяхIям­мад­са­ла­мо­вич Расуловли ва Багьаут­дин ГIябдулхIямидович ГIя­лиев­ли саби гIяхIъулали СВО-ла дазуличи бургъес ар­бу­кьес пикрибарибсири. Ил­да­ни Россияла оборонала Ми­нис­терстволичил вягIдурти ди­гьун. КIелра Лавашала район­на Лавашала шилизиб акIуб­ти ва халабаибти саби. Янсав-хIяр­хIяла тIем жявли ба­гьурти – 1999 ибил дусла ав­густ­­ли­чир Дагъистайзир ка­ди­кибти дявила анцI­букьуна­ла бу­тIакьянчиби, ветеранти са­би.
СВО бетурхуси мер-му­са­ли­чи арбукьес гьалаб, илди ре­дакциялизи гьаббакIибтири, нушала жагаси ихтилат бетаурсири. ИтхIели СВО-ла дазу­ли­чирти хIякьикьатличила баянти нушачи дархьахъес вягIдаладиубтири. Нушала бургъантачила гьарил секIал дагьес газета бучIантас мурталра дигахъули саби.
Илди вягIдалис къяна­хIе­­биуб. 2025 ибил дусла ян­­варьла 27-личир нушачи дархьибти суратуназиб миъ­бяр­гIибси Курскла областьла ванзара, гьужумличи букьес хIядурбиубти, хасти палтарли бегIбиубти ва ярагълабиубти бургъантира чебиулра. ИлхIели нушани аргъира, бургъантала къуллукъ гьамадли ахIенси биъни, амма къияндешуначи хIерхIеили, илди ВатIа гьалабси чебла асилдешличил ахъес бажардибирни.
Юсуплира Багьаутдиннира редакцияличилси бархбас къяб­­хIебердахъиб, чула гъамтачил дарх нушара илди ара-сагъли чарбухъахъес дулгутири.
Гьалавван нушала редакциялизи, гьунгелтачил Юсуп Мя­хIяммадсаламович гьав­ва­кIиб, нушани аргъибти кам-гьа­мти баянти дурулра. Нуни пик­рибариливан, СВО-ла мер-мусаличиб калунтани, чучи чедуркъибтачила, дахъал гъай дирули ахIен.
КIелра нушала бургъанти чула юлдашуначил барх ца баз дергъличи бурсидеш кайсули, хIядурбирули калири. ГIур илди Курскла областьлизибси СВО-ла дазуличи бархьилри.
Украиналантас гьачам буцибси мер бархьбатес дигули ахIенри. Илар нушала бургъантачи Европала бегI­лара чер­дикIибти ярагъ дяхI­чиаилри.
— Нуша кIелра штурмови­куни сарри. Илав верцес тя­хIяр аги, бекIла чедир, зак цIударбарили, «баба-яга», «камикадзе» бикIути дронти урцулри», — бурулри Юсупли.
— УруххIекIирав? — ургарухъунра ну илала гъайлис.
— Урехи аги, ишарад ар­кьу­­хIелил, нушани кIилилра чебур­­къибси се-дигара че­кай­сехIе или пикрибарибсири. Гьар бархIи улхути жагьилтачи­ла иргъухIели, ишар, хъулир ка­­лес нуша дирули ахIенри. Ну­­шани гIямру чедаилри, дургъби сегъунти сарил балулри, кIелра 1999 ибил дуслизир Да­­гъистайзир кадикибти дявила анцIбукьунала ветеранти сарра. Украинала дазуличиб душманти чебаэс агара, балагь бихути минаби, гьарахъларад иртути тупи, ракетаби, бекIла чедир ласдикIути дронти сарри къаршикарти. Гьужумличи ар­кьухIели, илдазивад дигIя­ни­кес тяхIяр агара.
— Се барес гIягI­нили илав верцес ба­гьандан? — хьар­биул­ра нуни.
— Чина дигIяни­кал­ра, адам­ла чархла ванадеш хIя­сиб­­ли, хасти гIягI­ниахълумани, дрон­тани хIу левси мер бур­гу.

Бургъантас дугила замана, саби лебси мер хIебагьахъес ба­гьандан, мурхьли ванзала уди дигIянбикес, гIягIниси саби ва­на­деш дурахIебухъахъес. Гьужумличи ар­кьу­хIели биалли, гIягIниси тяхIярли ве­гIи­эс чебиркур, хIярхIуби чехIедалтути пал­­тар чегьи.

Цаибси гьужумличи аркьухIели, нуша сунечи кадиибси БТР, «камикадзе» дрон чегили, баргбердиб. Детахълуми диуб. Дергълизир бегIлара чекасес къиянти, юлдашунала чедицIахъес хIейрути детахълуми сари. Илав Багьаутдин кьяшлизивад вяхъиб. Нуша, чилалра кумек агарли, урехи агарси мерличи дурадухъунра. Багьаутдин Санкт-Петербурглизи госпитальлизи арукиб. Илис илар чумал операция дариб. Гьанна ил аравиубли сай.
Юсуп ихтилатикIухIели, Никольское ши азадбалтахъули ургъули калниличилара гьанбушиб.
Россияла оборонала Министерствола сагати хабуртазиб, 2025 ибил дусла февральла 27-личиб халаси гужличилси гьужумличил, Никольское ши азадбатахъниличила бурули саби. Россияла гIярмияли лерилра цIакьани дяхIчиаили, душман гIелавяхI дянгаиб. Ил халаси чедибдеш сабри. Ил чедибдешлизи сунела пай кабихьили сай Юсуп МяхIяммадсаламовичлира. Никольское азадбалтахъуси гьужумлизив Юсупра кьяшлизивад вяхъиб.
— Вяхъили, юлдашунас кумекбарес хIейрухIели, бургъутас диргалахIелхъули, вегIла жан дерцахъес къайгъибарес гIягI­ни­ли саби, — викIулри Юсуп МяхIям­мад­саламович ихтилатлизив.
Ил гьаланачи, цаибси кумек гIеб­биахъуси мерличи, сайцун вашули дуравхъун, илавад машиналичив тухтурти лебси мерличи — Рилсклизи, кIинайс — Москвала Вишнёвскийла уличилси госпитальлизи арукиб. Илав февральла 18-личивад апрельла 14-личи бикайчи арадеш къулайбирули калун. ГIур илавад хъули вархьиб. Гьанна сагъиубли сай. РФ-ла оборонала Министерстволичил бигьунси вягIда гьанналис таманбиубли ахIен, июльла 1-личив гIуррара СВО-лизи укьес хIядурикIули сай.
Илдигъунти гIядатла гъубзначи мурталра хъарихъусири нушала улка, гьаннара илкьяйда саби. Гьарилла кьисматра чула някъбазиб саби. СССР-ла халкьлис бахъ гIяхIбизурси «ХIебла вецIну верхIра манзил» бикIуси фильмлизиб «Зимла манзил» (мгновение) бикIуси далай лебси саби. ГIямру шалгIердулхъули сари гьарил зимла манзилли цабехIтас гъабзадеш, цархIилтас — усалдеш дуртIули. ЧумдехI дургъби даралра, дунъяла адамтира духубирули ахIен. Дунъя акIубла илала тарих дявтачил бархбаси саби. Дургъби тIашдизахъес хьулбикIули, бургъес аркьути, лебилра ЧевяхIси Аллагьли ахIерабараб.

ХIялимат Рабаданова