Тамашала анцIбукь ахIенара адам гьаваличив урцни? Ванза батурли, гIяршличи айъни, иларти лерилра зубарти чедиъни? Илара сен-сен ваишара, хIеваили убкIусара ибси урехи агни — дебали тамашаласи баркьуди саби.
ХIушала пикрили чичила сари гъай? ГIе, бархьси саби, зубартачи бегIла гьалав арцурси адамличила сари. Апрельла 12 — адам бегIла гьалав космослизи арцурси БархIи сабливан кабизахъурси саби, сабира гьар дус дурабуркIуси. Ил бархIи 1961 дуслизив Советский манзилла космонавт Юрий Гагарин «Восток-1» бикIуси гьавала (космический) гамиличив бегIла гьалав космослизи арцурли, ванза алавбариб. Ил Ю.Гагаринна дебали халаси, пахруличи лайикьси гьунарри.
Гьанбушес чевкъар 1960 ибил дусла августла 19-личир «Спутник-5» бикIуси гьавала гамиличир космослизи дархьибти кIел кIецIа Белкачила ва Стрелкачила. Илди гIялимтани хIялумцIес багьандан дархьибтири: космослизиб мицIирагличи сегъуналра асар бирул, ва илди гьаваличир сецад замана дуэс дирарал багьес дигусири. Космослизирад илди ара-сагъли чардухъи гIергъи, адам вархьес хIядурварибсири.
Илдигъунти баркьудлумани чебиахъули саби адамлис гьарил секIал дагьес, лерилра дяркъес дигни. Сай-алавти секIал дагьурли, паргъатли уули ахIенну ил, сунечи къячхIедилкутира, балли чехIедиутира секIал дагьес къайгъилизи виркули сай. Заманаличил дарх лерил секIалра дарскадирули сари. Мурт хIялумцIлабази ахъалра, бяркъес хIяжатси секIалра камбирули ахIен.
ХIера, мурул адам космослизивад арали чарухъунхIели, ванза чебаэс хьунул адамлара иштяхI акIуб. 1963 ибил дусла июньна 16-личир цаибси хьунул адам Валентина Терешкова «Восток-6» бикIуси гьавала гамиличир космослизи арцур. Ил цаибси хьунул адам сарри сарицун, чилра варх агарли, космослизи раибси. Илала баркьудиличибли нушани чебиулра цацабехI хьунул адамти мурул адамтас гIелахIебулхъни, сегъуна-биалра сархибдеш биахъес кьасчебти биъни.
Космослизи арцни адамтала халаси гьунар саби. Иличила чеалкIуси наслулизи хъумхIертахъес багьандан, халкь-ургаб хасси бархIира кабизахъурси саби.
Анжела Мутазова
