Гьала хIеблизир шимазир ва махьурбазир ХъубяхIрумала  байрумти детурхути сари. Ахъушала районна шимазирра цаэсил гъаршла байрумти дурадуркIули сари.

ХъубяхIрумала байрам шила адамтас дебали дигахъуси балбуц саби, суненира халкь-ургаб уржибдеш, диги имцIадирахъуси. Бутрила шилизибра ил байрам халаси разидешличил дураберкIиб.

Шила шанти, биштIати, халати, дурабад бакIибти  гIяхIли цалабикили, апрельла бехIбихьудличиб цаэсил гъаршла байрам бетерхур.

Гьалабла манзиллизибван, хала бегIтани кьяйдали, урчилизи бабгили дуразра, берхъибси баракатла дус бакIахъес балгара барили, цаэсил гъарш каиб.

Байрамличир жура-журала абзани дурадеркIиб, мурул адамти,  хьунул адамти ва дурхIни дуцIбухъахъи, къаркъа, гира чили гьарахъли иргьул абзбикахъили, урчи дуцIдарили. Чедибдеш сархибти арц дедлугули разибариб.

Ил байрам бетерхахъес багьандан Бутрила шила бекI  БяхIяммад ИсмягIиловли ва Бутрила шила СПК-ла председатель  Марат СултIаниевли халаси кумек бариб. Илала харжаначибли сабри байрам бетерхурси. Марат СултIаниевли хIяйван белгьахъи, диъличил, берк-бержла продуктуначил гIеббуциб ва шила халкьлис савгъатунира дедиб.

Илкьяйдали, Бутрила шилизибадти Москвализиб ва цархIилти мер-мусаличиб хIербирути  адамтанира байрам дураберкIахъес икьалабариб.

Шила халкьлис дахъал муридешуни дутIиб. Лебилра сахаватли баршибси стол-алав цалабикиб.

Бутрила шила бекIла заместитель ПатIимат НурмяхIяммадовани,  библиотекала заведующая ПатIимат ИсмягIиловани, культурала центрла руководитель ХIялимат Ражабовани ва цархIилтира жавабла хIянчизартани жигарла бутIакьяндеш дарили, байрам гIяхIил бетерхахъес багьандан халати къайгъни дакIударибтири. Баркалла биаб чус!

Лебтасалра дус талихIчебсили бетааб!

С.ГIябдуллаева