Пагьмучебти шягIирти
АрхIебашар даимлис,
Шурбухъи зубартачи,
ЧебяхIихъур заклизи.
Избербаш шагьарлизиб Рабадан Нуровла пьеса хIясибли «Зулму» бикIуси драмала спектакль чебаахъибсири. Ил хасбарибсири даргала советская литературалис хьулчи кабихьибси машгьурси поэт, пьесала автор 135 дус виънила юбилейлис. Балбуц дураберкIахъес кумеклибиубсири республикала Миллатла библиотекала краеведениела отделра.
Театрла жаняхIлизир Р.ХIямзатовла уличилси Дагъистан Республикала Миллатла библиотекала краеведениела ва миллатла литературала отделла даргала секцияла руководитель Салимат ХIяжиевани пагьмучевси поэт, драматург, революционер, жамигIятла ва пачалихъла хIяракатчи Рабадан Нуровличила багьахънибала журализиб стенд ва жузала выставка гьаладихьиб.
Шадлихъла балбуц бузахъулри театрла музыкала бутIала заведующая Эльмира Ибрагьимовани. Спектакль бехIбихьайчи гъайбухъун режиссер-постановщик – театрла художественный руководитель ДР-ла ва РФ-ла искусствобала урибси хIяракатчи Мустапа Ибрагьимов, ДР-ла халкьла гIяртист, ДР-ла халкьла поэтесса, публицист ва тилмаж Аминат ГIябдулманапова, ДР-ла культурала урибси хIянчизар Лавашала районна культурала управлениела начальник Халид МутIалимов.
Балбуцличи вакIилри юбилярла дурхIяла дурхIяла дурхIя Мурад КьурбанмяхIяммадовра. Илини гьандикахъиб поэтла гIямруличила гIяхIцад баянти. Законагар шайчив гIяйиблизи уцили, туснакъварниличила ва илав 1942 ибил дуслизив сунела вархкья шиннизи кайкибхIели, ил верцахъес кьасбарибхIели алхниличила бурулри илини.
Цалабикибтачилси ихтилатлизиб режиссерлира цархIилти гIяхIланира дахъал баянти гьандикахъиб машгьурси дагъистанлан, пагьмучевси драмутург, пачалихъла ва жамигIятла хIяракатчи Рабадан Нуровличила. Ил бархьдеш гIеббурцули, дубурлантала кьисмат гIяхIбухъахъес багьандан гъабзадешличил ургъусири. Творчестволизив биалли заманаличил уржили гьалавяхI вашули, гIямрулизирадли гьарли-марти баянти кайсули, иштяхIличил узусири. Илкьяйдали бебкIаагарти произведениеби алкIахъутири пасихIси дарганни.
ЦархIил секIайчила гьанхIебушаллира, чуйнара даргала театрли дубурла шимазиб ва шагьуртазиб дахъал дусмазиб чебиахъули хьалли, адамтас хIебиртIуси ва хIерикIес иштяхIдухъесил «Зулму» пьесали шягIирла мурхьси пагьмуличила бурули саби. Ил гьанна даргантани уркIиличиб балули саби викIалра хатIа бетхIерар. Амма ил хьулчили буцили чебиахъуси спектакльличи чуйна хIерикIаллира, гIурра чебаэс иштяхI имцIабикIули бирар. Ил чебяхIси пагьмула заманали сунела ранг хIедулъахъуси хабарла гIяхIгъабза Р.Нуровли акIахъубси дубурла шурми нурли иркуси караматдеш саби. Ил итхIелла манзилла «касибси» гьарли-марси «сурат» саби, ишбархIира сунела мягIничебдешличил машгьурли калунси ва иштяхIличил халкьли кьабулбируси.
Спектакльла бекI игнитуни Мусалара ГIяйшатлара ролани дузахъулри ДР-ла халкьла гIяртист Мухтар НухIовли ва театрла гIяртистка ХIузаймат Ибрагьимовани. Илкьяйдали постановкализир бутIакьяндеш дариб РФ-ла урибси гIяртист Нариман ГIялиевли, ДР-ла бурибти гIяртистуни МяхIяммадшамил Шамиловли, МяхIяммадрасул МяхIяммадрасуловли, ХIясанкьади Рабадановли, ГIябдуллагь Ризвановли, Рашидат ИсмягIиловани, Аминат Дациевани, театрла гIяртистуни ГIябдусамад ГIялиевли, Минатуллагь ХIусеновли, НурбяхIянд Идрисовли, Загьидат Мусаевани, Басират ГIябдуллаевани, Рахмет БяхIмудовли, Зарина ГIязизовани, Ислам ХIясановли, Амирбек Батировли ва цархIилтани.
ГьанбиркахъехIе, постановка бегI гьалаб чебаахъибсири 1972 ибил дуслизиб, сагадан ункъбарибсири 2014 ибил дуслизиб. 2017 ибил дуслизиб Нальчик шагьарлизиб «Южная сцена» ибси фестивальличиб Р.Нуровла «Зулму» спектакль балкьаахъурти режиссер ва театрла коллектив халкьани-ургабси жюрила дипломличи лайикьбикибсири. Композиторла хIянчира «Лучшее музыкальное оформление» ибси дипломличи лайикьбикибсири. РФ-ла халкьла гIяртист Ширвани Чалаевла музыкали ва ДР-ла халкьла художник Ибрагьимхалил Супьяновла декорацияли тарихла бетуцуни гIячихъли гьаргдирулри. Пагьмучевси авторли белкIунси пьеса устадешличил чебиахъухIели, хIербикIутала иштяхI гьачамличиб-гьачам имцIабикIули саби ва нушала хала бегIтала манзил хIулбала гьалаб лебсиван гьанарули саби. Илар чузи хIякимдешла ихтиюрти дикибтала уряхIти баркьудлуми далтIули, хIялалти адамтала игитти хIялани ва марти дигай гIердурцули сари. ЦIудхъурла шилизирра итхIели дубурла цархIилти шимазиргъунти сарри адамтала гIямру. Илди, мурхьли хIячмала хьулчначи ваайчи ухIнавхъи, гIячихъли сипатдирули сай авторли. ХIузаймат Ибрагьимованира ГIяйшатла сипат лебгIеб жагали гьаргбирули сари ва итхIелла дубурлантани дархьтази халдирути дуркьа гIядатуначи хIерхIеили, сунела дигайлис марли кавлули сари.
Чула кьисмат гьунчибикахъес диргаладулхъути дуркькадиубти гIядатуначи хIерхIеили, театрла гIяртистунани шадли ва хIулкIули замана беркIести имканти дургули сари.
Авторли пьесала ахирличиб Мусара ГIяйшатра азадтили ва чула кьисмат цабарестили чебаахъили биалра, режиссерли барсдеш бухIнакаили сай ва Муса туснакълизи виркули сай…
Илкьяйдали пьесала бекI игит Мусала ва Р.Нуровла кьисматуни мешутили урдулхъули сари. Илдалаван кьисмат букьбуунти ва гIяйибагар шайчиб гIяйиблизи буцили, туснахълар бегIлара къугъати гIямру деркIес чебуркъубти ва бебкIили гIергъи марбарибти итхIели нушала улкализиб бахъал сабри.
Авторли акIахъубти ва сипатдирути гIямрулара режиссерли дарсдарибти анцIбукьуналара гIяхIдешличибли ардякьунти дусмала ва ишхIелила манзиллара чIумати бархбасуни кадилзули сари, тарихла бяхIяни гьатIира гIячихъли гьаладилзули сари. Илизибгу пагьмучебти адамтала бебкIаагардешла бетуц гIячихъбирусира.
Рабадан Нуров акIубси сай Лавашала районна Санамахьи бикIуси шилизив хъубзарла хъалибарглизив. Мадрасализив учIули калунсири. Жагьли левай Майкоплизибси набт адилтIуси мерличив узусири. Илав подпольная организацияла член ветаурсири. 1914-1917-ибти дусмазир забастовкабазир бутIакьяндеш дарни багьандан туснакълизив калунсири. Илини дунъяла цаибси дергълизир бутIакьяндеш дарибтири.
Октябрьла революциялис гIергъи Майкоплизи чарухъунсири. Советунала Исполнительный Комитетла (ИКС-ла) член ветаурсири ва кIинайс илала председательли узули калунсири.
1918 ибил дуслизив Р.Нуров Дагъистайзи чарухъунсири. Дагъистайзиб Совет хIукумат кабилзахъухIели дявила анцIбукьуназир бутIакьяндеш дарибитири. ГIяякьакьализиб цIубабачи къаршили дураберкIибси дергълизирра партизантала эскадронна командир сайливан, бутIакьяндеш дарибтири. Дагъистайзиб хIукуматличи къаршили дурабухъунтачил бургъуси партизантала отрядлисра бекIдеш дирули калунсири. Дявила анцIбукьуназир бутIакьяндеш дирухIели, гъабзадеш чедаахъни багьандан ХIунтIена байрахъла орденничил шабагъатлаварибсири.
Граждан дергъ таманбиубли гIергъи, Гъунибла, кIинайс Даргала округла исполкомла председательли, Даггизла управляющийли, Дагъиста шила хозяйствола институтла директорли узули калунсири.
Рабадан Нуров писательтала лебил Дагъиста ва СССР-ла цаибти съездунала делегат сайри.
Револициялис гьаларти дусмазир делкIунтири илини сунела произведениеби. 1914 ибил дуслизиб белкIунси «ХIябал дубурлан» бикIуси назмулизиб илини адамтала къиян букантала хIукумат агарбарахъес маслигIятбирули сай. Революцичлис гIергъи делкIунти произведениебазив ил дубурлан хьунул адамтала кьисмат ункъбиахъес ибси кьасличил дураулхъули сай. Илала «Революцияла далуйти» ибси цаибси жуз 1920-ибил дусмлизиб Темир-Хан-Шурала типографиялизиб дурабухъунсири. ГIур илини даргала литературализир цаибти пьесаби делкIунтири «ГIядатунала кьялшубазирси ГIяйшат» (1928 ибил дус) (ил 1934 ибил дуслизиб «Зулму» ибси уличил дурабухъунсири) ва «Пучиубси шайх» (1931 ибил дус) ибти. Илди даргала драматургия гьалабяхI башнилизир мягIничертили детауртири.
1934 ибил дусличивадли СССР-ла писательтала Союзла член сайри.
Р.Нуровла Москвализиб Арсений Тарковскийли шурбатурси урус мезличил назмуртала жуз дурабухъунсири.
«ХIенкьула» бикIуси пьеса Дагъиста премияличи гьалабихьибсири. Амма 1937 ибил дуслизив поэт туснакъвирухIели, илала архивра агарбарибсири ва ил пьеса нушачи баибси ахIенри. Ил пьесала мягIна халкь гIязаббуркIуси буркьа дунъя кутурбиубли, талихIчерти гIямру делшес бехIбирхьни сабри.
ИтхIели цацабехIти мехIе дерхIибти хIякимтани хIябилра бахъал пагьмучебти ва ВатIайс марти гIяхIгъубзни гIяйибагаркъира туснакълизи кабатуртири. Илдала лугIилив увухъун цIала тякьгъуна дарган Рабадан Нуровра. ВатIайчи марти дигили уркIи гарчли бицIибси, бугаси пагьмули хабардерхахъурси, адамтачи дигили чевяхIварибси, хIял-тIабигIят дубурлан дебшлизир чIумадиубси, адаб-хIяяла байрахъ ахъли бихули калунси ва чеалкIуси наслулис гъабзадешла мисалли ветаурси дарган чум дус дикалра, дубурлантани хъумхIерту. Илала произведениеби дурхIнани уркIиличир руркъутири гьанналаурра, руркъу гьаннала гIергъира. Илди гIямрула сецад дусми ардашалра хъумуртути ахIен ва къукъулис гIергъи лямцIван дагьрилизир дагьардухъи, къияндикибхIели хъябхъялис гIергъи берхIи ванзаличиван адамла дагьриличи ванадикIути сари. СенахIенну илди бебкIаагарти сари.
ПатIимат Кьурбанова,
Салимат ХIяжиева
