ЦIедешла анхълизи ухIнавхъалли, гьарилли пикри бяхIчииули бирар иларти галгубала декIардешличи. ЦадехIла цIедешли дерхъибти кьялуби дялчули дирар, цархIилти камти цIедешра далдардухъи, кIарала вяшарла тIамраур лехIли дирар, хIябэсти, биалли, сегъунтилра цIедеш агарли, ванзалис дяхIцIи аурли ва цархIилти галгубас диргаладулхъули, тIашли дирар. Адамтира илди галгубачил цугбурцули рирус нуни. Творчестволизиб бузути адамти бирар берхъибси цIедешла галгаличи мешути. Амма поэтли сунела творчестволизир «дашахъути цIедеш» азир рангла ва лергIер бизиси тIемла дирар. Поэтли иш дунъяличиб бегIлара чебяхIси тах буцибси саби викIалра хатIа бетхIерар. ЧIянкIли ил рухIла тах саби. Илизи хIякимдешла тахла ари бедалри, иш дунъяличир сегъунтилра анцIкьи-децI хIедири, адамти гьалжанализибван хIербири, нешанала ляжубачирадли чIянкIли талихIлацун нургъби гердикIи, хIулкIути биштIатала дукелцIили ванза шадбирахъи, биса-ясра дургъбира агардири… Сепайда,…
Даргала литературализиб белгиси мер буцибси, дахъал дусмазиб сунела районна «Эркиндешличи» газетала редакциялизиб сабухъчебси хIянчи барибси гъабза сай Айдимир Каймаразов.
Ил акIубси сай Сергокъалала районна УбяхI МулебкIила администрациялизи кабурхуси ЦIурмахьила шилизив. Ил жагаси тIабигIятла мерличир ардякьунтири илала цайкьяшмачил деркIибти гьамадли ахIенти дурхIядеш. ВиштIали левай илини хъуми далцутири, маза-мас дуки дикутири, вацIализи урцуйчи вашусири. Къиянти дурхIядешличил дархдасунтири илала гьанбикуни. Илини декIти ва къиянти хIянчири дирутира.
А.Каймаразов 15 дус виубхIели илала дудеш вебкIибсири. Урегал цIуръа дурхIя хIербарес хъарбикибтири нешличи. Дуги-хIери хIерикIули, неш колхозла хIянчиличир авлахъличир ва сунела хозяйстволизир рузусири. Илала дурхIнани биштIали лебалли илкьяйдали багьурсири хIянчила, майъала зукьидешла ва кьацIла кьимат.
Айдимирла хала дудеш Каймараз машгьурси къаркъала уста вирусири. Илини Дагъиста декIар-декIарти шимазир арсаварти, минараби дирутири. ХIурхъила шилизибси минарара илини сабри барибси. Ил гьаннара хала дудешличила гьанбиркахъуси дурхъаси памятникван тIашли саби. Хала дудеш вебкIибсири сунела урши, Айдимирла дудеш Каймараз адхIекIубли левалли.
Илала дудеш Каймараз акIубси сай 1926 ибил дуслизив. Илра сунела дудешла дякькад арякьунсири. Ил 39 дусцун сайри виубси. Илала гIямрула гьуни къантIси биалра, илини къаркъализирадли дарибти дебали жагати гIягIниахълуми гIелар датур, къаркъаличир макьамтира зайдикIахъутири илини.
Айдимир Каймаразов акIубси сай 1949 ибил дусла августла цаличив. 1969 ибил дуслизиб илини УбяхI МулебкIила урга даражала школа таманбарибсири, 1974 ибил дуслизиб – МяхIячкъалала шила хозяйствола техникум. Сай акIубси ЦIурмахьи илини 18 дус виубхIели бархьбатурсири. 1970 ибил дуслизир илини Южно-Сухокумсклизив набтла буругъуназив узули, сунела бузерила цаибти гунзри кацIибтири.
1972 ибил дуслизив Айдимир Каймаразов Сергокъалала районна «Эркиндешличи» бикIуси газетализив корреспондентли узес вехIихьибсири. 1980 ибил дусличивадли 2011 ибил дусличи бикайчи ил газетала редакциялизив жавабла секретарьли, 2011 ибил дусличивадли редакторла заместительли узиб.
1974 ибил дусличирадли илини назмурти, сатирала къантIти хабурти, фельетонти, новеллаби, очеркуни ва цархIилти жанрабала макьалаби лукIутири ва илди газетализир дурадулхъутири.
Айдимир Каймаразовла назмуртала ва прозала 7 жуз дурадухъи сари. Илала назмурти имцIаливан ВатIайчила, патриотизмаличила, вегI акIубси мер-мусаличи дигили ламдикIути, сатирала, адамла зугIлумачила, инсантала уряхIти баркьудлумачила, гIямрула цIябти шалубачила сарри.
БучIанти мурталра бархбаси бирутири чула дигуси поэтличил. Илдани чула шимази Айдимир Каймаразов живирусири. Районна шимазир иличил илкьяйдали чумра гьунибаъни, поэзия литературала вечерти дурадуркIутири, илала поэзия, литература ва даргала мез дигантани.
А.Каймаразов Россияла писательтала ва журналистунала Союзунала член, Дагъистан Республикала культурала урибси хIянчизар, Сергокъалала районна хIурматла гражданин сай. Гъалличирра имцIали Россияла, республикала ва районна ХIурматла Грамоталичи лайикьикибси сай. Амма сунела жузи дураэс илис гьамадли ахIенри. А.Каймаразов викIусири сунела гIямрула бетуц лукIнилизиб саби или. «Даргала цархIилти районти халхIедаралра, дила районнизиб 10 азирличибра имцIали газета бучIанти леб. Ил дила гIямрула бекIлибиубсигъуна давла саби, цархIил давла наб хIяжатлира ахIен», — викIусири шягIир.
Поэтла уркIи-хIял, пикруми-кьасани ва адамдешла бетуцуни, адамтачи диги сегъунтирил ункъли дагьес вирар илала назмурти делчIаллира. ХIера, сейкIулил ил «Нешани берцахъая!» ибси назмулизив:
«Ца бархIи чеббикIили,
«Нешла БархIи» дикIулра,
Гьар бархIи нешла биъни
Нушани хIебалулра.
Нешанала дурхъадеш
КьиматлахIебирулра,
Нешла амру бихули
ГанздикIес хIедирулра.
Нуша адикьес сунни
Азир къиян ихъалра,
Нушани нушала неш
ДецIлизи риркахъулра.
ХIебареси бирулра,
ХIебуреси бурулра,
Имайзирадли духъи,
Нешла дяхI думкьахъулра.
ИшбархIи нешанала
ДекIти сари гIязабти,
ИшбархIи Дагъистайзир
Хумарли сар дубурти.
ЧIакнас – хIурхъи, чатIнас – хIеб
АхIен гьанна паргъатли,
Бахъ камлигу нешани
ХIербирути дяхI датли.
Дагъистайзир гьар бархIи
Дару сар даргудули,
Гьарил унзала гIелав
Ламартчи сай хIядурли.
Ласли саб зулмукарти
Дугили хIебусули,
ЦIуръаби ва нешани
Чебиулра бисули.
Замана саб дикIулра
Нушачиб вайбиубли,
Замана ахIен вайси,
Инсан сай багьиубси.
КIибяхIянта даталли,
КIибайхIедирар урукIби,
Зулмукарта даталли,
ХIедисур нешла хIулби.
Нешанала дарданас
Дарман чили дургули,
Дагъистайзир хIярхIуби
Чили, мурт тIашиути?!
Эй, нешана даркьибти!
Нешани берцахъая,
Сепайда, ил аргъесцад
Инса дагьри агара».
Нешличи уркIи-уркIиларадти ва хIялалти дигила вегIлицун вирар илдигъунти пикруми дурес. Поэтла илдигъунти мурхьси мягIнала назмурти делчIунсини нешла хIурмат хIебарес хIейрар.
Айдимир Каймаразов кьакьавикIули сай республикализир кадиркути вайти анцIбукьунани нешани бисахъниличила.
ИшхIелла манзиллизив ил мицIирли виалри, сейкIишира?!
Нешличила дуцIарти дигили ламбикIахъуси илала уркIилизир мурталра илис дезала дугьби алкIули сари:
«Лебил гIяламлис дутIес
ХIела малхIямдеш диур,
Неш, хIела чебла ахъес
Дунъяла мас хIебиур.
Нуша гьаргхIедиахъес
ХIурхъиван хIянриубил,
Нуша гушхIедиахъес
ХIу чуйна гушриубри?
КIантI-кIантIли хIела ахъри
ХIуни нушаб харжбарри,
ХIедисули дусахъес
Азирна гьанкI батурри.
Нуша – цIуръабас хъали
ХIуни шалабиради,
Нуша – ятимтас анкъи
ХIуни ванабиради.
Нушаб талихI булгули,
Чумдарш балга дарири?
Нуша гьанни рузули,
Неш, хIу рухънараири…»
Нешличила назмурти хIеделкIунси дунъяличив цалра поэт хIергар викIалра хатIа бетхIерар. Амма шягIиртани сецад илди лукIаллира, цаличир ца мягIничерти ва жагали зайдикIути сари. Нешла уркIиван…
Илкьяйдали адамла уркIи-рухIличи асарбарести сари шягIирла лерилра назмурти. Илала «БегIла жагати гIямру» ибси назмулизив ил бусурман динничи чекайзурси ва хIялалли хIерируси виъни багьесли саби:
«ХIянчилав, архIяличив
ВегIли ункъли хIегьурси,
Гапирни яра валтIни
АхIен баркьуди гIяхIси.
БегIла бизиси, гIяхIси,
Ца саб беркала лебси,
ХIярамдеш барх агарли
ВегIла някъба сархибси.
Иш дунъяла къакъличир
БегIла жагати гIямру,
Бихусила сар илди
Сунни Аллагьла амру».
Гьайгьайрагу, вегIла ВатIайчила бегIла гIяхIси далай зайхIебухъахъунси поэт поэт ахIен. А.Каймаразовлира ахIерси улкалис, ватIайс хасдарибти, жагьилтас патриот бяркъ бедлугути назмурти делкIун. ХIера, сейкIулил ил «Дагъистан» бикIуси назмулизив:
«Ассаламу гIялайкум,
УркIи цIала Дагъистан,
ЧIакнани чеббикIибси,
Дила лусентар ВатIан.
Чум-чумилра чябхъинчи
ХIу чус барес чебухъун,
Амма чулахъбиубли
ГIелабяхIли чарбухъун…»
ШягIирли Дубуртар Улкала уркIи цIала саби ибси пикри дубурлантала уркIби ил цIализирадли акIубти ва дунъяличирти зугIлуми дигахъес, бяргIибти ванабиахъес, хIяжатбикибхIели душман верцIахъес… алкунти сарливан иргъули саби. Гьарли-марли, поэтли буруливан, ил пикри чуйнара марбиубсира саби. Дубурланти дунъяличиб къияндикибсиличи ламигъуна малхIямдешличил гъамбирути, ВатIай жиибхIели цIала тIякьван ил батахъес дурабулхъути, гьунарти ва кьуват чедаахъес жибарибхIели, чIянкIли чедибдешличил Дагъистайзи чарбулхъути саби. Илдала гъабзадешличила чумра поэтли, писательли, журналистли пахруличил белкIани дирути сари мурталра. Илдала лугIилизивадси сай ванзала дайлар мургьи дургуси специалистливан багьадуртачи лайикьти цугбуцуни луцIули, назмурти алкIахъуси шягIир.
Айдимир Каймаразовла творчестволизиб белгиси мер бурцули саби сатирала ва критикаличил рушбатчиби, къалпчиби балтIути назмуртанира. «Халкьлис гIянкIа батурли» бикIуси назмулизиб поэтли рушбатчиби хIякимти балтIули сай:
«Сецад леба ишбархIи
Пачалихъла хIякимти,
Чус лайикьли ахIенти
Утначи кабиибти.
Рушбатли саби илди
Илкьяйда ахъбарибти,
Ахмах буйрухъикIуйхIиб
Язихъли саб бузути.
Рушбатли ахъбарибти
Чебиулра сакIубли,
Халкьлис гIянкIа батурли
Чуду чули букути.
Аллагь гьанушес чула
Заманара агара,
ХIяжатли ахIен илдас
Арц лерхIели, хIяяра».
ЖамигIятла гIямру агъуладирули, саби хIяйтлизиб хIербирути хIякимтачи лергIер далдикибти гъай сари авторла. ГIергъиси замана илдигъунти хIякимтази ари бикибхIели сари адамла гIямрулизи лергIер дахъал зугIлумала хIеркI бухIнабикибсира. Бархьси саби, ихтиюрти хIякимтазир сари, къияндешуни гIядатла адамтас сари.
Адамла кьисмат гIяхIбухъахъес, хIяяагартала уряхIти баркьудлуми агардиахъес, чеалкIуси наслулис талихIла нур пешкешбарес,… бузутала кьукьялизивадсири пагьмучевси поэт, гIядатла дубурлан Айдимир Каймаразов. Илдигъунти адамтани гIямрула бетуц барсбарес имканти хIедургаллира, сеннира адамтази ишхIелла манзилла гIяхIтира вайтира шалуби чедиахъес, рухIлашалси нурли адамтала уркIби ванадирести далилти дургули сари. Поэт бархьдешла шалда, балкIдешлис шанда хIярхIя, талихIлис гьуни чебиахъуси Зугьра зубари сай.
Сецад хIейгеси биалра, гIямру бегIлара вавалидяхъибхIели Айдимир Каймаразовли шалал дунъя бархьбатур. Иличибли даргала поэзияла заклизиб цагьатIи зубари гъагултани буциб. Амма ил хIебишун. Ил шягIирла поэзиялизиб чеалкIуси наслулис даимлис шалабикIули кавлан.
Тамара ГIябдусалимова
