Шагьарла кьакьакад мурт къунзухъаллира, адамтала гIямрула ва кьисматунала декIар-декIарти анцIбукьуначи вяхIигули сай. Гьайгьайрагу, адамти бахъал лебти мер-мусаличир дахъал аги-кьяйдара дираргу.
Гьар мурталраван, иш гьакIлисра маршруткаби тIашиуси мерличиб адамти кабиръахъес хасбарибси скамейкаличи кариили ца ургарти гIямрула хьунул адамличи лебтанилра пикри бяхIчииулри. Ил нясти ва дурдибти палтарли регIриублири, илала кьукьубачи кабихьибси биштIаси ящиклизир сегъунтирил берклуми сарри. Илдира деккалкьлизи лайдакIибти чила-сарил гIела-гьаладиклумачи мешулири.
Чичилра пикрилра бяхIчихIейули, ил иштяхIличил рукулри. Иличи хIербикIути цацабехIтани уркIецIидухъи, се-биалра сумкализибад дурасили илала гьала кабирхьулри. ЦархIилтани гьимиличил иличи хIербикIули, ца шайчи тудирхъулри.
— Бомжла хозяйстволичи хIеръаягу, — рикIулри ца гьести гIямрула хьунул адам, — жагьхIели чус диганта биркьули дусми дугIли дуркIули, гьанна их даражаличи биркули саби кункти аварала хьунул адамти…
— Илдигъунтани чинаб дуги буркIусил багьес гьамадли ахIен, — бомжличи ласряхъили, цархIил хьунул адамлира ихтилатлизир бутIакьяндеш дирулри, — чуйна хIеризалра ил ишар чериулра. Янилизирра хIеблизирра ил кьакьурбазир сари. Илдигъунти зягIипхIебиркутив, хIебубкI… — ил-алав хIерризур ва буруси къябаиб, кIинайс гIяшси тIамаличил даимриуб. Илдала бекIлил гъамти яра тухумти агартира, илкьяйда сен балтутира илди…
Бомжличибадли циила гьарахъли чIукьаси хя лебри кабихьи. Илала мякьлабра чIянкIбарибси лига сабри. Хяличи гъамиубли ца мурул адамлира сунела пикри бурулри:
— Ишди унруби саби. Мурталра ишаб букули ва бусули чебиис нуни. Илдас авара агара шагьарлизиб яра дунъяличиб се бетарулил. ЦархIилти адамти яра хури секьяйда хIербирулил…
КIелра илди игъбарагартачи хIеррикIули, дила уркIилизира дахъал пикруми хьурадиуб. ИмцIати хуралакIун ил бомжла унралайчи мешути сари гIямру. Хьунул адам сегъуна кьисматли ил даражаличи рикахъилира. Яра ил кьяркьдешла кьялшубази рикили рургар, яра арадешлизир нукьсанси рургар. УргIебси агилизив адам илцад «мурхьси къуюлизи» кайкес вирусив? Иличи хIеризурхIеликIун, адамла сипатличилси ил хIяйвайчи мешуриркули сари. ХIяйванти-ургар дархли иличир гIякьлулизир гьаладу­хъунтира дирар.
Сепайда, адамла гIямру сари гьатIи…

ПатIимат Кьурбанова