Нушала улкали Украинализиб дурабуркIуси дявила хасси балбуц ахирличи бикахъес ва сунечи лебилра хIерси чедибдеш сархес багьандан урехиагарти, къиянти аги-кьяйдализиб дебшлабиубти гIяхIгъубзни бургъули саби. Хаслира СВО-лизиб бургъути-ургаб гъабзадешличил декIарбулхъули саби дагъистанланти. ВатIан багьандан чула жан ахIерахIедирни илдани игитлати баркьудлумачил чебиахъули саби. Гьанналис Россияла бухIнаб бегIлара бахъал игитуни дурабухъунси регион саби Дагъистан. Иличи пахрухIебаресра хIейрар. Дагъистайзиб ишбархIилис Россияла 12 Игит леб. ЦацабехIтани Игитла дурхъаси у сархес, ВатIан багьандан чула жан, гIямру кьурбандариб.

Марлирагу, ил дявила балбуц гIядатла дявиличи мешуси ахIен. Ил дявилис «дурхъаси», Аллагь багьанданси дяви викIалра, хатIа бетхIерар, сенахIенну нушала улкали мурталраван, дурхъати адамдешла, адаб-хIяяла низам-кьяйда, миллатунала бархьси гьунчирти хIеранала хъархIерагардеш далтахъули, илди багьандан бургъули саби. Улкала Президентла бяхIчибиз сегъуна сабил балусини гъай селичила сарил иргъу. Лерилра дунъяла улкни Россияличи къаршили кадизурли, гьар шайчирад хIявбуцIиван чедулхъухIели, Владимир Путинни бегIлара бархьси ва кабизалачебси хIукму дурасибсири «нушачи бяхъ чегайчи, бегI гьалаб нушани чегахъни». Илгъуна тяхIяр бархьсилизи халбируси саби дявилати стратегиялашалти бяхIчибизуни хIясиблира. Дахъал гъай гIягIнили ахIен, Европала улкназир кадиркути анар-ханарла, уряхIти, адамдешла къел-хIерзи кахIелунти, жанивартачил цугдуцести гIямруличи хIеризалли, гьар секIал якьиндирар. Муйли муйлачил, хьунри хьунрачил хъайчикабирахъес ихтияр бедибти улкнала сегъунти инсап-хIяя диэс гIягIнили? Пикридухъеная…

Ил багьандан нушала бургъантани чедибдеш сархнила хIекьлизир сеннира ташмишдеш алкIули ахIен. 1941-1945-ибти дусмазиб фашизмаличибад секьяйдали чедибдеш сархибал илкьяйдали гьаннара Россияли уряхIти адуцалаличирад чедибдеш сарху. ГIямрула хIекьдеш хIясибли бархьдеш сеннира чедибиркуси саби. ИтхIели дунъяла халкьличибад чебяхIбиэс, чула саби чеббикIибтази халбирути Гитлерла Германия Россиялис хиянатбиубсири, ишхIели биалли – Украинала дяхIлизир лерилра Европала улкни. Даршдусмала тарихлизи хIердизахIелли, гьачамалра нушала улка чисалра удибикибси ахIен. Иш гьакIлизибра чедибдеш сархнилизир ташмишдеш агара.

Нушала улка гъармукабазибад мяхIкамбирути, халкьла хъархIерагардеш ва паргъатдеш далтахъути гIяхIгъубзнала гьалар нуша даимси чеблалиурра. Дявила майдайчиб бургъули, илдани сархути игитдешла гьунартанира нуша дебали разидирулра. ИшхIели гьачамалраван ахIи, улкали гIяхIгъубзнала гьунарти черяхIли кьиматладирули сари.

Украинализиб бетурхуси дявила хасси балбуцлизир бутIакьяндеш дарес саби гIяхIъулали бахъал дагъистанланти арбашули саби. Ахъушала районна ХIерхмахьила шилизивадси МяхIяммад Сулайбановра сай гIяхIъулали, вягIда хIясибли, ВатIан багьандан ургъес СВО-лизи арякьун. БегI гьалав СВО-лизи арякьунхIели, ил Запорожьелизив пулеметчик ветаур. Дявила гьар балбуцлизир, МяхIяммадли сунечи бихьибси игьдибар марбирули, хъарбаркь ахъси даражаличиб бетурхахъулри. Илис бикьридеш дирули сари илала гъабзадешла баркьудлуманира.

Ца бархIи душмантала шайчибад МяхIяммад ургъуси дявила частьличи заклизибад бяхъ чегахъибсири. Чедирад хIярхIуби чекьурхIели, душма гьужумлизибад берцес багьандан имцIатигъунтас хандакьунази (окопунази) дигIянбикес чебуркъубсири. МяхIяммадли итмадан гьар секIал хIисаблизи касили, сай-алавтала жан дерцахъес къайгъибариб. Сунела  гIямрулисра урехи алкIниличи хIерхIеили, МяхIяммадли дигIянбикес балкьхIеурти дявила гьалмагъуни ва частьла командир хIярхIубала заблиубад берцахъиб. Илгъуна игитласи баркьуди дураберкIни багьандан МяхIяммад гъабзадешла орденничил шабагъатлавариб. Илкьяйдали МяхIяммадли Запорожьелизиб бегIлара ахъси къуббаличи Россияла чедибдешла байрахъра катIунсири. Сунени дурабуркIуси гьарил хъарбаркь урехиагардешличил, чедибдешличил ва халати жавабкардешличил бетурхахъни багьандан дявила балбуцлизир бекIдеш дирантани (командование) МяхIяммадлис ахъси кьимат бедиб.

Дявила анцIбукьуни дехIдихьибхIейчирад МяхIяммадли СВО бетурхути декIар-декIарти мераначир бутIакьяндеш дирули калун. Донбасс балтахъантала цаибси къяйлизивра левсири ил. Илав миллатчибачи къаршили ургъухIелира МяхIяммад декIарухъун. Ца суненицун душмантала лебилра часть къирбариб. Бара гьалавван МяхIяммад республикала БекIла шайзивад мургьила зубариличи ва Дагъиста халкьла игит ибси уличи лайикьикиб.

Луганскла областьлизив ургъухIели, илаб бетаурси гьужумлизив М.Сулайбанов декIли вяхъиб. Илала гIямру сунечил ургъуси дагъистанлан вархкьяли, гьалав МВД-лизив узули калунси хIянчизарли дерцахъиб. М.Сулайбановли илис халаси баркалла балахъули сай. Дронтала ва хIярхIубала заблиу викибси МяхIяммад гIяхIгъабза дагъистанланни дявила майдайчив лайхIекIили, цIализивад дурасиб. Итмадан МяхIяммад бургъанти уцахъуси вертолетличив цархIилти бяхъибтачил варх Санкт-Петербурглизи ваахъиб.

БусягIятла замана МяхIяммад сай акIубси ХIерхмахьила шилизи чарухъи сай. Чумал баз ил госпитальтазив сагъвирули калун. Гьачамлис илала дяхъурбира тамай сагъдииубли ахIен.  Мурталраван сунечила селра бурес хIейгуси МяхIяммадлизи сай вяхъниличила бурахъес тиладибарибхIелира, илини гъай къантIдариб, амма дявила гьалмагъуначи чарухъес дигниличила аргъахъиб. Ишди бурхIназив МяхIяммад сагадан дявила майдайчи арякьун. ЧевяхIсини ара-хIулкIули, сахъладиварили, чарухъабну сай.

Нушала шайзирад МяхIяммадлис чIумаси арадеш ва гIеркъати гIямру дулгулра! Гьарил кайцIуси ганзилизир Аллагьла малаикунани гIердуцаба хIуша, лебилра бургъанти, ва къалаба-къалабали чедибдеш сархили, хIушала хъалибаргуначи чардухъаба. ХIушагъунти бургъантани нушала улка балтахъули лебай, чедибдешра гъамли сари, иншаАЛЛАГь.

П.Сулайбанова