Нушани балуливан, 21 ибил февраль халкьани-ургабси мезанала БархIи саби. Республикализир ил БархIилис хасдарибти дахъал жура-журала далдуцуни дурадуркIу.
Миллатла библиотекала духIнар ил БархIилис хасдарибти конференцияби ва выставкаби чедаэс вирар.
Мезличила бурахIелли, нешла мез — адамла гIямрула кабизлис хьулчили детарули сари. Нешла мез хIедалуси адам, нуни рухIлашал мискинсилизи халирулра. Илди селис хIяжатти? — бикIути жагьилтира къаршибиркули бирар. Илдигъунти адамти вегIла миллатла челябкьлаличи авараагартили бетарули саби. «ХIу чиди миллатлари?» ибси суал жамигIятлизиб имцIали нушани бикьули дирехIе. Мез хIедалули биалра, дарган, кIарахъан, булеги сайра бикIути бирар. Ил анцIбукь бархьсилизи халбирули ахIенра, сенахIенну миллатла бекIлибиубси лишан – мез сари. Дарган мез хIедалути ва илди дяркъес хIяжатдеш агара бикIути адамтала дарганти сарра бикIес ихтияр агара или гьанбиркули саби. Нушала мез дебали жагати ва давлачерти сари. Илис бикьрили детарули сари даргала поэтуни-писательтала назмурти ва хабурти. Илцадра жагати дугьбачил делкIунти илдани адамла уркIилизир жура-журала хIялани алкIахъа. Мезла жагадеш аргъес багьандан илди ункъли далес гIягIнили саби.
Нешла мез — наслубала бархбас къябхIевдахъуси, хала бегIтачибад букьурли баибси давлали детарули сари. Илди дални ва бегIлара чараагарси дурхъадешван мяхIкамли дихIни гьарил адамла чебла саби.
ПатIимат Шахова
