Гьар дус апрель баз гъамбикIухIели, ну Сулайбан Рабадановла гIямруличила се-биалра белкIес умцIусира. Нуни далути илала гIямрулизирадти лерилра баянтачила жявлил белкIира. Поэтличила дила макьалаби «Замана» газетализир даргала мезли, «Дагестанская правда» газетала «Разиси гумай» бикIуси бяхIлизир урус мезли дурадухъун. Илди дила хабуртала жузазира кадерхурти сари.
Ириъ Сулайбайчила се-биалра бурахъес ну тиладиухъунсири дила юлдаш Ражаб МяхIяммадович МяхIяммадовлизи. Ил, 1980 ибил дусличивад вехIихьили 1997 ибил дусличи бикайчи, Дахадаевла районнис бекIдеш дирули калунси сай, гьаларти вецIал дус КПСС-ла райкомла цаибил секретарьли узули, гIергъити верхIел дус – районна администрацияла бекIли.
ИтхIели нушала поэтуни-писательти шагьуртази ва шимази командировкабачи башутири. Илдачил варх дила шан Дагъиста халкьла поэт Сулайбан Рабадановра. Районтази дурадеркIибти архIябачиб илди, гьайгьайрагу, районна хала хIякимтачилра къаршибиркутири. Ил тяхIяр сабри нушала районнизибра.
Ражаб МяхIяммадовличирра имцIали гIур чили дагьес вирутири, гьатIи, Сулайба гIямрулизирадти баянти? СулайбанкIун Ражаб МяхIяммадовла дудешла узикьарра сайри. МяхIячкъалализи вакIибхIели, Ражаб Сулайбайчи хьуравирусири, Уркарахъи вакIалри, Сулайбан – Ражабличи
Ириъ апрель базличиб дурабухъунси Сулайбайчила дила макьалализир нуни кира Ражаб МяхIяммадовла поэтличила гьанбикуни. ЦацабехIти нушала газета бучIантас илди гIяхIдизниличилара багьурра. Ил багьандан зянкъдяхъира ишдусра Ражабличи ва Сулайбайчила цархIил се бурес вирарал хьарбаира. Илини бурибсиван гьалабирхьулра нуни хIушаб иш биштIаси, амма халаси мягIна бухIнабуцибси анцIбукьра, ахIерти нушала газета бучIанти.
Цаибти дигай хъумуртути ахIен
— Гьанбиркур наб гьачам Сулайбан бячунси някъра сайра Уркарахъи вакIили, — вехIихьиб Ражаб. — Ну илхIели КПСС-ла райкомла цаибил секретарьли узусири. Сулайбан нуни машиналичив больницализи изуси някъ сагадан бигьахъес вархьибсири. Камси замана дикили гIергъи, дила шофёр чарухъун. Сен жявли чариубсил нуни хьарбаибхIели, ил викIар: «Больницала гьала детаибхIели, ну Сулайбай, «хIед цархIил архIяра камхIебирар» викIули, вархьира».
Дяхъи сагадан бигьахъи, хIерила замана Сулайбан набчи чарухъун. «Агь, дурхIя! Тамашала анцIбукь кабикиб ишбархIи набчил. Дила някъ бигьунси больницала бекI тухтур ХIясбуллас баркаллара багьахъурли, илала кабинетлизивад дуравхъи, больницала къапула гьала ветаирагу, — гьигь къябудахъули, къалабали викIар Сулайбан, — дикьулра ну хIяйранирути кIел дев: «ВакIирив, Сулайбан?». Ахъбуцили бекI, хIерикIулра: мякьлар дила жявхIелла риганай тIашли, дила цаибти дигай. ХIу вирххIеруд набчи, дурхIя, амма, илхIели, бигьунти бинтаназибад батбухъи, сабил риганайличибяхI битIакIиб дила изуси някъ. Нуни изайчила хъумкартурра, ва гьандикиб наб жагьхIели Уркарахъир деркIибти гIямру…»
Иш макьала лукIухIели, нуни Сулайба халаси рурси ПатIиматличи зянкъдяхъира ва сунела дудешли цаибти дигай чичи дихьибтирил хьарбаира. Дила суаллис жавабла мерличиб илини дила телефонна ВАЦАП-личи кIел назмула тахта делкIунси, ранг дуунси тетрадьла кIапIи бархьиб. ГIур, набчи зянкъдяхъили, рикIар: «Жявлил ца хьунул адамли, «ишди назмула тугъи наб хIела дудешли делкIунти сари» рикIули, бурибсири. ГIур нуни ил хьунул адам чехIераира».
Нуни хIушаб иш макьалализиб, кIапилизи белкIунсиван, гьалабирхьулра назмула цаибил тахта:
«НахIа хIу ахIдакIадли, камлив хIугъунти рурсби
ХIу кьяйда жагьдешличи ахIен биубти бурси?!
Юх агара гьеч намус хIушала цIудар дяхIлеб.
Илдигъунтала мякьле гъамхIейэс дила яхI леб».
ХIера иш кIиибилра:
«Адам керкахъул хIулби,
БегIла гIергъити уммай.
Иткъи дигути чарх-бекI,
Гьанна аурти душман».
Нуни бурес хIейрусра, ит Уркухъла больницала мякьлар къарширикибси хьунул адам саррил, кьунбар тетрадьла кIапи Сулайба рурси ПатIиматлизи бедибси яра ахIенрил. Гьеч хIейрусра ну, ил кIапилизибси назму Сулайба саби викIесра. Дила пикрили, Сулайбай чедибси назму ишкьяйда лукIи бурги:
«НахIа хIу хIеракIадли,
Камлив хIугъунти рурсби,
ХIу кьяйда жагьдешличи
БиъхIебиубти бурси?!
Юх, агара гьеч намус
Ил хIела цIудар дяхIлеб.
ХIугъунтачи гъамхIейэс
Дила баари яхI леб.
Адам керкахъул хIулби,
БегIла гIергъити уммай.
Иткъи дигути чарх-бекI,
Гьанна аурти душман».
Белики, чедиб гьанбушибси анцIбукьличила бурес бирути цархIилти адамтира бургар. Наб дигахъаси илдани нушала газетализи чула пикри белкIи.
Гьанна макьалализир нуни леркулра Сулайбайчила илала халал рурси ПатIимат Рабадановала гьанбикуни.
«Шляпали бебкIализивад верцахъирра»
Хьунрала байрамлис гьалабси мартла ца бархIилизив дудеш хIянчила укьес хъуливад дуравхъун. Нушала шагьарлизиб мурталра бирусигъуна, дебали къалабаси дягI лебри нушачиб ит бархIира.
Хъуливад дуралхъуси дудешлизи, масхаралисван, неш рикIар: «ДягIли арухес асубирарну, уэнгу ишбархIи хъулив». Ил бархьсира сабри: иткъира чIукьаси дудеш, камси гьалав зягIипикили, гьатIира чIукьавиублири. Дудеш нешла гъайличи лехIхIехъиб, бекIличи чебиили мурталра бихуси шляпа, хъуливад дуравхъун.
Камси заманали, някълаб халаси уркьуйчил ил хъули чархIевхъесу. Урухриубси нешли, иличиряхI хIерризурли, хьарбаиб: «Сен жявли чариубри, Сулайбан? Се бируси нушаб шагьарла квартирализиб илцадра халаси уркьули?» «ИшбархIи ну дила шляпали бебкIализивад верцахъира», — къантIли жаваб чарбатур дудешли.
Унраличибси юртла балхонничибад дягIли арбухибси уркьули Сулайба бекIлизи чегили буилри.
ДягIлизивад урухиубси, ил ит бархIи гIур хъуливад дурахIевхъун. ИтхIейчивад вехIихьили, поэтли сунела дигуси шляпа хъулибра бекIличибад чебисуси ахIенри, бикIар.
Дудешли операция гIягIнили хIебиъниличила хIебагьур
Рузи Аминат ит дуги биштIатачил рарх бегIтачир калун. Мурул селисрил шилизи арякьири. Дай дугила замана Аминатла кани изесбииб. Иза цIакьдешли ил русахъес ралтули ахIенри. Илала цIумли лебилра хъулибти гьанкIлизибад чебаргъахъилри. Лебилра хъулибтазивад бегIлара цIакьли паргъатагарварибси ва децIикIуси нушала дудеш сайри. Илини къалабаси кумекла машина бакIахъиб, ва рурсиличил сайра больницализи арякьун.
Илабси хирургияла отделениела заведующий дудешли валуси хирург сайри. Кьанси заманаличи хIерхIеили, дудешла тилади хIясибли илра больницализи вакIиб. Хирургли Аминатлизи се изулил хьарбаиб, кани тIулбани халбариб, изала хIярхIбирахъути дармунти держахъиб. «ЗягIипси рурси нушани больницализир ралтехIе, амма савли ахIенси илис селра хIебирехIе», — викIар ил дудешлизи ва хъули арякьун.
Дугели зягIиптачи хIеруди бируси тухтурли дила рузис сукъур рудла операция бариб.
ГIергъиси бархIи Каспийск шагьарлизив хирургли узуси Аминатла мурул шилизивад чарухъун. Операция барибси тухтурличилси ихтилатлизибад илини сунела хьуна рудла изала агарли биъниличила багьур. Рахъ дебали изахъули язихъриубси рурси чериули шишимтази викибси дудешла тилади хIясибли барибси буилри дежурный тухтурли операция. Нушани дудешлизи хIяжатли ахIенси операция барили биъниличила хIебурира.
ШягIирла гIямрула бегIла гIергъити кIел бархIи
1995 ибил дусла апрельла 26. ХIянчиличивад хъули лявкьуси дила дудеш Ленинна уличилси кьакьалабси ца автобусуни тIашиуси мерличив чучи аркьуси автобусличи хIерлири. Хабарра агарли илав илис дила халаси урши Шамил къаршивикили сай. Камси заманали дила дудешра уршира нушачи бакIиб. «Агь, рурси! Дебали разивикира ну ишбархIи, Шамил чеваибхIели. ИлхIели наб сагали акIубсиван бизур», — ибсири илини набзи. Наб биалли, дудеш селирил вамкьахъурсиван ва пашманиубсиван бизур.
БархIехъ дила мурул СягIид хъули чарухъун, ва нушани, маслигIятбарили, дуги беркIахъес, дудеш нушачив калахъунра. «ГьанкI чебакIили сабину, усаэс дигулра», — викIар набзи дудеш, камси замана дикили гIергъи. Ил усуси хъули ну чуйнара дигIянали арацира. Дудеш усули ахIенри: ил пикрумази ухIнайкили виэс гIягIнилири.
Савли илини хIянчила укьес кьасбариб. «Нуни хIу машиналичив хIянчила аркури», — викIар СягIид. Дудеш савлила беркай хIевкун, амма камси держла бержес хьулухъун. Дудеш зягIипикили виъниличи ну шакриркулри. Ил багьандан бурги, нуни илис бержесил кахIекьурра. Хъуливад дураулхъухIели, ил хIилхIи калун унзала мякьлав каркули. КахIейкахъес ну ралкьаурра. ИтхIели 50 кг-ла битIакIла вегI дудеш (имцIа хIебурги) наб дебали декIсиван визурсири.
СягIидра шакикиб виэс дудеш зягIипикниличи, илини ил, хIянчила хIевкили, хъули арукиб. Гьунчив дудеш халаси урши МяхIяммадличи укахъес тиладивикIули уилри. «Ну Сулайбан уршиличи хIевкниличи дебали пашманиубра», — викIули вири дила мурул. Ил анцIбукь гьанбикалри, СягIид вебкIайчи сунечи сай гIяйибта виркьи.
Апрельла 27-личив дудеш абзур бархIи хъулив кайхьи калун. Михъири изули викIули зигарикIи. БархIехъ бакIибси къалабаси кумек илис кумекбарес балкьхIеур.
Дагъиста халкьла поэт Сулайбан Рабаданов акIубсири 1932 ибил дусла апрельла 22-личив, вебкIибсири 1995-ибил дусла апрельла 27-личив. 63 дусцун сарри ЧевяхIсини илис делкIунти.
ХIяжимурад Ражабов
