Дубуртар Улкала багьадурти дурала мер-мусаличиб хIербиралли, иларадли илдачила мурталра гIяхIти хабурти дашули дирар. ЦабехIтани спортлизир чедибдешуни сархули сари, цархIилтани бузерилизир устадеш дакIудирули сари… Камли ахIен гъабзадешла баркьудлумачибли нушала зурбаси улкализибцунра ахIи, лебилра дунъяличиб машгьурбиубти дубурланти. Гьайгьай, илдачи пахрухIебаресра хIейрар. Илдигъунти чебяхIти адамтачигу иш дунъяра тIашси.
Ишди бурхIназибра бусягIятла замана Астраханьнизивси дагъистанлан уршили игитси баркьуди дураберкIниличила СМИ-бала гIяхIцад гIягIниахълуми гъайдухъун, Интернетлизир илис баркаллала дугьби дагьардиуб. Ил сай Дахадаевла районна Ирагъила шилизивадси Астраханьна медицинала университетлизив учIуси Халибрагьим ХIяжигIяхIмадов. Илини шиннизив кайгIуси дурхIя верцахъибсири. Аргъ-бархIила шуртIрачи хIерхIеили, ил гIяхIгъабза уршили жан ахIерахIедарили, игитси баркьуди дураберкIни адамла адаб-хIяяла ва малхIямдешла къиликъ саби.
ИшхIелла ишцад кьяркьси манзиллизиб дунъялис Халибрагьимгъунти игитуни лебгIеб хIяжатлира саби. Адамлис къияндикибхIели, шайчив кахIели, кумекбарес музаухъунси Халибрагьимла баркьуди бегIлара халаси баркаллаличи лайикьлира саби.
Урши бикьрили ветаурли сай виштIаси дурхIя шиннизи кайкнила, иличи халаси балагь бакIнила. Пикрилра хIевхъи, Х.ХIяжигIяхIмадов дурхIя верцахъес багьандан дяргIибти шиннизи тIяхIухъи сай.
ДурхIя шиннизивадли дурасили гIергъи гьигьикIес вирули ахIенри ва варглизи шин ардякьи гIяндиркулри. Амма университетлизир касибти багьудлуми багаладиуб илхIели дубурлан уршилис ва дурхIя верцахъести тяхIяр-кьяйда далдуциб. Илкьяйдали Халибрагьимли уршила гIямру дерцахъиб.
Дарган уршила ил баркьудили сунела гъамти ва шантицунра ахIи, лебилра Дагъиста жамигIятра хIулбуркIахъниличи ва пахрули бирцIахъниличи вирхес вирар. ЧеалкIуси наслулисра ил пергерси баркьуди мисалли бетарар ва къияндикибхIели кумекличи музаухъес хIяжатли биъниличила гьарилли иргъу. УркIи разихIебирару, Халибрагьимгъунти залумти, саберхурти ва гIяхIдеш барес гьалакти, къияндикибсилис кумекличи музабухъес мурталра хIядурти игитуни нуша-ургаб лебли биалли.
Бахъла игъбарлизи халбарес вирар ил багьадур уршили тухтурла санигIят чеббикIнира. Умутличил буресра вирар челябкьлализиб илини бахъла жан дерцахъести имканти дургу ва хабардерхурси тухтур ветарар или.
Илгъуна гIяхIгъабза урши айкьурти Халибрагьимла бегIтасра уркIи-уркIилабадси баркалла багьахъес лайикьли саби. Халибрагьимлис къаркъагъуна арадеш, кахIебурхуси талихI, челябкьлализир гьарбизуни ва бузерилизир сархибдешуни дулгехIе.
Дахадаевла районна администрацияла пресс-служба
