ТIантIала шилизивадси 1930 ибил дуслизив акIубси ГIябдуллаев НикIамяхIяммад НикIамяхIяммадовичли дергъла къиянти дусмазиб халаси бузери бариб. ЧебяхIси ВатIа дергъла дусмазиб биштIати дурхIнира халати адамтачил барх бузули бири.

ТIантIала шила халкьли итди дусмазир дебали дахъал къияндешуни, гаши-дягIи чедаибти сари, сенахIенну 1944 ибил дуслизиб чула шилизибад зулмули дуракаили, чечентала мер-мусаличи гечбарни багьандан.

НикIамяхIяммад жявли цIуръавиубсири, виштIали левалли, Шурагъатла районна Шхиюрт шилизибси колхозлизив узес вехIихьибсири. ГIур механизатортала курсани делчIи 16 дусла гIямруличив трактор бикес бурсивиубсири.

Дергълис гIергъити  гашала дусмазирра дахъал хIянчи дарили сай  НикIамяхIяммад ГIябдуллаевли. Ил узуси колхозлизир 8 гектарла хъуми делгIули дуили сари, сабухъ бурчули, арши иршули, мицIираг дихIули буили саби. Дергълизибад чарбухъунти мурул адамтала арадешлизир нукьсандешуни лерни багьандан, колхозлизиб имцIаливан бузутири хьунул адамти ва гIулухъаби.

НикIамяхIяммад Чечентазив левалли, хъайчикайибсири. Илалара гIямрула рархкья ПатIиматлара вецIал дурхIя акIуб, амма илдазибад урегал урши-рурси биштIали лебалли гIямрулизибад арбякьун. ЖагьилкабизурхIели кIел дурхIя гIурра вайти анцIбукьуназибад алхун.

ЦархIилти тIантIантачил 1957 ибил дуслизиб чула мер-мусаличи, шилизи чарбухъунтири НикIамяхIяммадра ПатIиматра. Илдани юрт сагабариб хъу-гьунила хIянчи дирули, мицIираг адилкьули хIеркабирулри.

Илдани жагали дурхIни абикьур, гIяхIси бяркъра бедили, багьудира касахъили,  халкьла хIурмат бирахъес бурсибарили гIямрула гьунчи дураиб. Чумал дус гьалар ПатIимат гIямрулизирад аррякьун, бунагь-хатIа урдуцаб сунела.

Гьанна НикIамяхIяммад ГIябдуллаев сунела уршиличил МяхIячкъала шагьарлизив хIерирули сай. НикIамяхIяммад «Тылла ветеран» уличира лайикьвикибси сай. Илис чIумаси арадеш булгулра.

Иш белкI хIядурбарахъес баянти дархьили, кумекбарибси ТIантIала шила бекI Насрулла Ильясовлисра баркалла багьахъес дигулра.

С.ГIябдуллаева