Дурхъаси Рабазан базлизиб гIяхIдешуни дирес, кумекличи хIяжаттас ил гIеббаахъес, сецад имцIали биралра, халкь дубкабатахъес ва цархIилти кирила хIянчи дурадеркIес къайгъилизибри адамти. Илдигъунти баркьудлумачи, гьайгьайрагу, разихIейэсра хIейрар. Дебали гIяхIси саби, эгер вегIла имкан лебли биалли, яшавла шуртIри гIяшти адамтас икьалабиралли.

Чумра биуб бургар, кумекбарес дигули хьалли, имканти агарли, ил баркьуди гIямрулизиб бетерхахъес хIебиубтира. Амма ишаб дебали мягIничебси саби илгъуна гIяхIси пикри уркIилизиб лебни. ГIур биалли, челябкьлализиб ил бетерхахъес бажардивикесра асубирар. ГIямру илдигъунти сари: ишбархIи хIуни кумекбирули увулхъулри, жагIял, белики, хIед кумекбарес чевкъар. Ил багьандан, мурталра уркIи умули калахъес чебиркур. ВегIли барибси гIяхIдеш вегIличира чарбулхъан или хIязлис ахIенгу бикIути? ГьатIиралра дурхъасили бетарар арадешлизир нукьсандешуни лерти, зягIипти адамтас кумек гIеббиахъалли. Диннизиб дебали кириласи баркьудлизизи халбирули бирар, зягIипсиличи гьаввакIили, арадешла аги-хIяйчила хьар-хъардяхъили, илала уркIиличибси пашмендеш чебарбукни. Сецад леба нушала республикализиб арадешлизир нукьсандешуни лерти дурхIни. Гьайгьайрагу, илдала бегIтас къиянни биъни лебтанилра балули саби. Илди лерилра пикридирули, илдигъунтас кумекбирнира нуни лайикьсилизи буйгIулра.

Дигахъаси гьаннала гIергъира нушала халкь илдигъунти гIяхIдешуни гьар бархIила гIямрулизир дурадуркIес даимбиубли. Рабазан базлизибцун ахIи, гIягIниагарти дурнила ва лайикьагарти баркьудлуми дурадуркIнила шайчирра сабурчердеш дакIудирули.

Р.МяхIяммадов