Шимазиб хIербирути жагьилтала се­гъуна-биалра баркьудилизир сар­хибдешуни диахъубли, ил кья­лилизи ди­гести дарсдешуни духIнакаили, сагасилигIиб ум­цIули чебиухIели, уркIи хIяйбал­тули бирар. Ил­дигъунтани саби нушала Дубуртар Улкара арагIебли дунъяличиб машгьурбирахъуси.
ИшбархIи дебали аргъбаибси масъалали бетаурли саби жагьилти гьалабяхI башахънила, хаслира – шимала мер-мусаличиб хIербирути. Илди масъултала мягIничебдеш иргъули, ил шайчир гIяхIцад къайгъни дакIудирутира камли ахIен. ХIера, илдигъунтала лугIилизивадси сай Губданила шилизивадси ГIисаев Мя­хIяммад-Загьир Эльдарович. Къа­рабудагъкентла районнизиб акIа­хъубли леб Россияла шимала жагьилтала союзла (РССМ) отделение. Илис бекIдеш дирули сай нуша­ла макьалала игитли.
МяхIяммад-Загьир ГIисаев акIуб­­си сай 2000-ибил дусла февраль­ла 13-личив, МяхIячкъала шагьар­лизив. Илини 2022 ибил дус­лизиб ДГУ-ла юридический факультет таманбариб, илкьяйдали «шула» кьиматуначил хъараахъес бажардивикиб Москва шагьарлизибси РАНХиГС-ла пачалихъла ва муниципалитетунала кабизла факультетла магистратура. 2023 ибил дуслизив ДР-ла шайчибси МФЦ-ла управлениелизив ­юрисконсультантли узули калун. 2025 ибил дусличивад Дагъистан Республикала БекIла пачалихъла кабизла, кадрабала ва пачалихъла шабагъатунала хIекьлизирти масъултала шай­чибси Управлениела хIян­­чизар сай.
Илцадра жагьси адамла нушала республика, сунела ахIерси район гьаладяхI ардукес гъирара иштяхIра лерни дебали дигеси саби.
«Къарабудагъкентлизиб­си Россияла шимала жагьил­тала союзла отделение гьаркьятала лугIилизиб саби. Амма, нуша ил бяхIчибизлизир тIашдизес пикри агара. Ил районнизибад шимала мер-муса вавалидяхъяхъес ибси кьасаначилти жагьилти лебли биалли, гьайгьайрагу, нуша илдигъунти командализиб чебаэс разили дирехIе. Нушаб сиптакарти, челябкьлаличила пикрибикIути жагьилти хIяжатли саби», — бурули саби МяхIяммад-Загьирли нушачилси ихтилатлизиб.
Гьанна ДР-ла БекIла гIяхIцад Грантанира лер, сарира шимала мер-муса гьаладяхI дашахънила шай­чирти декIар-декIарти проек­туни гIердурцути. Пачалихъла гIяхIдешуни пайдаладарили, ца­ца­бехI­ти жагьилтани чула бузерила бетуц – баркьуди ибхьули саби. Гьай­гьайрагу, иличибли шантасра гIяхIдешуни имцIадикIули сари: бегI гьалабси яргализиб, хIянчила ме­рани алкIули сари.
Илдигъунти ,гьарил секIайзир жавабкардеш дихес хIядурти жагьилтазибад акIахъубси цалабяхълис халаси устадешличил бекIдеш ди­рули сай МяхIяммад-Загьир ГIи­саев­лира. Илала ва бархкьябала бузери чихъли кьиматлабирули, гьалабван РФ-ла шила хозяйствола министрла насихIятчи, РФ-ла РССМ-ла председатель Дмитрий Пекуровскийли къулбасбарибси Баркаллала кагъарличил илди шабагъатлабарибтири. Гьайгьайрагу, ил шабагъат дебали мягIничебси саби, суненира жагьилтала бузериличи Федерацияла даражаличибра бирхауди бихьни марбируси.
«ДекIарли баркалла багьахъес дигахъаси Дагъиста РССМ-ла председатель Арсен Ильмияминовичлис, суненира цаибти бурхI­на­зибал нушачи, нушала баркьудиличи халаси умут бихьнилис, ва гьарил балбуцлизир нуша гIердурцнилис. Гьайгьайрагу, гьаннала гIергъира ахIерси ванзалис багалати хIянчи даимдарили дирар», — аргъахъиб сунела пикруми МяхIяммад-Загьир Эль­даровичли.
Шимала гьабкьянабили бетаурти, хIян­чи­лизибад уруххIекIули, чула мурадуни детер­хахъес къай­гъи­чебти жагьилтас ва илди ур­жа­хъес имканбакIибси, серхурси Мя­хIяммад-Загьир ГIисаевлис нушани гьарбизуни дулгехIе. Дирхулра, хIушагъунтани шимала челябкьлара шаласи бетарахъниличи, жагIялла бархIилизирра хIушала сархибдешуначи нушани пахрубирниличи. Арали датабая!

Салимат ГIялиева