Юсупова Музрикат ГIябдулмажидовна  акIубси сари хIурматчебси, бахъал дурхIнала хъалибарглизир. Илала верхIел узира кIел рузира леб. Дудеш ГIябдулмажид МяхIяммадов колхозлизив тракторличив узули калунсири. Илини халаси, хIялалси бузери бариб хъалибарг абикьес багьандан. Неш Хадижат БяхIяммаевани дурхIначи хIеруди ва хъулирти хIянчи дирулри.

Музрикат  ручIули калун Къизлар шагьарлизибси школа-интернатлизир. ГIур 1996 ибил дуслизиб школа-интернат таманбарили гIергъи, Дагъиста пачалихъла университетлизи карерхур. Ил университетлизир ручIули, «Менеджмент» санигIятличил регIриуб.

Музрикат Юсупова жура-журала къуллукъуначир рузули калун. Къизлар шагьарлизибси судебный участоклизир курьерли рузули сунела бузерила гьуни бехIбихьиб, илаб илини авал дус хIянчи бариб, вецIал дус  Москвализир «Смик Рус» бикIуси ООО-лизир — продавец–консультантли. Гьанна биалли, вецIал дус Ахъушала районна Куркила шила администрацияла  бекIла заместительли рузули сари.

Музрикатли сунечи хъарси хIянчи жавабкардешличил бекIбиру. Сунечи дугьабилзути  Куркила шила халкьла мурадуни детурхахъу. Илис гьаман районна центрлизира рашес чевкъули бирар, адамтала къуллукъуни дарес ва сунечи хъарси хIянчи дураберкIес багьандан.

Музрикатла бегIтани ил гIяхIси бяркъчерсили ва халатала хIурматбирусили халараахъиб.

Илини сунела гIямрула вархкья ХIясан Юсуповличил барх хIябал дурхIя абилкьули сари. Илдасра гIяхIси бяркъра бедили, багьудира касахъили, гIямрула дякьличи дураиб. ХIясан ДорСервислизив къараулли ва тренерла кумекчили узули сай.

Ца уршира рурсира колледжлизиб бучIули саби, риштIалгъуна рурси школализир авъибил класслизир ручIули лерал

ГIямрулизир сархибдешуни имцIадикIули,  дигутани разирирули гIямру деркIес кьадарбиаб хIед, Музрикат!

Сабият ГIябдуллаева