ИшбархIила манзиллизиб дебали мягIничебсили бетарули саби халати жавабкардешличил, халкьличила, улкала челябкьлаличила пикриличил руководительли сунела бузери  дурабуркIни.  Нушани гьалабра бурибсири МухIела шила администрацияла бекI Ислам Муртазаевла къайгъначила. Шанти-ургав валгунси шила бекIличила сагали белкIес сабаб леб — илала къайгъни Дагъистан Республикали ахъли кьиматладарили диъни.

Ислам Муртазаевла бузерила гьуни 2013 ибил дуслизиб «Ахъушала район» МО-ла администрацияла кьайгимдешла ва дурхIнала ихтиюрти далтахъуси отделла ведущий специалистла къуллукъличиб бехIбихьибси саби. Илини чебяхIси   даражала кIел багьуди касили сай — ДГУ-ла биологияла ва юридический факультетуни тамандариб. Муниципальный кабизла цаибил классла референтла уличи лайикьвикили сай. 2017 ибил дуслизив Россияла багьудила Академиялизибси багьудилис гьуни чебиахънила шайчибси институтлизив багьудлуми ахъдурцути курсаначив учIули калун.

Илини гIергъити шел дус МухIела шила администрацияла бекIла хIянчи дирули сай ва шантала баркаллаличи лайикьвикили сай. Ишди бурхIназиб биалли, нушани багьурра Ислам Муртазаевлис   «Дагъиста Халкьла Игит» ибси у бедниличила.

Илгъуна разиси анцIбукьличил  бархбасахъи, И.Муртазаев мубаракварира ва иличил ихтилат дураберкIира.

– Ислам ГIямарович, селичивад вехIихьири хIу шила бекIла къуллукъличи халкьли викIибхIели?

— Нуни бусягIят пикри бяхIчиаира шила духIнарти  масъултачи, сарира дебали аргъбаибтили детаурти: шанти дужути шинничил гIеббурцнила, гьундури къулайси агиличи дуршнила, багьудила, медицинала учреждениебазир шуртIри ункъдирнила шайчирти масъулти бекIдирес вехIихьира.

Районна бекIла къуллукъличи МяхIяч ГIябдулкаримов викIили гIергъи, декIар-декIарти программабази кабурхахънила ва илди хIясибли хIянчи дурадуркIнила шайчиб район дебали гьалабяхI арбякьун. «100 школа» ибси уличилси программа хIясибли, МухIела шилизирти Сагид ГIябдуллаевла уличилси лицей ва Сумен Кьурбановла уличилси гимназия мерладиубти юртаназиб лутIи-хьулчилизибад ремонт дураберкIибсири. Ириъ капитальный ремонт бетерхурсири  шилизибси дурхIнала анхъла мер-мусаличибра.

Илкьяйдали, шинишдеш имцIабиахънилис хасбарибси респуб- ликала программа хIясибли ши-алавти мер-мусаличир, ва гьундурала дубаникад 600 галга удатуртири.

Федеральный «Умути шин» проект хIясибли, шилизи шин кибти сари 9 километрла гьарахъси мерличирад. КIел резервуарра, шин умудирути гIягIниахълуми дархли хIянчила харжани 23 миллион къурушличи адикиб. Къуюбира дарили, гьарил юртлизи шинра дукибти сари.

«Шагьарла къулайти шуртIри» ва «Мерличирти сиптаби» бикIути программаби хIясибли авал объект далкьаахъурти сари.

Шилизир илди объектуни дирухIели, арцла бегIтанира  бутIакьяндеш дариб. Мисаллис буралли, М.ХIяжиевла уличилси кьакьализир хIянчи дурадуркIухIели, ахъри лебти мухIентани кумекбариб ца миллион 500 азир къурушла кьадарлизиб.

– МухIела шилизиб гьаннала тIалабуначи балбикибси амбулатория къантIси заманала бухIнаб балкьаахъурсири. Илала чебкад се бурида?

– Федеральная программала дазурбазиб, байхъала дусла бухIнаб кIидерхIла юрт балкьаахъурли, амбулатория бузес бехIбихьибси саби ва бархIилис 100-личи гъамли адам кьабулбарес имканти лер. Ишар дузули сари 4 палата, сарира хIерила замана зягIипти сагъбирес хасдарибти, чузир 8 мер лерти.  Лерилра гIягIниахълуми сагати сари. 950 квадратный метрла чIябар буцибси ил объектра мякьлаб лабораторияра дирни 38 миллион къурушличи абикиб. Алавчарти мер-муса къулайси агиличи дуршнила хIянчи дурадеркIибти сари шантала – меценатунала харжаначил.

– ГIергъити дусмазир детерхахъурти  хIянчиличила се бурес вирара?

– Шантас дебали хIяжатсилизи бейгIеси хIянчи саби кьакьурби  шаладирнила. Шила бекIлибиубси кьакьакад, 1500 метрла бухъяндешличилси мерличи, дугила замана шаладикIути гIягIниахълуми кадихьибти сари, шилизи ухIнаулхъуси мерличира даршибти сари чиргъми, 101 тIал тIашдатурли.

Шила администрацияла Юртлизибра капитальный ремонт дураберкIибсири. ДурхIнала анхълизир дарибти хIянчила харжани районна бюджетлизирадти сари.

Илкьяйдали, ремонтбарибси саби Россияла почтала отделение мерлабиубси Юрт. «Мерличирти сиптаби» бикIуси проект хIясибли 15 миллионничи гъамли арц харждарибти сари. Къулайси агиличи душибти сари ЧебяхIси ВатIа дергълизиб алхунтас хасбарибси памятник ва алавчарти мер-муса.

– Шила духIнар дурадеркIибти цархIилти хIянчиличилара  бурили  дигахъира.

– МухIела ши гIергъити дусмазиб дебали халабаили саби. Шила  бекIлибиубси кьакьала бухъяндеш 5 километрличи абикиб, лебилра кьакьа сагали къирли буцибси саби. Шила бухIнабси цагьатIи кьакьа, 2 километрла, къулайси агиличи бушибси саби, ил кьакьа къирли кабуцес гьалаб 975 метрла бухъянси шинна провод сагали кабихьибси саби.

Гьундурачирти  хIянчи детерхахъурти сари гьундурала Фондла ва транспортла Министерствола харжаначил.

Бетонни буцибси саби Социалист Бузерила Игит ГIябдуллагь Уллуевла уличилси кьакьа.

Шила духIнарти кьакьурби, гьундури, алавчарти мер-муса къулайси агиличи дуршнила шайчирти хIянчи бусягIятра даимдиубли лер.

Сагид ГIябдуллаевла уличилси кьакьа меценатунала харжаначил къулайси агиличи бушибси саби – 300 метрла бухъяндешла; ил кьакьала 410 метрцад бетонни буцибси саби, транспортла Министерстволи.

– МухIенти дебали сахаватти, бурибси гъай бетурхахъниличил машгьурти саби, шила бекI сайливан, хIуни илдачила се бурида?

– МухIела шила шанти уржибти, дахъал гъай агарли хIяжатси барес къайгъила бегIтиван, цархIилтас гIибратли бетаурли саби. Бахъал леб мухIенти шила дураб, Россияла декIар-декIарти шагьуртазиб ункъли хIербирути, шилис гIяхIдеш барес ахърила бегIти, илдани чула чеблализи буйгIули саби  шилис ва  шантас се-биалра гIяхIси барес.

Меценатунала – кумекла  бегIтала къайгъиличил дарибти хIянчиличила бурасли, илди камти ахIен: шила бухIнаб муръаличи кабируси мер ва «Москва» ибси уличилси дурхIнас хасбарибси майдан далкьаахъни; Чедибдешла БархIилис хасбарибси паркла мер-муса къулайси агиличи душни; шила духIнарад канализацияла турбаби кадихьни – 1500 метрла бухъяндешличи; забла шин ардашахъес мер барни – 80 метрла бухъяндешла; сагаси амбулаторияла Юртлизи шинра хутIра дукили, алавчарти мер-муса къулайси агиличи душни.

Бурес чебиркур, «Беларусь» журала трактор тIалаббарниличила, сабира хасти  гIягIниахълумачил балкьаахъурси: дегIнуби шинни иркуси, кьакьурби умудируси, дяхIи ушкуси.

– Ислам ГIямарович, шила бекI сайливан, «МухIи» ибси уличилси фонд акIахъубли, СВО-ла бутIакьянчибас ва илдала  хъалибаргунас кумек гIеббурцнила шайчиб хIуни бируси хIянчи районнизибцунра ахIи, республикализибра кьиматлабарили саби. Илала черкадра дурести камли хIедургар?

– Дявила хасси балбуц бехIбихьибти бурхIназибал кумекла хIянчира хIяжатли биъни пикрибарили акIахъубсири хасси Фонд, «МухIи» ибси ура бихьили.

Ил фондлизи сунела шайзибад пай кахIебихьибси цалра хъалибарг кахIелун МухIела шилизиб ва дураб хIербирути – ургаб. Шантани кумеклис дучибти арцлизирад 8 миллион къурушла кьадарлизиб кумек бархьибси саби СВО-ла бутIакьянчибас. ХIеруди агарли батурти ахIен илдала гъамтира, хъалибаргунира. Ишдусла хIеблизиб абхьибси саби «Гьанбикунала анхъ» – дявила хасси балбуцлизиб алхунти мухIенти гьанбиркахънилис хасбарибси.

Ил парк хасбарибси саби ВатIанра, халкьра, улкала челябкьлара багьандан алхунти лебилра гIяхIгъубзни гьанбиркахънилис. «Гьанбикунала анхъ» бирухIелира шантани чула  харжанас дахъал галгуби асиб. МухIела шилизиб бахъал хIунтIена партизанти, мискин халкь гIеббуцибти, Совет хIукумат дебабиахъес къайгъни дакIударибти адамти бирутири; ЧебяхIси  ВатIа дергълизи арбякьунти саби МухIела шилизибад 300-личи гъамли адам. ЧархIебухъун — 200-личи гъамли. 50 адамли офицерла звание  касиб. Сумен Кьурбанов Советский Союзла Игитла уличи лайикьикиб.

МухIела шилизибадти жагьил адамтани Афганиста ва Сирияла мер-мусаличир кадикибти дявила анцIбукьуназир бутIакьяндеш дариб ва илар чула жан кьурбандарибтира биуб; СВО бехIбихьибхIейчирад бахъал мухIенти Россияла хъархIерагардеш багьандан гIямру мяштIхIедирули, бургъули саби. Лебилра илди гьанбиркахъес гIягIнили саби.

– ХIела къайгъни кьиматладарнилис бикьрили  бетаур «Дагъиста халкьла Игит» ибси у гибни. Сегъунти пикруми, кьасани акIахъуба хIезир илгъуна разиси анцIбукьли?

– ГьатIира халаси къайгъи дакIубарес дила шиличила ва шантачила – илгъуна саби цаибси кьас. Нуни баркалла балахъулра дила шантас, шантани  гIебхIебуцили гIергъи шила бекIла баркьуди гьалабяхI башес  бируси ахIен. Илис гьаларра наб гибтири Дагъистан Республикала Правительствола  Баркаллала кагъар – халкьла гIяхIти гIядатуни гьаладяхI дашахънилис; медаль – Советский Союзла Игит, МухIела шилизивадси Сумен Кьурбанов алхунси мерличи «МухIи-Керчь» ибси уличилси автопробег дураберкIнилис; ДР-ла Миллатла политикала ва динна къуллукъуназиб бузуси Министерствола шайзибад Баркаллала кагъар – «Сен сайри, унра?» бикIуси проект бетерхахънилизир бутIакьяндеш дарнилис.

Районна администрациялира дила къайгъни чехIедаили кавлули ахIен ва чумал ХIурматла Грамоталичил шабагъатлаварилра.

ИшбархIи нушазивад  гьарилла чебла – шила бекI виаб, гIядатла зяхIматчи виаб, улкала цадеш калахъес бургъути  гIеббуцни, ВатIан багьандан чула жан харждарибти хъумхIертни, нушала жагьилтазир балгундешла, улкала тарихла ва халкьла гIяхIти гIядатунала хIурматбирнила тяхIяр-кьяйда адикьни, челябкьла паргъатси биахънилизи пай кабихьни. Илдигъунти сари дила пикрумира кьасанира.

– Кьасани детерхахъес Аллагь икьалавиаб хIед, хIурматла Ислам ГIямарович!

 — Баркалла!

ПатIимат Маллаева