«ИИ»-лис (искусственный интеллектлис) гIергъиси замана халаси пикри бяхIчииули саби. Ца шайчибад ил чилилра хIерзибси секIал саби, гIилмуличил ва техникаличил бархбасунси. Гьалабла замана адамтани дусми пайдаладирули диалри, машинабани чумал минутла духIнар дахъал масъулти арзес дирули сари.
Лебилра дунъяличиб ил пайдалабирули саби. «ИИ» имцIали информатикаличил бархбаси саби. ГIядатла адамла бекIлизи кадарцахъес хIейрути баянти компьютерлизи духIнадуцес имканбикIули саби.
«ИИ» декIар-декIарти кьялубазиб пайдалабирули саби:
1. Медицинализиб дебали пайдаласи секIал саби ил. ЗягIиптала излуми дархьли белгидарахъес багалабирули саби. Гьалар излуми дархьли кадизахъес хIебалнили, бахъал адамти бубкIули бири.
2.Се-биалра бирцухIели ва исухIели «ИИ» пайдалабирули саби. Вачар-чакарла бархбасуни дузахъухIели, бахъал шилтахъчиби-макрукьяби дакIубулхъули бирар. Илдазибад берцуди барахъесра «ИИ»-ли кумекбирули саби.
3.Сагати машинаби ва илдала гIягIниахълуми дирни хайриласи баркьуди саби. Заводуназир ва фабрикабазир илди дирухIели, ялчи-адамтас илар дахъал сягIятуни деркIес гIягIнисири, гьанна биалли машинабани ил масъала итмадан ирзули саби.
4.Багьудилизибра «ИИ» пайдалабирули саби. БучIантас программаби ва белчIудила кабизуни кадилзахъули сари. ДурхIнас кьиматуни кадатесра «ИИ» пайдалабирули саби. Илкьяйдали дахъал цархIилти анцIбукьуназибра ил багалабирули саби. «ИИ»-ли адамла гIямру гьамаддирахъули сари ва къиянти масъулти арзахъес кумекли бетарули саби.
«ИИ»-ла халаси гIяхIдеш биалра, илини бихуси урехиличилара пикриухъес гIягIнили саби. Машинаби ва компьютерти дузахъниличил барх, искусственный интеллектли адамла хIянчи кебасес бирули саби, иличибли хIянчи агарти адамти бахъбиур. Ил анцIбукьра хIисаблизи касес чебиркур.
Дила пикрили, компьютер яра машина адам кьяйда пикрибикIес хIебирар. ГIе, бархьси саби, «ИИ» — цIакьси гIягIниахъала саби, суненира адамла хIянчи гьамаддирахъуси, нушала гIямру шалатили, гIяхIтили, талихIчертили детаахъес кумекбируси, амма иличил мяхIкамли вяшикIес гIягIнили саби. «ИИ»-ли адамли кьяйда, социальный бяхIчибизла, адаб-хIяялашалти, экономикалашалти масъулти арзес хIебирар. Нушани ахъбуцибси темала черкад хIушалара пикруми аргъес дигахъира.
Карина БяхIмудова, ДГУ-ла филологияла факультетла журналистикала отделениела магистратурала 1-ибил курсла студентка
