«Диур кьалли нуни дарибти хIянчи, замана баили бургар хъули кайили уэс», — цацахIели набра илгъуна пикри бекIлизи башули бирар. Гъамтас, тянишунала ургавра ну хъули кайили уахъес маслигIятбирути камирули ахIен. Амма ну биалли, гьаннара хIянчила вашули левалра. Дила пикрили, вашес вирули левалли, гIурра вашус. Сен..?
СенкIун, мурталра диванничи кайили, хъулив уасли, се куцличи виркусирал балухIели. Дила илгъуна челябкьла сут ва алхIят бурхIни хIясибли нуни чебиулра. Диванничи хъарихьи, телевизорличи хIерикIасли, ну итмадан ускалъулра ва дугели, усаэс хIейрули, къарауйчивван кавлулра.
Хъуливад дуравхъи, хIянчиличи вашуси гьуни нуни, сецад багьлали вашаслира, 17-20 минутла бухIнаб ихъуси саби. ХIерила укесра ну ил гьунчивад хъули вашусира. 20 минут авна касахIелли, 80 минут детарули сари. ГIямрула 80 дусличи гъамируси ухъна, гьар бархIи 80 минут къунзикIалли, дила пикрили, баибси бургар. Нуни илдачи, жагьилхIели гIебшни ва яни акьухIели гIяярличи вашули, бархIилис ихъуси 50 километрла гьунира чебихьасли, наб вашули ихъес гIягIнити километрти челяркьути дусмасра диути сари.
Гьанна, датурли чула мерличир ил арзес гьамадси ахIенси суал хIясибли дурути дугьби, ца наб тамашабилзуси анцIбукьличила гъайдикIехIе.
Бурасли, ну гьар бархIи ца гьунчивад сайра хIянчила вашуси. Цугли байхъала гьуни ахъибхIели, бамсриахъес ибси пикрили ца юртла азбарлизибси, биштIатас хасбарибси майдайчибси скамейкаличи кайрусира ва илав 3-5 минут уусира. Илди шел минутла бухIнаб дила мякьлабад бахъал адамти шалгIеббулхъули бирар. ИмцIаливан анхълизи ва школализи башути биштIати ва илдала бегIти саби.
Илар азбарлабси клумбализир удатурти вавначи хIеррикIуси ца ургарти гIямрула хьунул адамра къаршириркули рирар. ЦацахIели ил набчил ихтилатрикIар.
МуртхIейчивад саял нуни гIячихъли бурес хIейрус, ну кайибси скамейкаличи къаршиси шел дерхIла юртла хIябэсил дерхIличибси балхунничив нуни мурталра ца ухъна чейулра. Ил набчив вецIал дусцадхIи халаси ургар ибси пикри башар. Ил кайибси балхун шишала бягIуси улкьайли кIапIбарибси саби. Ухъна ургабси авэсил шишали кабуцибси улкьайла гIелав мурталра ца мерличи кайили вируси сай.
Скамейкаличи кайибмадан дила хIулби ил улкьайличи хIердилзан. Рахли ухъна чехIеасли, дила уркIила гьав булъан ва абзур бархIи ну гIядатласи куцличи викес хIейрули кавлусира. Наб ил ухъна набчи хIерикIули сай илира гьанбиркуси саби. ГьачамкIун, наб салам лугули, илини някъ ахъбуцибсиван бизурли, нунира, някъ ахъбуцили, «салам, салам» или, жаваб чарбатурра.
Белики, ухъна чейухIели, нуни, гьала хили, вецIал дус гIергъити дила гIямру чедиули вииша. «Ну чидил улкьайла гIела кайрусира илхIели? — пикри башули бургар дила бекIлизира. – Чейису нуни илхIели нушала азбарлизив гьар бархIи савли, скамейкаличи кайили, бамсриихъуси адам?»
Балхунничибси улкьайла гIела кайасли, нуни чебиути рах-рахли шалгIеббулхъути адамтицун саби. Тавханавад яра кухнялизивад хIерикIасли, азбар бицIибти машинаби сари чедиути. Баласра: анцIдулкьан наб илдигъунти гIямру.
Рахли итхIейсра ЧевяхIсини наб хIулбала шала баталли, нуни дила улкьайлабад гьарахъли ахIенси, цацахIели бургъуси, цацахIели ряхIятси урхьу чебиуси саби. Улкьайла гIелавад хIерикIуси ухънас сунени бархIилис чейуси ну анцIукьесра асубирар, амма наб урхьуличи хIерикIес анцIхIебулкьан. Абзур дуги-хIери урхьуличи хIерикIес вируси сай. ХIулбала шала нукьсанбики хьалли, лихIбани бикьули каласли, ну разилира. Урхьула рамчанала тIамакIун дугила цIябдешлизиб гьатIира гIячихъли иргъуси саби. ХIебиалли ухънавиули или цIумикIес цугхIебиркур: ухънадешра гьариллис лугути ахIенгу.
ХIяжимурад Ражабов
