Хала дудешунаван
Янсавла тIем багьурти,
Дергъла цIала майдайчир
Гъабзадеш чейахъути.
Варачанван гьалакти,
ХIурхъла чIакниван сахъ­ти,
Дявила авлахъличир
РяхIматлис хIи кертIу­ти,
ВатIа паргъатдеш гьан­ни
ГIямру ахIерхIейрути,
Адаб-хIяя, адамдеш
Ниъличил дарх дерхъибти,
Саб дила мулебкIанти.
Дубуртар Улкала халкь мурталра гъаб­задешличил, Ва­­тIайс мар­деш­личил, бурибси гъай­лис къянахIебирниличил де­кIар­­булхъути саби. Да­гъис­тан­ланти ВатIайс къиян­дикибхIели шай­чиб кахIели, цаибтала къяяназиб бирар.
Гьанна чумал дус Украинала мер-мусаличиб дявила хасси балбуц бетурхули саби. Ила республикала районтазибад, шагьуртазибад, шимазибад, махьурбазибад гIяхIцад ба­гьа­дурти арбякьи, ВатIа хъар­­хIерагардеш балтахъули, чеал­кIуси наслулис шаласи челябкьла багьандан, 1941-1945-ибти дусмазиб чула хала дудешуниван, миллатчибачи къаршили бургъули саби. Итцадра дахъал харабдешуни хили, бахъал адамтала гIямру кьурбандарибси Дунъяла КIиибил дергълис гIергъи гьатIира дергъ бирар или чис гьанбиркусири. ИтхIелира нушала дагъистанланти кахси дергълизиб цаибтала къяяназиб бирутиригу. ЦацабехIти даимлис дявила майдайчиб калунтири, цархIилти къел-хIерзи агарли беткахъибтири, чарбухъунтира чулахъбиубтири. ИтхIелила дергъла бутIакьянчибазибад гьанна нуша-ургаб тIулбачиб бейгIесцад саби калунтира. Нуни макьалала бехI­би­хьуд­лизиб буриливан, дагъистанланти чула игитти баркьудлумачибли декIарбулхъути саби.
Илдигъунтазивадли ца сай наб сунечила бурес дигуси ИштIалбяхIяммаев Мя­хIям­мад ГIябдулкьа­дирович­ра. АкIубси cай ил Сергокъалала районна Миглакьасимахьилизив, гIя­­датла хъалибарглизив. Мя­­­хIям­мадли шилизибси школа ункъли учIули таманаили, ДГУ-ла физический фа­культетлизи керхур. Илав ил гьабкьятала къяйлизив вири. МяхIяммадли магист­ра­­турара хъараахъур. ГIур би­алли ВатIа гьалабси чебла ахъес гIярмиялизи арякьун. Хабаровсклизив Инженерный гIяскуртазиб къул­лукъбирули калун. ГIяр­мия­ли­зив ил сапер пулеметчик сайри, cекIал ункъли гIе­рис­ниличил, серхурдешли­чил цархIилтазивад декIа­рул­хъулри. Мя­хIям­мад­ла гIяр­мия­лизивад чариубли гIер­гъи хIя­бал баз дикибхIели, жи­варили CВО-ли­зи арукибсири.
Наб тамашадизурти илала неш ХIявани ВатIайс къиян­дикибхIели дура­хIев­хъеси уршира майъаб или дурибти дугьби. Cунес сецад гIядабли биалра неш уршила гьалар мукIурхIеракIни. Илгъуна нешли айкьурси МяхIяммад-декIар цархIилли халаваэс вирибу гьатIи, ВатIайчи дичевсили ахIи. CВО-лизив ил сапер сайри. Ца дергълизиб МяхIяммадла бахъал юлдашуни алхунтири, cайра вяхъибсири. ИлхIели илис лейтенантла у бедибсири. Cагъиубли гIергъи МяхIяммад сай ургъули калунси частьлизи чарухъун.
Ил взводла командир вариб. 2023 ибил дусла октябрьла 23 -личив Мя­хIям­мад гIергъиси дявила хъарбаркь бетур­ха­хъу­хIели, дебали декIли кьяшлизивад вяхъиб­сири. Ил сунела дявила юлдашунани дергъла майдайчивад дурасибсири. Цаибси ку­мек гIеббаахъили гIергъи, Севасто­поль­ла госпитальлизи вархьибсири. Илав жумягIцадхIи ка­лунсири. Илавад МяхIяммад Москвализибси госпитальлизи арукибсири ва кьяшлизи операция барибсири. Илав базцадхIи калунсири, гIур Улан-Удэла госпитальлизив 3 базцадхIи, реабилитацияличи арадеш ункъбарахъес вархьибсири. Илавад дуравхъи гIергъи МяхIяммад Каспийсклизив дявила частьлизив узусири. БусягIятла замана МяхIяммад арадешлизиб нукьсандеш лебни багьандан, хъулив сай.
Сунечил гъайрикIухIели МяхIяммадли сунела хала дудешра ЧебяхIси ВатIа дергъла бутIакьянчи виъниличила буриб. Арадешлизиб нукьсандеш хIебиалри гьатIира сунела дявила юлдашуначи чарухъес дигниличилара гьанбушиб. Илини бурулри дявила авлахъличиб бургъантала уржибдешличибли юлдашуни берцахъес имканбикIниличила, школала бучIантани дурхьути кагъуртани ахъбурцуси уркIила гьавличила ва илкьяйдали бургъантала гьар бархIила гIямруличила къантI-къантIти баянти гьандушиб.
МяхIяммадла хьунулра виштIаси уршира сунечил барх шагьарлизиб хIербирули саби. Илдала виштIасилис сунела дудешлисгъунти къияндешуни чIямдарес чема­буркъаб, жагьил хъалибарглис биалли ара­ти ва разити гIямру дулгулра.

Раисат МуртузагIялиева