…Редакцияла хIянчизартани, корреспондентуни ахIентанира, адамти-ургарти тяхIяр-кьяйда, чили се гIяхIси бирулил, чили сунечила гIяхIси гъай бурахъулил балули бирар, сенахIенну гьар журала хабурти дикьули сари ва иличибли баркалла сархибси чи саял балули саби.
Чумал бархIи гьалаб редакциялизиб ихтилат бетаурхIели газетала оператор ПатIимат ГIябдуллаевани ва программист Жуират Ражбадиновани иб:
– Бахъал адамти баркалла бикIулигу Майя Айгубовнала уршилис! Нушала газетализи белкIес гIяхIсири иличила!
Марлира, дубурлантала гIядат илгъуна саби – чила биалра у баркаллаличил бурес гьалаб илала бегIти гьанбуршни.
Майя Айгубовна авцIанну шура дус школализир рузули, урхIла дурхIнира сунелаван чебиули, илдала кьисматличи уркIи изахъули хIеррируси, дебали пагьмучерси, сунела санигIят ункъли бяркъурси педагог сари. Нешла мезличи бучIантазир диги адилкьнила шайчир, ил дахъал дусмазир районна учительтас гIибрат сари. Гьар дус республикала олимпиадаличи бучIанти бикули, илдани гьаларти мерани дурцухIели, цархIилти районтазибадти илизи бикIутири: «Гьачам-биалра хIеракIили руэнгу дила рузи, хIела бучIанти агархIели, нушаб гьалабси мер бикесну!»
Илгъуна нешли айкьурси уршилизирра хIедиэс дирару цархIилла дард аргъеси уркIира къияндикибсилис кумеквиэс адамдешра!
Хаслира юристли узуси дудешла хъулив ил халаваибси виъни пикрибаралли, суненира арагIебли Уголовный кодекс уркIиличиб балуси! ГIямрулизивад жявли арякьун ГIяли Кьурбанович, – гьанна виалри, чумилра насихIят дуриши уршилизи, – виалра ил урши Дагъистан Республикала Правительствола Председательла цаибил заместитель!
…ПикририкIулра, сен-сен имканбикIусира ГIялиев Руслан ГIялиевичличила белкIес или: ил районнизи вакIибхIели къарширикес бетарниличи умут агара, шагьарлизир къарширикес – ил гьатIира бетхIеэсигъуна анцIбукь саби, се баралли гIяхIсира?
Ахъушала шилизив гьар бархIира–сера чейули халаваибси виалра, илхIейчибад халаси заманара арбякьи, гIямрула гьундурира чинаралра къаршихIедикиб диалли!
Иш гьакIлисра наб кумекличи ракIиб газетала корреспондент Сабият ГIябдуллаева, суненира нуниван ахIи, Интернетла «дигIяндешуни» гIяхIил далуси.
– ХIера, ишар Руслан ГIялиевичличила лерилра баянти лер! – гьаладихьиб илини белкIаначилти чумал кIапIи, ва ну халаси иштяхIличил лукIес рехIрихьира…
ГIялиев Руслан ГIялиевич акIубси сай 1974 ибил дуслизив Ахъушала шилизив. 1997 ибил дуслизиб Дагъиста шила хозяйствола институт таманбариб. Бузерила гьуни бехIбихьиб «Федеральная продовольственная корпорация» ибси уличилси организациялизи кабурхуси Дагъистан Республикала агентстволизив экономикала ва маркетингла шайчив ведущий специалистла къуллукъличиб.
Ца дус дикили гIергъи хIянчилизив гIяхIил бажардииркуси жагьил специалист Дагъистан Республикала шила хозяйствола Министерствола берк-бержла рынокунала бузери къелгIеббикуси Департаментлизи – организациябала госзаказуни хIядурдируси ва сетанази кадирхьуси отделла ведущий специалистла хIянчиличи шурватур.
ГIур узули калун урегал дус Дагъистан Республикала Правительствола берк-бержла рынокунала шайчибси Департаментла начальникла заместительли.
2006-ибил дуслизив Руслан ГIялиевич шурухъун Дагъистан Республикала финансунала Министерстволизи – финансунала рынокла ва кредитунала отделла бекIливиубсигъуна специалист – экспертла къуллукъличи.
2011 ибил дуслизиб Р.ГIялиевли, заочно учIули, РФ-ла Президентли абхьибси Россияла пачалихъла кабизла академия таманбариб «Управление персоналом» ибси санигIят хIясибли.
2014 ибил дусличи бикайчи, ДР-ла финансунала Министерстволизив отделла начальникли, ил дусличивад вехIихьили, 2020-ибил дусличи бикайчи, ДР-ла финансунала министрла заместительли узусири.
2020-ибил дуслизив Руслан ГIялиевич Дагъистан Республикала экономикала ва мер-муса гьаладяхI дашахънила министр вариб ва ил къуллукъличив ца дусра кIел базра узули кали гIергъи 2022 ибил дусла февральла 27-личив Дагъистан Республикала БекIла ХIукму хIясибли, Дагъистан Республикала Правительствола Председательла Цаибил заместительла къуллукъличи катур.
Сегъуна гьаб-гIергъидешличил, кабизалачердешличил ихъулил бузерила гьуни Руслан ГIялиевичли! Ил сабабли дургар касибти хIурматла умира: «Дагъистан Республикала хIукуматла цаибил даражала насихIятчи», «Дагъистан Республикала урибси экономист».
ИмцIадикIаб гIурра халкь–ургар хIурматра, хIурматла умира, бахъбикIаб баркалла бикIутира! Адамтала баркалла сархни – ил сабигу гьарил санигIятлизиб бегIлара мягIничебси.
П.Маллаева
