Гьалабван Лавашала районна бекI Мухтар ХалалмяхIяммадовла хъарбаркь бетурхахъули, дявила хасси балбуцла ветерантала масъултазиб бу­зуси отделениела пред­се­датель Расул ГIисаев ва Лавашала районна боль­ницала чейхъути излумала отделениела заве­дующий Камил Нура­динов УбяхI ЧIугIлила шилизибадти бургъантачи гьаббакIиб.
Дявила хасси балбуцла бутIакьянчи ХIяжимурад МяхIяммадов отпускаличи вакIибси сай. Ургъан Зайпуллагь ГIусмандадаев биалли, вяхъни багьандан хъулив сай ва ил операцияличи хIядурикIули сай. КIелра бургъанни ВатIа гьалабси чебла асилдешличил ихъули саби. Чула шилизиб илди гIибратчебти, хIяжатси замана умутбихьес вирути, адамдешчебти багьадурти сабливан, шантани ункъли балутигу.
Илдала челукьути масъулти хIердируси замана Зайпуллагь ГIусмандадаевли газ лебкуси турбаличила гъай ахъдуциб.
ХIяжимурад МяхIяммадов дявила хасси балбуц бетурхуси мер-мусаличив Лавашала районна шайчивадси бургъантачил бархбас бузахъуси вакилра сай. Дявила юлдашунани бурни хIясибли, ХIяжимурад МяхIяммадовли бяхъибти чумра бургъан дявила майдайчибад дурасибтири. Илдани илис халаси баркалла балахъули саби. ХIера, иличила буриб гьунибаъниличиб «Дубуртала гьанбикуни» бикIуси организацияла вакил Расул ГIисаевли. Илкьяйдали илини Лавашала районна бекI Мухтар ХалалмяхIяммадовла баркаллала дугьбира дуриб.