Нушала Дагъиста жагьилти гьарил секIайзиб гьалабяхI арбякьунти, багьудлумачилти, спортлизиб цалисалра гIелахIебулхъути саби. ГIергъити дусмазиб чебиуливан, камли ахIен школализиб бучIантани имтихIянти дедлугухIели даршалра балл касили, улкализиб бархли Дагъистан гIяхIлашал машгьурбирути.
Амма, вайкьасла адамтани, гIямрулизир бара чIумали гунзри кацIибти нушала жагьилтачи асарбарес, илди, чула уряхIти мурадуни сархес багьандан, пайдалабарес далдурцути авара дебали дахъдаили сари. Къачагъунани алавчарти аги-кьяйдализибад гьарил баркьуди нушагIебли къаршили каэсти тяхIурти пикридирули сари. Чумра илдигъунти анцIбукь кадикиб гIергъити дусмазирра. ГьатIира вайнукьаби жигарчеббиубли саби Украинала мер-мусаличиб нушала улкали дявила хасси балбуц дурабуркIес бехIбихьибхIели. Миллатчибани социальный сетани, Интернетла сурсатуни жигарчерли пайдаладирули, жагьилти сегъунти-дигара шикьатIала далдуцили, биргIябиргес кьасбирули саби.
Украинала каналтани гьанна чуйна-сабил нушала жагьилтала бурги жургъдухъахъес къайгъибирули саби – аэропортличила къяналати багьахъниби тIинтIдирниличил дархдасунти аги-кьяйда диубтири гьанналаурра. ИтхIели, адамти пунтбиънила анцIбукьуназир бутIакьяндеш дарибти туснакъбарибтири, илди гьир-кусбирути биалли, дяхIцIилиуб убкалун – дурала мераначиб хIербирули, нушала дурхIни такьсирти дурадуркIахъес гьуцIбирес даимбиубли, хайри кайсули саби.
Гьаннара илди гъармукабани сагати гьир-кус дехIдихьили сари, «къаршидеш дирнилис» сагаси сабабра пикрибарили, иличила дигIянра бархли бирули ахIен. Аги-кьяйдала чебкад ахтарди дурабуркIниличи дирхехIе.
Гьар дус хIяж дураберкIахъес бахълис кумекбируси, нушала республикализиб бетурхуси гIяхIси ибси баркьуди, проект, программа гIердурцуси адам сайливан, Сулейман Керимовли Дербентлизиб киласа тIашбатахъес ОАЭ-лизирад инвестицияби дитIакIиб.
Гъай жугьутIунала киласалачила (синагога) ахIен, шагьарла дайлаб цIуба мармар къаркъализибад бируси мижитличилси, дахъал шалубарси, халаси комплексличила сари. Ил-алав культурала ва багьудила объектуни, машинаби тIашаахъес хасдарибти мерани, илкьяйдали регионнизиб хIербирути цархIилти динанала вакилтас булгахъес хасдарибти хъулрира дахъал дирар. Ил гIяхIцад миллатуни ва дахъал динанала вакилти хIербируси Дагъиста хIурматбарнила лишан саби.
Динна юртанала дурарад, илар дирар музейти, библиотекаби, конференц-залани, бамсриихъути мерани. Ил республика гьалабяхI башахънилизи кабирхьуси пай саби, къалмакъар-зиддешуни алкIахъуси сабаб ахIенну.
МягIничебси: илдигъунти гьир-кус адилкьути каналтала админти ишбархIи адамтази «дурабухъахъес» жибикIули саби. «БархьдешгIерли дургъулра» бикIути жявлил Кавказ бехъахъес дусмадли къайгънадиркьути западла кабизуначил барх бузули саби. ХIера, чичи къаршили цабиэс гIягIнитил. Илабад саби зарал бетарусира – Дагъистайс, Россиялис, ва Палестинала халкьлис.
Нушала жагьилти илдала «нясси хIязлизиб пешкабили», урхIли ибси бирути адамтили бетаахъес сеналра асухIебирар. Жагьилтала дагьри дамкьахъес бузутала бетхIерар! Дагъиста халкь мурталра цабалги, уржили, цали цала хIурматбирули хIеркабирутири, илкьяйда бирар гьаннала гIергъира!
Салимат ГIялиева
