Россияла Игит МяхIяммад НурбяхIяндовла уличилси Сергокъалала кIиибил школала хьулчиличиб районна бегIлара гIяхIти выпускникунас медальти дедлунила балбуц бетерхур. Медальти мургьилацун ахIенрину дедлугути, гIяхIцад дусмазир бегI гьалар выпускникунас арцла шабагъатунира дедиб.
Сецад къияндешуни ахъес чебуркъуба челябкьлализиб студентунили бетарути жагьилтас? Илди медальтазир чедиули сари гьанкI хIехъибти дугурби, юлдашуначил къаршибикес бетрхIеурти гьунибаъниби ва халаси сабурла анцIбукьуни. Амма районна гъану урегра медалистли ца тIамаличил бурули саби – илди секIайзибад мяхIрумбиъниличи сегъуналра пашмандеш агара, бекIлибиубси — багьуди касни.
Ишдуслизир мургьилайчил дарх арцла медальтира дедлугули сари. Илди шабагъатладирнила хIяракат тIашаибсири 2014 ибил дуслизиб, в ахIера, вецIал дус шалгIердухъунхIели, гIядат даимбиуб. Шабагъат касес вирар, эгер аттестатлизир кIиличир имцIали ахIи «авла» кьимат лерли диалли, урусла мезла ва чеббикIибси ца предметла имтихIяйс выпускникли 60 балл ва имцIали касили диалли. Ишдуслизиб районизиб вецIну шура выпускниклис мургьила медаль касиб, 11 – арцла.
Балбуцлизир бутIакьяндеш дариб школабала директортани, районна багьудила управлениела хIянчизартани, выпускникунала бегIтани.
Выпускникунас шабагъатуни дедиб районна багьудила управлениела начальник Ханум ГIисаевани.
«Баркалла бегIтас ва мугIяллимтас дурхIнас гIяхIси бяркъ беднилис ва дурхIнала хIясилти ункълидархънилизи пай кабихьнилис. Нушала районни пахрубируси саби пагьмучебти жагьилтачи», — цIакьбарили буриб илини.
Х.ГIисаевани выпускникунас, мургьила ва арцла медальти касибтас, чебяхIси даражала багьуди кайснила хIяракатлизир сархибдешуни далгун. Илкьяйдали илини медиалистунас Дагъистан Республикала багьудила министр ЯхIъя Бучаевла шайзирад Баркаллала кагъурти дедиб.
Сергокъалала районна багьахънибала центр
