Сезаманалра нушала ванзали гьарли-марти патриотуни абилкьути саби, чулира азаддеш ва ВатIа хъархIерагардеш цаибил мерличи кадалтути. Илкьяйда биъни чебиахъу улкала асилти уршбани ва рурсбани, ВатIайс къияндикибси замана.
ИшбархIи нушани ВатIан дигахънила ва хъялис марти биънила гIяхIцад гIибратуни гьандушес дирехIе. Гъабзадеш ва игитдеш дакIудирутала лугIилизи кархули сай Сергокъалала районна Мяммаулла шилизивадси СВО-ла бутIакьянчи МяхIяммадтIагьир Нуцалхановра. Илини 2022 ибил дусла сентябрьла 23-личирад дявила хасси балбуцлизир бутIакьяндеш дирули сай.
Душман ламартчи сай, иличи мешути сари сунела хIярхIубира. Дявила хъарбаркь таманбарес дураухъунси МяхIяммадтагIир душма хIярхIуба вяхъиб ва, сагъвиэс, хъули вакIес чебуркъиб. Арадеш гIяхIбухъунхIели, сунела юлдашуначил дявила къуллукъ даимбарес хIядурикIули сай. Украинала мер-мусаличиб илини урхьула пехотала 177 ибил полклизиб къуллукъбирулри.
М.Нуцалхановли 2013-2014-ибти дусмазиб гIярмияла къяяназиб ВатIа гьалабси чебла ахъибсири. Илини Амурская областьла Белогорск шагьарлизиб – ПВО-ла 73 ибил дивизиялизиб, кIинайс Приморский крайлизибси Владивосток шагьарлизиб урхьула пехотала ва дявила-урхьула флотлизиб къуллукъбарибсири.
Улкала Президентли мобилизацияличила багьахъурхIели, М.Нуцалханов бегIла гьалаб бурхьути жагьилтала кьукьялизив левсири. ЦархIилтачил варх дявила устадеш касахъес Къарабудагъкентла мер-мусаличибси полигонничи вархьибсири, гIур – дявила хасси балбуцлизи арукибсири. Цаибти бурхIназивадал МяхIяммадтIагьир гьаркьятала къяянази кайзур, гъабзадеш дакIудирес вехIихьиб ва сай гIяхIси ургъан виъни чебаахъиб.
ВатIа хъархIерагардеш батахъес гъазализи керхурси жагьил адамли СВО-лизир чIумати гъабзадеш дакIударни багьандан, РФ-ла оборонала Министерствола медальличилра Суворовла медальличилра шавагъатлавариб.
ВатIайчи диги адамла уркIилизир даимлис минадирути секIал сари. «Наб ВатIан дигахъис» или ахъли вявхIебикIули, дахъал гъай-мез агарли, чула гьалар тIашдатурти масъулти ункъли тамандирули сари нушала бургъантани. Илдачибад гIибрат кайсахъес ва ВатIайчи диги адикьес багьандан, чеалкIуси наслуличил зумали гьунибаъниби дурадуркIес, улкала тарихличила, дергъла бутIакьянчибачила, ветерантачила хабурти дурес, киноби чедиахъес чебиркур. ИлхIели жагьилтани гIячихъли иргъу вегIла улка душмайзибад мяхIкамбирес хIяжатли биъниличила.
МяхIяммадтIагьир Нуцалхановлис ва лебилра нушала бургъантас чIумаси арадеш булгулра. Лебилра ара-сагъли, чедибдешличил хъули чарбухъаб!
ПатIимат Мирзаева
