ИшбархIила замана адамтани дугIла шайчир дирути чеблуми дахъдаили сари. Сецад халаси алапа кайсули виаллира адамли илцадра илала харжанира имцIадикIуси тяхIяр бетарули саби. Асес дигути секIал дахъдикIули сари. Дигуси асес арц хIедиули диалли чеблалис сайсули сари, яра банклизиб кредит. Иличибли чус къияндешуни ва баракатагри алкIахъули. ЦацабехIтани бурни хIясибли, гъамтази чеблалис арц га викIесичиб, банклизирад сасес гьалаб саби.
Нушала хала бегIтани алапала дайхъала арц бегIлара чараагарси секIайс ва яшавлис харждарили, дайхъала гIергъиси алапа сабаайчи мяхIкамдирутири. Илкьяйда учидирхъутири арц хъалибарглис се-биалра халаси секIал асес багьандан ва дугIли харждирути ахIенри. Гьарил кепекла кьадри-кьимат балусири, сенкIун халаси къиян кабихьили кайсути арц сархIели. Асибси секIалра мяхIкамли дусмадли бихIусири, гьаннаван гьачам-кIина пайдалабарили лайбикIуси ахIенрину. БекIлил алапа агарлира хIербирутиригу адамти, чIянкIли чула хозяйстволизиб бакIибси яра чула някъбани барибси секIал бицили гIямалбирули.
Гьанна биалли адамтас арц гьамадли диркули сари, халаси-декIар къиян чехIебаили ва тяп илкьяйдали харжра дирули сари. Унрала се чебаалра, ва се цархIилла гIяхIбизалра ил исули. Се-биалра асес банклизирад кредитлис арц сасни халаси пахрулизи халбирули саби ва дусмадли илди арц чардарес бузули саби. ЦацабехIтала кIел кредитра дархли дирули сари, чули бурни хIясибли. ИлхIелира бекIлил арц дурчес бурсибирули ахIен ва банклис халати процентуни дедлугули бунагьлизи биркули саби. Бусурман адамтас шаригIят хIясибли процент лебси секIайзи бирхес къадагъабарибси саби. Багьес чебиркур, банклизирад чеблалис арц сасили, ила процентуни чардирнили, адамти бунагьлизи биркути саби.
Баянти хIясибли, дагъистанлантани 2025 ибил дусла 3 базла духIнар банклизирад чеблалис сасибти арцла кьадар 27 миллигIярдличи адикили сари. Илди 32 процентла кьадар камли сари арбякьунси дусличил цугдуцалли. ХIебиалли, дагъистанлантани ца дусла духIнар 200 миллигIярдличи гъамли чеблалис арц сайсули буили саби. Пикриухъалли, цацабехIти илди чеблумира ахъес балкьхIеурли бубкIули саби. Чеблализир гIямрура деркIили, чеблумачил вебкIниличиб декIси се лебси?! Бусурман адам чеблуми датурли вебкIили виалли, гIелабтас ил хIяриихьили бекIварибмад, къалабаси тяхIярли илала чеблуми черахъес чебси саби. Амма бегI гьалар ЧевяхIсила гьаларти, гIур биалли цархIилти – адамтала гьаларти диаб, банкла гьаларти диаб. Банклизибад кредит касес ибси пикри бекIлизи бакIайчи, яра чеблалис арц сасайчи мурхьли пикридухъеная, илди арц хIушаб чараагарли гIягIнитил, яра илди агарли гIямал бетарусил. Пикридухъеная хIуша…