Хайдакьла районна дурхIнала пагьмуртала Юртла педагог ГIяшура ХIясайниевани республикала кьадрила «Художник-педагог» бикIуси 5-ибил выставкаличир  бутIакьяндеш дариб. Выставка ГI.Тахо-Годила уличилси Дагъиста педагогикала гIилмула-ахтардила институт акIахъубхIейчирад 80 дус дикнила дазурбазиб дураберкIибсири.

Республикала районтазибадти ва шагьуртазибадти художникуни-педагогунани выставкаличи чула някъбани дарибти баркь-бацлизир пайдаладирути жагадешла ваяхI кадухиб. Хайдакьла районнизирадси ГIяшура ХIясайниевани Хайдакьла някьиш ва Расул ХIямзатовла суратличилси кьалтин гьаладихьиб.

Выставкала баянти хIясибли, чедибикибти лебилра  шабагъатбирнила балбуцличи ДР-ла гIилмула ва багьудила Министерстволизи жибариб.

«Декаративно-прикладное искусство. Вышивка» номинациялизиб ГI.ХIясайниевани цаибил мер касиб ва ДР-ла багьудила Министерствола шайзирад цаибил даражала дипломличи лайикьрикиб. «За сохранение народных традиций в творчестве» номинациялизиб ГI.ХIясайниевас Баркаллала кагъар бедиб, илкьяйдали,  «Художник-педагог» бикIуси республикала кьадрила 5-ибил выставкаличир жигарла бутIакьяндеш дарни багьандан, Сертификатра бедиб.

Буралли, ГIяшура ХIясайниева чеимцIаси багьудила кьялилизир 45 дус рузули сари ва гIяхIцад дурхIни багьудлумачил бегIбарили сари. Педагог дурхIнала пагьмуртала Юртла руководительла, районна администрацияла ва багьудила отделла шайзирад гIяхIцад шабагъатуначи лайикьрикибси сари.

Хайдакьла районна администрацияла пресс-служба