БегI гьалав ил шагьарлизи ну вакIибла 50 дус диркули сари. Шагьарличилси итхIелла дила гьунибаъни дебали къантIсири. Ил багьандан бургар иличила се-биалра бурес къиянбулхъусира.
Шагьарличилси кIиэсил гьунибаънилизир диубти анцIбукьуни дила гIямру кадерхайчи бекIлизир кавлан. Сен? (Иш макьалализиб нуни иличила чебетаахъили бурулра).
Нушала республикала тах шагьарлизи ну учIес керхес кьасличил 1966 ибил дусла дуцIрумлизив вакIибсири, ва ДГУ-ла дурала улкнала мез руркъяхъуси факультетла англияла мезла отделениелизи документуни дедибтири. Се багьандан ила керхес пикрибарибсирил, нуни бусягIят бурес хIейрус. ГIячихъли бурисра ца секIал: дила англияла мезла мугIяллим ветаэс пикри аги.
Шагьарлизи дуравад вакIили, имтихIянти дедлугусилис урниверситетла общежитиелизиб хIериахъес мер бедлугусири. Наб сен ил хIегибсирилра гьанна нуни бурес хIейрулра. Чила сабрил ил хатIаличибли дила гIямрулизив кIинайс шагьарлизи вакIибси ну ца жумягIялра хIериэс мер агарли калунра.
Аллагьли бунагь-хатIа урдуцабну сунела, колхозла авлахъла бригадиртала ца базла курсаначи вакIибси дила шан Аждагьа Ражабцун сайри ит замана ну гIевурцуси ва наб кумекбируси. Ражаб хIерирулри М.ХIяжиевла уличилси кьакьалабси ДГУ-ла корпуслизив (кинайс ну илав учIули калунсири). ХIера, кIина-хIяйна илини ну, дигIянали сай хIерируси хъули айцIахъули, илаб дуги беркIахъиб. ИтхIели илдала хъулиб бацIси калхьуси мерра камбируси ахIенри. Ахирра-ахир, хIябэсил бархIи савли илавад дуралхъуси ну унзала мякьла кариибси къараулчи хьунул адамли чеваира ва… наб гIурлис илабяхI гьуни гIекIиб.
Шагьарлизив ну хIерируси авэсил дуги наб урхьула дублабси парклизирти скамейкабачиб беркIес чебуркъуб.
Ит бархIи бархIехъ ну вахъхIи калунра Буйнакъскийла уличилси кьакьалав ита-иша къунзикIули, гIур биалли «Дружба» кинотеатрлизиб чебиахъуси бегIлара гIергъиси кинола сеансличи вякьунра. Кино таманбиубли гIергъи ухIнаухъи мякьлабси парклизи, скамейкаличи кайхьунра. Дай дуги баили бурги ну ускаунхIели.
Савли гьанкIлизивад чеваргъира ва ну усухIели хъулкили дила секIал дигIниличила бусягIятал шакикира. Паспорт, имтихIянтала кьиматуни кадалтуси кIа (экзаменационный лист) ва арц дигIири. «ТIутIули дуаб сари, арц. Илди иткъира дахъ камтиригу. Се бирусив нуни паспортра экзаменационный листра агарли? ИшбархIи дурути сари хIябал бархIи гьалаб белкIунси сочинениела кьиматуни, — пикривикIулри ну. — Секьяйда аргъахъес вируси тухумтази, бегIтази наб бетаурсиличила, рахли ну хъули чариасли? Чи вирхаруси нуни дурутачи? Сочинениелис хIябла кьиматалра касасли, жягIял кIиэсил имтихIяйчи аркьусирагу. ДилакIун сегъуналра документ агара…».
ХIера, ихкьяйда гьунибаибсири хIу наб, урхьула дублабси дила шагьар!
Се бирусири нуни ит бархIи? Чина аркьусири ну хIебалуси шагьарлизив, сегъуналра документ ва кисалаб кепекалра арцла агарли?
Хьурали вашули, ваира Советская кьакьалабси ДГУ-ла бекIлибиубси юртлизи. Ну сунечи ваибхIейс Университетла площадь адамтани бицIилри: ил бархIи университетла цаибил дерхIла бяхIлизи бучIес кабурхутани делкIунти сочинениебала кьиматуначилси сияхI чебяхIкайхъусири.
Наб илав бегI гьалав къаршиикиб лебилра дунъяличив набчила пикривикIуси цацунси адам – авлахъла бригадиртала курсаначив учIуси, баягъи нуни чедив белкIлизив гьанушибси, дила шан Аждагьа Ражаб. Ну чеваибмадан, «Сочинениелис хIуни хIябла кьимат касилри» викIули, дебали разивиубси илини дила някъ цIацIабариб ва, «Дуги сен кайхьес нушачи хIекIири?» или хьарбаиб. Илис жаваб чархIебарили, ну сочинениелис «хIябла» касниличила белкIунси сияхI чебаэс юртла жаняхIлизи къалабаикира.
«ЧевяхIси Аллагь! Се саби иш нуни чебиуси!? Унза абхьили айцIухIели, балуй шайчиб столличиб, сунезибси сурат чебиэсли гьаргбарили, кабихьибси дила паспорт ва паспортла бухIнаб — экзаменационный лист. Баркалла хIед, ЧевяхIси Аллагь, дунъяличиб илдигъунти гIяхIти хъулкни дакIубарнилис. Ца жумягI кьацIли хIевкулира нуни яхIбираси, амма се барес вирусири нуни документуни агарли. Белики, дила документуни чилилра хIедигIун дургар. Белики, гьанкIлизивси ну шайчивад шайчи ласирхъухIели, илди кисаларад кадикиб диэс. Ну биалли, пикрихIевхъи ва къалабаикили, адамтас гIяйибта виркьулра. Чинаб бирутив нушачиб хъулкни? Сегъуна мас-хазна баргес вирусири хъулкили дубурлизив хIерируси колхозла букIунна уршила шалбарла кисалаб? Дила бекIлизи хIушачила вайси пикри бакIни багьандан, чердерхирая набчирад, дила дигути» — илкьяйда пикривикIусири ну итхIели.
ХIулкIули дуравхъунра площадьличи. Илав наб нушала шан поэт Сулайбан Рабадановра къаршиикиб. «Хайдакьла райкомла цаибил секретарьла рурсили сочинениелис сегъуна кьимат касибал багьес вакIибсира», — викIулри ил. Къаршивикиб илав дила дудешла гIяхIял гIярбукIан Мурад Къанаевра (бегI гьалав МяхIячкъалализи вакIибхIели, ну иличи хьуравиубсири). Рахли конкурс хIясибли ветхIерхасли, илини ну сунечи вакIахъес буриб ва дила кисализи вецIал къурушла кагъар къузбариб. Ил вецIал къуруш калунти бурхIни ну шагьарлизив хIериэс баибсири.
ГIяхIти кьиматуначил дедили кIел гьатIи экзамен, конкурс халаси биублихьар, ну учIес керхурра. Амма кахIелунра ну илав учIули. КIел курс тамандарили, гIярмиялизиб къуллукъбарес арякьунра. Илавад чарухъунхIели, филологический факультетла бархIехъла отделениелизи шурухъунра.
ГIярмиялизи арукьяйчи, ну Батирайла уличилси кьакьалабси университетла общежитиелизив хIерирусири, цаибил дерхIличив, набчил барх бучIути дурхIначил. БархIехъ ну хIерируси хъули юлдашуни учибиркутири. Илар нуша назмурта ва далуйта дучIутири. Ит замана нушала бегIлара дигути далуйти сарри: «Буйнакъскличила далай», «Дубурлан рурси», «Дубурлан урши ца рурсиличила сай далайвикIуси». БегIлара имцIали бучIуси нушала далай хIечила сабри, камли-биалра нуни балуси, ну хIерируси, наб дебали дигуси, дила дунъяличиб цацун лебси, ахIерси шагьар. Ил далайла у саби «Тарки-Тауличибад дирихь убяхIяхъиб».
«Тарки-Тауличирад
Дирихьми уряхIяхъиб,
КIапIбариб илдани дигуси шагьар.
Юртани ва унхъри,
АхIерси, хIура
Дирихьла кIанали алавдуцира…», — дучIутири нуша.
Набчил барх ца курслизиб кIел Советский Союзла Игитла рурси бучIули бирутири: Николай Подорожныйла ва СултIан ГIялисултIановла. С.ГIялисултIанов, шагьарлизи вакIалри, рурсби чебаэс нушала общежитиелизи вашусири. М.ХIяжиевла уличилси кьакьалав нушаб Николай Подорожныйра имцIали къаршивиркули вири. Халаси пахрули бирцIи дила уркIи, рахли илдачил къаршивикаслири, мицIирти Советский Союзла Игитуни чебиулра викIули. Илди къаршибикибси мерличив ну, хIебалас селисрил, хамха чIикьбитIахъи, вархьвиубли калзули вираси.
ЦацахIели ну дила шан ва унра поэт Сулайбан Рабадановличи Дагъиста писательтала Союзлизи вашулира вираси. Сулайбай ну бахъал поэтуни ва писательтачил тянишварибсири. Илав тянишиубсири Расул ХIямзатовличилра (Ил анцIбукьличила нуни цархIилти хабуртазиб белкIи леб).
ХIяжимурад Ражабоа
